Papa Francisco a haci un yamado na tur hoben inmigrante, cu por keda afecta pa e programa Mericano DACA, pa sigui cu nan soño.
Papa Francisco a papia via un video cu hobennan conecta na Texas, Puerto Rico y otro pais di Latinoamerica. Papa a haci un yamado na tur gobierno pa ricibi inmigrante. El a pidi tambe pa tur inmigrante duna respet na tur ley cu ta regula e pais caminda nan ta biba.
Trump a bisa cu e lo kita e programa di Accion Diferi pa hoben cu a yega Merca desde nan niñez, cu ta conoci como DACA. Trump a pidi pa Congreso presenta un alternativa pa e programa aki.
“E prome cos cu mi kier bisa bo, ta cu ami ta resa tur dia pa boso. E di dos cos ta cu mester sigui soña. El a bisa cu nan mester busca un hende cu por duna amor y cu lo kier defende boso na momentonan dificil,” Papa Francisco a splica.
DACA ta protege cerca di 800.000 persona, di cual hopi ta studiante di universidad y hoben profesional, cu a yega Merca di manera ilegal, tempo cu nan tabata mucha, of tempo cu nan a drenta teritorio Mericano cu visa hunto cu nan famia y nan a keda na Merca te dia cu nan visa a caduca.
Papa Francisco a bisa cu el a cuestiona henter e intencion di Trump di elimina e programa. Francisco a bisa cu cualkier hende cu ta apoya e garantia di bida, mester traha pa logra mantene tur famia uni.
Via conexion di video Papa Francisco a duna su comentarionan na studiantenan envolvi den e iniciativa di Scholas Ocurrentes, cu Papa Francisco a desaroya tempo cu e tabata arzobispo di Buenos Aires. Su intencion tabata pa fomenta dialogo entre hoben di diferente pais y cultura. Papa Francisco a converti e programa aki den un fundacion di derecho pontificio, y asina ta permiti tur apoyo di Santa Sede.
