Nos por corda con Partido AVP a presenta nan 10 punto di accion durante campaña cu manera nan drenta gobierno den e prome 100 dianan di gobernacion nan lo kita tur remedi riba e lista positivo y ningun hende lo mester paga pa ningun remedi mas.

Minister Wyatt Ras ta un di esnan cu a grita, instiga y priminti cu si nan drenta ningun hende lo mester paga pa remedi. Awe e realidad ta otro, awe ironia di bida ta cu e propio minister Wyatt Ras a dicidi pa keda cobra pueblo pa 92 remedi.

Pa es motibo nos a pidi un reunion publico cu minister Wyatt Ras pa asina por debati riba su mal decision cu ta perhudicando nos pensionadonan, muchanan special y te hasta hendenan cu problema cu salud mental. Tur votado riba e pais aki a wordo gaña y manipula pa e gobierno di AVP sin Futuro. Henter campaña tanto Partido AVP como Partido Futuro a haci e promesa na pueblo si nan drenta den gobierno, NINGUN hende mas mester paga pa ningun remedi.

Nan a crea e expectativa aki, hende a kere nan y awe e realidad ta otro. Awe keto bay pueblo ta pagando pa 92 remedi manera e propio minister Wyatt Ras mes a confirma a pesar cu AZV tin un SURPLUS di 106 miyon florin. Awe na aña 2025 e situacion ta diferente cu tempo AZV no tabata tin fondo. Awe AZV tin un surplus di 106 miyon florin, awe no tin ningun instruccion di Hulanda pa corta 60 miyon florin den cuido, awe no por tin ningun pero ningun hustificacion mas pa minister Wyatt Ras sigui castiga nos pensionadonan y pueblo di Aruba. Es mas pa aña 2025 e surplus di AZV lo ta 51 miyon florin y pa aña 2026 45 miyon florin.

Awe te hasta pa personanan cu limitacion fisico, hendenan special remedi ta wordo kita for di nan. Na un forma sin escrupulo minister Wyatt Ras ta pone pueblo paga pa remedinan siendo tin placa na abundancia na AZV. Pensionadonan ta yega counter na boticanan y laga remedinan atras y bay cas sin nan medicamento. Awe nos kier puntra gobierno dicon? Dicon cu awe tin tanto placa ta sigui abusa y castiga pueblo y forsando nan pa paga pa remedinan? Nos pueblo ta exigi no solamente un splicacion pero un decision di minister Wyatt Ras pa ehecuta e decision di ex minister Oduber pa percura pa NINGUN pensionado mester paga pa ningn remedi. Ta ironico cu awe net minister Wyatt Ras cu tanto tabata papia di e consecuencianan di laga hende sin remedi ta lagando pueblo sin 92 remedi cu mester paga pa nan. Un gobierno cu ta malgasta placa cu tin enbes di yuda pueblo ta un gobierno abusador.

Na un forma insolito minister Wyatt Ras no ta give a damn cu pensionadonan y ta sigui cobra pa remedinan. Aki bou tin algun ehemepel di remedinan cu pueblo ta pagando pa nan keto bay:

Paracetamol

Dica

Noscapine

Daflon

Venuroton

Fluimicil

Lozepan

Oogdruppels

Esaki ta pa menciona algun di e 92 remedinan cu NO ta wordo cubri mas y cu pueblo mester keda PAGA pa nan!

Cu un AZV cu mas di 200 miyon florin proyecta di surplus pa siguiente añanan (2025-2026) NO por acepta cu ainda ta cobra pueblo pa remedinan. Minister Wyatt Ras mester cambia e decision aki awe mes! Nan a kibra nan promesa di campaña, nan a gaña nos grandinan y nan a hunga cu nan sentimentonan! Pueblo ta exigi nan remedinan bek awor cu AZV tin placa na abundancia. Nos lo keda insisti pa cambia e decision di minister Wyatt Ras bin parlamento y cambia su decision. Ta inaceptabel cu AZV tin miyones di surplus y pueblo pagando pa remedinan.