Ayera mainta a tuma luga otro bunita parada escolar di algun scol di districto di Oranjestad cu a uni y a celebra en grande nan parada di carnaval. E muchanan di Arco Iris Kleuter School, Scol Paso pa Futuro, Prinses Amalia School y Reina Beatrix School a gosa ariba e cayanan di Aruba.
E parada tabata yena cu ambiente, creatividad y fantasía y cada scol tabatin un tema cu nan a luci riba caminda. E muchanan di Arco Iris Kleuterschool a bay cu e tema di ‘fantasia di Circo’. E muchanan a disfrasa di payaso, bailarina, contorsionista, presentador, malabarista y hopi mas y e creatividad a sobresali durante parada.
Prinses Amalia School tabatin e tema ‘Encanto’ y den e grupo por a mira diferente mucha disfrasa di e diferente personahenan di e pelicula, Mirabel, Isabella, Bruno, Luisa, Dolores entre otro y tambe tabatin un bunita mini carosa riba caminda inspira ariba e fantasia di e personahe Isabella.
E muchanan di Scol Paso pa Futuro a luci e fantasia di color cu e slogan ‘Paint the difference’. Y Reina Beatrix School, representando nan logo, a bay cu e color oranje y tur mucha a decora nan t-shirt cu pluma, stenchi y hopi creatividad tambe.
Parada a sali for di veld di cricket y a termina na e veld di RCA. Den un ambiente carnavalesco, compaña pa e banda Buleria, tur mucha a gosa di principio te fin y ta bunita pa remarca cu hopi hende a bin apoya e muchanan y a para na banda pa wak tur e muchanan jump sin fin.
