Papa Francisco ayera a adverti ehecutivo di compania tecnologico, diplomatico y financieronan cu e carera pa crea inteligencia artificial (artificial intelligence, AI) y otro formanan di desaroyo digital ta core e riesgo di aumenta desigualdad social, a menos cu e trabou ta compaña pa un evaluacion etico di e bien comun.

Francis a dirigi su mes na un conferencia na Vaticano, cu presencia di enviadonan di gobiernonan, y representantenan di Google y Facebook, hunto cu filosofonan, fisiconan y eticistanan. Un cantidad di academico y obispo Catolico a completa e participantenan di e conferencia ‘E bien comun den era digitial’.

E reunion di tres dia ta e evidencia mas recien cu Vaticano kier un luga den e debate tocante e prospectonan y peligernan di interligencia artificial (AI).

E debate a inclui topiconan manera avancenan tecnologico den guera, y e futuro di labor cu dependencia creciente riba mashin, como tambe un estudio examinando e masacre na Christchurch, New Zealand, y e decisionnan cu companianan di rednan social a tuma despues cu video di e masacre a keda distribui.

Den su discurso na e conferencia, Francis a elogia e potencial di progreso tecnologico, notando cu mashin na cuminsamento di revolucion industrial a scapa trahadonan di labor peligroso y monotono. Pero el a adverti cu dependencia creciente riba robotica pa ganashi ta core riesgo di priva hende di e dignidad di labor.

“Si avance tecnologico bira e causa di desigualdad cada bes mas evidente, e lo no ta progreso real y berdadero”, el a adverti. “Si e asina- yama progreso tecnologico di ser humano lo bira un enemigo di bien comun, esaki lo conduci na un regresion desafortuna na un forma di barbarismo dicta pa e ley di esun mas fuerte.”

Organisadonan di e conferencia a bisa cu nan tin speransa di ‘tap’ den e experticio di participantenan pa identifica conseheronan den futuro pa Iglesia Catolico den asuntonan di tecnologia halto.