Parlamentario Dangui Oduber ta expresa su preocupacion pa aumento di costo di bida

Mediante un video cu miembro di fraccion MEP parlamentario Dangui Oduber a comparti riba su pagina di Facebook e ta expresa su preocupacion pa e aumento di costo di bida. E parlamentario ta trece dilanti e aumento di comestibel den supermercado cu ta sigui aumenta drasticamente.

Den e video parlamentario Oduber ta denuncia e aumento explosivo di prijsnan den supermercado, aumento di costo bida y perdida di poder di compra. “No ta nos partido a priminti cu lo bay mehora poder di compra, mehora calidad di bida, percura pa no tin inflacion, percura pa reduccion di prijsnan den supermercado, si no ta e lidernan di partido AVP,” el a remarca.

Oduber ta splica cu despues di 80 dia gobierno ta haciendo lo contrario na loke nan a priminti. El a indica cu minister Wever a aumenta prijs di gas cu 30% y te ainda, segun e parlamentario, ainda parlamento no a haya splicacion di e motibo di esaki.

El a splica cu, entre otro, prijs di lechi a aumenta siendo cu lechi ta un producto cu ta den e canasta basico. El a subraya cu lechi no mag di aumenta di prijs y a cuestiona unda e control pa e prijsnan di productonan di canasta basico a keda. Y el a menciona cu caha di pia di galiña a aumenta cu 40% tambe y e siman aki tambe tabatin aumento den prijs di gasolin.

“Nos ta puntra nos mes kico e gobierno aki di AVP sin Futuro ta haciendo proactivamente pa di berdad mehora e poder di compra, pa percura cu no tin inflacion, pa percura cu ta baha prijs,” el a bisa.

Parlamentario Oduber a indica cu algun siman atras el a haci e pregunta na minister Wever den parlamento, na cual e minister a indica cu mester duna un poco mas di tempo y espacio ya cu e momento ey gobierno tabatin apenas 60 dia den gobernacion.

El a enfatisa cu como parlamentario e ta trece e denuncia aki dilanti pa motibo cu despues di 80 dia “tur hende ta birando mas pober” y cu a pesar di e campaña cu e partidonan a hiba primintiendo cu lo mehora calidad di bida y baha costo di bida, prijsnan ta sigui aumenta.

Por ultimo, e parlamentario a remarca cu pueblo ta sufriendo y fraccion MEP ta haci e denuncianan aki pa pone gobierno tuma accion y cumpli cu nan promesanan.