(AP) — Papa Leo XIV a renoba su yamado diadomingo pa un alto al fuego inmediato den Gaza, pidiendo e comunidad internacional pa respeta ley internacional y e obligacion pa protege ciudadanonan.
“Mi ta yama un bes mas pa un fin inmediato di e barbaridad di e guera aki y pa un solucion pacifico di e conflicto,” e pontifice a bisa na final di su oracion Angelus di diadomingo for di su retiro di berano den Castel Gandolfo.
Leo tambe a expresa su “profundo tristesa” pa e atake di Israel riba e unico iglesia Catolico den e franha di Gaza diahuebs, cual a mata tres persona y a herida 10 otro, incluyendo e cura di e parokia.
“Mi ta haci un apelacion na comunidad internacional pa cumpli cu e ley humanitario y pa respeta e obligacion pa protege ciudadanonan, como tambe e prohibicion di castigo colectivo, uso indiscrimina di forsa, y desplasamento obligatorio di e pueblo,” Papa Leo a agrega.
E bombardeo riba e Iglesia Catolico di Sagrada Familia den Gaza tambe a causa daño na e tereno di e iglesia, caminda centenares Palestino tabata busca refugio contra e guera entre Israel y Hamas, cu ta drentando su di 21 luna awor. Israel a expresa arepentimento pa loke nan a describi como un accidente y a bisa cu nan ta investigando.
“Nos mester dialoga y bandona arma,” Papa Leo a bisa mas tempran riba e mesun dia, despues di lidera e misa den e Catedral di Albano cercano.
“Mundo ya no ta tolera guera,” Leo a bisa reporteronan cu tabata wardando p’e pafo di e catedral.
Ora nan a puntr’e tocante su yamada telefonico diabierna cu prome minister di Israel Benjamin Netanyahu, Leo a bisa: “Nos a insisti riba e necesidad pa protege lugarnan sagrado di tur religion.”
E Papa lo keda den e Castel Gandolfo te diahuebs anochi, pa despues e bolbe pa su residencia den e Vaticano, segun un vocero di e Vaticano a bisa diadomingo.
