Home Local Palabracionnan tumando luga pa deal cu crisis di refugiado Venezolano

Palabracionnan tumando luga pa deal cu crisis di refugiado Venezolano

664

Aunke prome minister Evelyn Wever-Croes (MEP) ta duna di conoce cu tin situacion di e pais bisiña Venezuela tin su persona ‘preocupa’. No solamente pa e aspecto humanitario, si no tambe e efecto cu esaki lo tin riba nos isla. Mientras trabounan ta tumando luga ‘as we speak’ pa defini detayenan pa Aruba por ofrece ayudo, den 2017 na Corsou 70 persona mas o menos a meld pa asilo y 500 luga a wordo crea pa nan bou Cruz Cora di Corsou.

Segun fuente NRC, e crisis di persona cu ta saliendo di nos pais bisiña den direccion di islanan ABC ta aumentando cada dia. Esaki ta pone corda tambe e incidente par di siman pasa unda un grupo di persona Venezolano a perde nan bida riba lama purbando pa yega na costanan di islanan den reino.

Aunke sr. Stronks ta haya cu tin tanto casonan di disidente economico como disidente politico di e estado Bolivariano, prome minister a expresa durante un conferencia di prensa cu ta trata principalmente di disidente economico. Bon Dia a confronta prome minister tambe cu e echo cu e convenio di refugiado a base di firmamento di e protocol ta obliga pais Aruba pa ofrece ayudo na disidente politico a base di criterionan humanitario.

Riba esaki sra. Wever-Croes a expresa cu aunke como pais Aruba mester ta cla pa cumpli cu deber internacional, no ta asina cu Aruba ta obliga mirando cu Venezuela actualmente no ta wordo considera como un pais unda tin un crisis di e magnitud cu lo por papia di refugiado segun e tratado. “Pa gran mayoria persona cu ta sali di Venezuela ta haci esaki pa via di situacion economico, pues no por papia di asilo otorga a base di e tratado.”

Criterio y unda pa manda refugiado
Prome minister a splica cu e combersacionnan tumando luga actualmente ta encera pone riba preto cu blanco cua ta e criterionan cu lo mester wordo estableci pa determina si un persona ta bin na remarke pa asilo. Pero tambe kico lo bay haci cu e personanan cu drenta despues cu nan pasa un proceso di registracion riba nos isla. “E proposicion cu mi a yega di presenta na Hulanda y otro pais ta cu mirando cu Aruba ta asina cerca, nos por sirbi como un punto di intake. Ora bo tuma nan pa proceso di intake bo por duna nan dak pa par di dia, pero djey nan mester bay otro pais. Pasobra na Aruba nos no por carga tur hende. Si un crisis real mester presenta no ta 500 hende so ta presenta, ta bin hopi mas.”

Sra. Wever-Croes ta haya cu Hulanda mester forma parti di e combersacionnan tumando luga con pa lidia cu e situacion cu cada dia ta birando pio. ‘P’esey tambe mi a sugeri pa nan por bay Boneiro’, e prome mandatario a expresa. Es mas segun e mandatario, con e problema aki wordo ataca ta afecta credibilidad di henter reino, pues Hulanda lo mester ta dispuesto pa yuda.

Mientrastanto segun fuente Curacaonieuws.nu, Corsou keto bay aña pasa a tuma rond di 70 persona en total cu a meld nan mes pa asilo. Alabes na fin di 2017 segun NRC, Cruz Cora di Corsou a tene 500 luga habri pa refugiadonan mirando e problema cu ta creciendo na pais bisiña Venezuela. Esaki mientras Corsou oficialmente no a firma ni e convenio pa refugiadonan ni e protocol basa riba esaki. NRC ta reporta cu riba Corsou e aplicacionnan pa asilo ta pasa via Cruz Cora y e agencia di refugiadonan di Nacionnan Uni (UNHCR). Es mas, ora un persona meld su mes como refugiado, ta percura pa via e organisacion internacional di migracion (IOM) haya un luga pa refugiadonan pafo di Corsou.

Ta posibel cu Surinam lo por tuma refugiado
Actualmente e prome mandatario a splica cu el a tuma nota di paisnan manera Surinam cu actualmente tin un interes pa crece den poblacion. P’esey sra. Wever-Croes lo kier palabra hunto cu Nacionnan Uni pa acepta refugiadonan na Aruba pa djey traspasa nan otro pais cu ‘si kier y por ricibi nan cu brasa habri. Anos kier pero nos no por’.

Poco siman atras 24ora.com a raporta cu Dimas a mira no mas cu 10 peticion pa asilo pa aña. Pero tur peticion, cual a bin di parti di personanan (entre otro) cu nacionalidad Venezolano, Colombiano, Cubano y Surnameño te awo a wordo nenga. Sinembargo tin algun cu ta den proceso di apelacion. Dimas a splica cu pa bin na remarke pa proteccion bida di hende mester ta den peliger, cual ta wordo evalua pa diferente departamentonan.

Nos a tuma contacto cu Cruz Cora cual no tabata dispuesto pa duna ningun informacion riba e estado di preparacion cu nan tin pa acepta refugiadonan. Nan a referi nos na Departamento di Calamidad. Pero e pregunta ta keda: si situacion na nos pais bisiña yega na punto cu tin migracion masal, Aruba lo ta cla pa pone man hunto cu otro paisnan? Tabatin plannan den pasado pa haci di centronan deportivo na Dakota y Santa Cruz un punto pa tuma refugiado pero no a bin claridad con leu esaki a yega. Nos lo sigui riba e desaroyonan aki mas di cerca.