“Mas dia pasa mas ta bira obvio cu e gobierno di Avp-Futuro a gaña tur hende, manipula tur hende y tuma tur hende haci,” Parlamentario Dangui Oduber (MEP) a skirbi den un comunicado di prensa.

Ambos partido tanto AVP como Futuro a hiba un campaña cu nan lo mehora poder di compra, reduci costo di bida, percura pa no tin inflacion y percura pa tur prijs na Aruba baha. Geoffrey Wever te hasta a bisa cu frigidiarenan na Aruba ta bashi y cu partido Futuro lo percura pa yena e frigidiarenan back. Awe despues di 9 luna di gobernacion e realidad ta otro. Awe tin inflacion, no tin caminda mas pa pueblo sconde pa sla di prijs di Geoffrey Wever y gabinete Avp-Futuro. Prijs di coriente NO a baha, prijs di awa NO a baha, prijs di gas a subi danki na Geoffrey Wever y prijs di comestible ta mas halto cu nunca y poder di compra ta keda bay atras drasticamente.

No ta nos ta bisa esaki sino esaki a wordo confirma pa banco central por medio di un survey cu a wordo haci pa nan. Nada menos cu 88% di consumidornan Arubano ta bisa cu nan por cumpra menos cu seis luna pasa. Esaki ta sali for di e ultimo Consumer Confidence Survey di Banco Central di Aruba (CBA) pa e segundo kwartaal di 2025. No solamente Banco central su survey a confirma esaki sino Oficina Central di Estadistica (CBS) tambe a indica cu den luna di September 2025 e poder di compra a bay drasticamente atras compara cu aña pasa September 2024.

E encuesta di banco central y e rapport di Oficina Central di Estadistica ta confirma loke nos a bin ta bisando. E situacion na Aruba no a bira mihor despues di gabinete Avp-Futuro sino a bira pio. Poder di compra a bay atras, Aruba a bira mas caro y e nivel di pobresa a bira mas grandi. Specialmente famianan y personanan cu entrada abou ta sinti e presion cada bes mas fuerte. Esaki ta wordo causa pa un aumento explosivo di prijsnan di comestiblenan, netamente loke nos ta bin ta señalando pa varios luna. Anto esaki ta un gobierno cu a priminti cu nan lo mehora poder di compra y costo di bida lo baha. Mientras pueblo ta warda pa alivio ministernan ta fiesta, ta biaha na monton, otro ta te hasta biaha den jet priva y ta sigui derocha placa di pueblo.

Minister Geoffrey Wever a bisa cu e ta traha riba un ‘’koopkrachtmodel” pa mehora e poder di compra pero pueblo si no tin pasenshi mas pa warda ki dia e modelo aki lo keda cla. Tur dia pueblo ta sinti efectonan di prijsnan na Aruba. Tarifa di awa no a baha, tarifa di coriente no a baha, prijs di gasolin NO a baha, prijs di diesel no a baha y no papia mes di prijsnan den supermercadonan.

Si tanto AVP como Futuro a bisa durante eleccion cu Aruba tawata caro, awor e situacion a bira pio! E pregunta ta keda: Kico nan ta bay haci pa alivia pueblo?

Nota di redaccion: E articulo aki ta opinion di e autor y no ta representa opinion di Bon Dia Aruba.