Tur dia prijsnan ta sigui subi!

Aña 2025 lo wordo recorda como Aña cu pueblo su cartera a haya castigo di prijsnan halto tur caminda. Segun central bureau statistiekprijsnan di comestibles a subi asina hopi cu ni come na cas y ni come pafor ta barata mas. Un tin caminda mas pa scapa pa sla di prijs y pueblo no tin escape! Como si fuera poco aña 2026 ta habri cu aumento di prijs di pan. Un kipashi tabata costa 5 florin den 2025 y riba e promer dia di januari 2026 lo costa 5.75 florin, un aumento di 15%!

Den luna di November 2025, prijsnan di Food &Catering services a subi cu 0,4%compara cu October 2025. Asina, e tendencia ascendente ta sigui, despues di un subida di 0,1% den e luna anterior. Asina CBS ta informa. Tanto e costo di cuminda na cas como esun pa come pafo di cas a aumenta, cu ta nifica cu consumidornan casi no tin opcion pa evita subida di prijsnan. Prijsnan di cuminda na cas tambe a subi cu 0,4%. Den e categoria aki, nuebe di e 11 grupo di producto a subi. E subida mas fuerte a wordo registra na berdura, cu den un solo luna a bira 2,2% mas caro. Lechi y webo a subi fuerte tambe cu 1% mientras fruta (0,7%), bebida sin alcohol (0,5%) y sucu y cosnan dushi (0,5%) tambe a bira mas caro. E unico caida claro di prijs a wordo observa na papa y otro tuberculo, cu un caida di 1,2%. Come pafo di cas, cu ta inclui restaurant y cuminda pa hiba, tambe a bira mas caro. E categoria aki a mustra den november 2025 un subida di prijs di 0,3%. Esaki ta nifica cu tanto casnan cu ta cushina na cas como hende cu ta depende di cuminda pafo di cas ta confronta cu costo mas halto. Minister Wever a regala pueblo tambe un aumento di prijs di gas cu te awe e no a baha bek pa pueblo.

Pueblo ta drenta supermercadonan cu miedo paso e costo di bida ta asina halto cu 100 florin ta manera 10 florin. Nos pueblo a wordo priminti pa e gobierno di Avp-Futuro cu lo tin alivio, cu costo di bida lo baha y cu frigidairenan lo ta yen bek. Awe e realidad ta otro. Tanto banco central como central bureau statistiek a confirma cu prijsnan di comestibles a conoce aumentonan explosivo y pueblo su cartera ta mas bashi cu nunca.

Unda cu pueblo bira tin sla di prijs. Prijs di awa no a baha, prijs di coriente no a baha! Prijs di gasolin a wordo aumenta como regalo di Pasco di Geoffrey Wever, prijs di gas a subi y prijs di cuminda y bebida a conoce aumentonan explosivo!

E alivio cu a wordo priminti NO ta wordo sinti, al contrario pueblo ta sinti su mes traiciona y engaña. Frigidairenan ta mas bashi cu nunca, pueblo a wordo castiga cu aumento di prijs di gas y awendia pueblo su poder di compra ta sigui bay atras cu stapnan grandi. Nada ta wordo haci pa mehora poder di compra pa esnan cu ta gana sueldo minimo y esnan den clase medio.

E bestaansminimum a bolbe conoce un aumento durante aña 2025, kiermen pa famianan sobrevivi na Aruba a bira aun mas dificil y gobierno ta man crusa. Nos di MEP no ta mira cu e Gobierno aki tin ningun intencion di tuma accion pa alivia bo cartera y baha e costo di bida.

E aña aki mester bin cambio pa asina esnan mas afecta sinti alivio. Tur supermercado cu pueblo drenta nan ta mira cara di Geoffrey Wever riba shelf y a haya miedo di haci compras! Den un pais caminda gobierno tin mas di 500 miyon florin di surplus ta inaceptabel cu tanto hende ta sufri! E prosperidad no a wordo comparti manera a ser priminti!

Nota di redaccion: E articulo aki ta opinion di e autor y no ta representa opinion di Bon Dia Aruba.