(AP) — Panama a suspende proteccion constitucional pa cinco dia na su provincia Bocas del Toro ayera, despues di dos luna di protesta y blokeo di caminda cu a bira mas destructivo e anochi anterior.
Minister presidencial, Juan Carlos Orillac a bisa den un conferencia di prensa cu e movida lo permiti gobierno establece orden y “rescata e provincia” for di “gruponan radical.”
Loke a cuminsa como un protesta nacional contra cambio na sistema di seguridad social a converti diahuebs anochi den hende dañando e aeropuerto local y e facilidadnan di gigante di bacoba, Chiquita Brands, cu a duna retiro na miles di trahado den welga na e provincia luna pasa.
Presidente di Panama, Jose Raul Mulino a bisa e tempo aya cu e welga di e trahadornan di bacoba tabata ilegal y a inclui alrededor di 5mil trahador.
Dia 27 di mei, gobierno a declara estado di emergencia na e provincia sin suspende proteccion constitucional. Pero accionnan di hende cu cara tapa, kende autoridadnan a describi como criminalnan, a pone cu Mulino a anuncia diahuebs anochi cu e lo reuni cu su Gabinete riba diabierna pa tuma accion. E actornan a kibra drenta den aeropuerto na Changuinola, e ciudad principal di Bocas del Toro, unda nan a vandalisa auto y a pega candela den stadion local di baseball. Nan a sakia e tereno di Chiquita y a destrui e oficina local di Servicio Nacional di Defensa Civil.
Protesta, marcha y blokeo ocasional di caminda a plama di un banda di e pais pa e otro mientras maestro, trahador di construccion y otro sindicatonan ta rechasa cambio cu gobierno a bisa ta necesario pa tene e sistema di seguridad social solvente.
Manifestacionnan ocasionalmente a bira violento, pero e entrada forsa di hende na aeropuerto y e tereno di bacoba durante anochi a duna impulso na e reaccion di gobierno diabierna.
Anteriormente e luna aki, Mulino a trece un arsobispo Catolico y un Rabbi pa actua como mediadornan cu e manifestantenan. Siman pasa, Congreso di Panama a aproba un ley nobo pa sector di bacoba cu tabata parti di un acuerdo pa caba cu e welga, door di protege beneficio di trahador manera asistencia medico y proteccion laboral bao e regimen nobo di seguridad social.
