Panorama ta complica na Venezuela: Reconocimento no ta suficiente

Nos ta sigui cu atencion e fervor di e bataya na e pais bisiña. Awe tin un otro dia di tension grandi ora oposicion yama e poblacion pa subi caya den rechaso di e regimen actual. Con esey ta bay termina nos no sa ainda. Si ta conoci cu e regimen tambe a yama su militancia pa subi caya pa demostra nan lealtad na e ‘lider maximo.’ Tur esey por parce masha cos, pero probablemente e unico cos cu lo a cambia pa dialuna mainta ta cu algun ciudadano ta na morgue y un cantidad mas grandi ainda lo ta cera. Dios sa kico ta warda nan, tortura y hasta morto. Tanto a bay prome cu nan caba.

Anto Union Europeo, na nivel ehecutivo, no por a yega na un consenso y a opta pa crea un grupo di contacto, manera nan ta yama esey na Hulandes: un ‘praatgroep’ cu ta bay stimula ‘dialogo’ y agilmente a tira e asunto pa e paisnan individual, loke ta formalmente corecto tambe.  Ademas, den cierto sentido nan tin razon, pasobra si en principio e oposicon no a scoge pa violencia, anto ta papiando lo mester yega mas leu. Pero tin mas tras di esaki. Hulanda no ta e unico pais cu ta anda cu masha cuidao den e tipo di situacion aki, pasobra nan no kier keda malo cu e actual gobierno, pasobra si e asunto aki fracasa, loke no ta di spera, nan mester a tene un porta habri. Asina diplomacia ta funciona pa siglo caba y nada ta bay cambia esey. Y ademas nan no ta e unico pais cu interes economico grandi na Venezuela, asina ta cu oposicion Venezolano no mester conta demasiado cu e paisnan Europeo, a pesar di e apoyo masal cu nan a haya na nivel di Parlamento Europeo, cu por tin otro pensamento cu esnan den ehecutivo, manera a resulta awor despues di e reunion di canciyer di ayera.

Mientras cu Union Europeo  a tuma un paso menos radical cu tabata pensa inicialmente, y ta indica den direccion di dialogo, na Venezuela  Guaido ta vocifera cu e tempo pa dialogo a pasa hopi tempo caba, pa e experiencianan amargo cu nan tabatin cu e Chavistanan cu a usa dialogo algun aña atras na nan bentaha. Di otro banda, Guaido mes sa masha bon con pa usa comunicacion verbal. Asina el a papia den secreto cu e Chavistanan caba, anto cu e mero diablo, Cabello en persona. Tambe e lo a papia o ta papiando ainda cu e militarnan, loke ta nada repudiable. Loke e no kier, y esey ta logico, ta un dialogo formal unda tur cos ta dal para mientras tanto, pasobra esey ta duna e dictadura tempo pa reagrupa, sigui eherce un represion pa duna hende mas miedo pa participa den e movimento pa regreso na democracia, y finalmente kibra e dialogo.

E pregunta clave na e momento aki ta con e cos aki ta bay sigui. Na ken su fabor e factor tempo ta mas, na banda di oposicion o di gobierno? Aki tambe ta dificil pa duna un contesta, sin bay den detaye mas complica. Sin duda algun e deterioro di e condicionnan economico ta traha na fabor di oposicion. Si no tabata asina, anto oposicion no a haya un segundo oportunidad tampoco, despues di e debacle di 2017, cu e protestanan riba caya cu no a resulta. Un peligro cu awor atrobe ta presente, sigur si e regimen scoge pa represion fuerte contra e manifestacionnan. Pero ta parce cu nan tambe ta siñando rapidamente, cu detencion y asesinato selectivo den oranan di anochi. Tambe ta trata di corta comunicacion mas tanto posible. Nan tambe sa cu domina corant y television den e era moderno aki no ta suficiente y ta pesey ta haci uso, segun diferente denuncia, di ciere di internet den cierto areanan pa impedi e comunicacion via rednan social.

E punto mas importante unda tempo ta traha na desfabor di gobierno di Maduro ta e situacion economico, y pio ainda awor cu e ultimo medidanan di Merca tin un efecto grandi riba situacion financiero di tanto Pdvsa como e pais mes. E aspecto mas importante cu e regimen mester cambia, si nan kier sobrevivi, ta mehora e situacion di cuminda y medicina. Poco cos ta haci hende mas desespera cu falta di cuminda y pa mira nan familiarnan fayece pa causa cu algun tempo pasa lo tabatin solucion sigur den e pais. Como cu e regimen no lo tin e recursonan pa importa cuminda y medicamento na gran escala, y e produccion interno a collapse pa gran parti caba, e unico manera pa haya esakinan ta a traves di acepta ayudo humanitario internacional. Esnan mas testarudo lo no kier acepta esey, pero e por yuda calma e malcontento bao di e militar y polisnan di menor rango tambe, cu tampoco tin di come. Aunke ta casi un crueldad pa bisa esaki, pero ausencia di ayudo humanitario lo stimula un caos tal cu e situacion ta bira incontenible. Unico cos ta cu esey no necesariamente ta algo di dia, o siman solamente. E por ta mas bien di varios luna tambe, pa duro cu esey ta zona.

You May Also Like

editorial 2_44.jpg

Back To The Street

Man bun bespoke freegan, kitsch retro ethical banh mi williamsburg drinking vinegar sustainable heirloom ...

Ley riba Serlimar ta permiti diferencia tarifa?

Segun nos, no… Nos lo por ripiti nos observacion di algun dia pasa cu ...

Caso Ibis a clausura… Y kico nos a siña?

A yega un final na e prome fase di e proceso penal den e ...

Radisson all over again?

Un situacion cu a causa conflicto grandi den partido AVP, y cu a duna ...