(AP) – Papa Leo XIV a reuni dialuna cu un di e defensor mas prominente pa mas inclusion LGBTQ+ den Misa Catolico y a encurasha su ministerio, pa medio di manda un señal fuerte di hospitalidad den e lunanan trempan di su pontificado.
E Rev. James Martin, un Jesuita basa na New York cu ta autor y editor, a bisa cu Leo a bise cu e tin e intencion di sigui Papa Francisco su politica di aceptacion di LGBTQ+ den misa y a encurash’e pa mantene su legado.
“Mi a tende e mesun mensahe di Papa Leo cu mi a tende for di Papa Francisco, cual ta e deseo di duna bon bini na tur hende, incluyendo e comunidad LGBTQ+” Martin a conta The Associated Press despues di e audiencia. “E ta great. E tabata un consuelo y hopi motivador y hopi divertido tambe.”
E reunion, cual a dura alrededor di mei ora, a keda oficialmente anuncia pa e Vaticano como un señal cu Leo tabata kier haci esaki publico. El a bini dianan prome cu e Catoliconan LGBTQ+ participa den e peregrinahe di Aña Santo na e Vaticano den otro señal di hospitalidad.
E audiencia tabata significante pa motibo cu e ta demostra un señal di continuidad cu Francisco, cu mas di cualkiera di Leo su predecesor cu a traha pa haci e Misa Catolico un luga cu mas acogida pa Catoliconan LGBTQ+.
Durante su legado como Papa for di 2013 pa 2025, Francisco a reuni varios biaha cu Martin y a nombra su persona un consehero di Vaticano su departamento di comunicacion y un miembro di su reunion di varios aña unda ta papia tocante e futuro di e misa. Sinembargo, Francisco nunca a cambia e misa su doctrina bisando cu actonan homosexual ta “desordena.”
Leo su posicion tocante Catoliconan LGBTQ+ tin hopi tempo den cuestionamento. Pronto despues cu el a keda eligi den mei, remarcanan a surgi for di 2012 den cual e papa futuro, e tempo aki conoci como Rev. Robert Prevost, a critica e “estilo di bida homosexual” y e rol di media den promove aceptacion di e relacionnan di mesun sexo cu ta den conflicto cu e doctrina Catolico.
Ora cu el a bira Cardinal den 2023, Catholic News Service a puntra Prevost si su punto di bista a cambia. El a admiti Francisco su yamado pa un misa mas inclusivo, bisando cu Francisco a “laga hopi cla cu e no tabata kier pa hende keda exclui simplemente a causa di nan decisionnan personal, sea cu esaki ta estilo di bida, trabao, manera di bista of kico cu ta.”
