Recientemente ex-minister di Turismo y miembro di fraccion MEP, parlamentario Dangui Oduber a manda un carta cu un lista di pregunta pa actual minister di Turismo, Transporte y Labor, Wendrick Cicilia (AVP), relaciona na e iniciativa di gobierno di Aruba pa cuminsa un dialogo nacional cu e sector di turismo.

E carta cu parlamentario Oduber a manda pa minister Cicilia ta consisti di un total di 29 pregunta. E parlamentario a puntra e mandatario di e por duna un splicacion kico ta e motibo cu prome minister Mike Eman ta esun cu ta lidera e dialogonan aki, y si no ta e minister di Turismo ta esun cu mester lidera temanan di turismo.

Oduber a pidi minister Cicilia tambe pa informa Parlamento di Aruba ken ta dicidi riba e maneho di ministerio di turismo conforme e Landsverordening instelling ministeries; si a prome minister Eman of su persona como minister di turismo.

Parlamentario Oduber a indica cu e impresion ta ser crea cu prome minister Eman ta esun cu ta encarga cu turismo. El a puntra e mandatario si e por amplia riba reparticion di tareanan pa loke ta trata turismo.

E parlamentario ta indica tambe cu minister Cicilia a menciona cu lo kier crea un community based tourism model. El a puntra e mandatario si e por comparti e modelo aki cu Parlamento di Aruba.

Parlamentario Oduber ta trece dilanti den su lista di pregunta cu minister Cicilia a menciona cu e kier para e crecemento desproporcional di turismo. Relaciona cu esaki el a puntra e minister si tin un plan di accion concreto elabora cu lo para e crecemento desproporcional cu ta referi na dje; y alabes a puntra si e mandatario por comparti e plan aki cu parlamento.

Oduber ta puntra minister tambe si tin decision(nan) cu el a tuma caba pa para e crecemento desproporcional di turismo cu e ta referi na dje, y si e por comparti esaki(nan) cu Parlamento di Aruba.

E parlamentario ta indica cu minister a menciona cu e prosperidad di turismo mester yega den tur cas na Aruba, y cu e lo percura pa turismo yena e frishidernan na Aruba. Den esaki el a puntra minister Cicilia si tin un plan di accion concreto tocante con lo bay haci esaki, si e por comparti e plan aki cu Parlamento di Aruba, y si e por informa Parlamento cual ta e pasonan cu a ser tuma caba, y

Parlamentario Oduber a menciona cu minister Cicilia a indica cu e ta kere firmemente den un balansa den turismo y naturalesa, medio ambiente y bienestar general. El a puntra e mandatario si e tin un plan di accion concreto of un maneho delinea con lo percura pa crea e balansa aki, y si e por comparti e plan of maneho aki cu parlamento.

Alabes el a puntra e minister si e por informa parlamento cual ta e accionnan cu ya el a tuma pa salvaguardia e naturalesa, medio ambiente y bienestar general.

E ex minister di turismo ta indica cu Aruba su turismo ta yegando su capacidad maximo pa loke ta trata e cantidad di bishitante. El a puntra minister Cicilia con e lo percura pa Aruba su turismo keda uno sostenible y exitoso, y cual ta e vision cu e mandatario tin pa adresa esaki.

Parlamentario Oduber ta menciona cu como ex minister di turismo el a laga un maneho atras pa para tur construccion di hotelnan irespecto si nan tin nan permisonan na ordo pa sigui construi. El a pidi minister Cicilia si e por informa na parlamento si lo continua cu e maneho aki of si e lo desea di continua cu construccion di mas camber di hotel.

Oduber a puntra minister Cicilia si e ta pro of contra construccion di 240 camber adicional di hotel di Iberostar na Tierra del Sol, si e ta pro of contra construccion di 600 camber mas di hotel di Iberostar na Eagle Beach, y si e ta pro of contra construccion di 600 camber mas di hotel di Secrets Hotel.

E parlamentario a trece dilanti cu como ex minister di turismo el a laga atras un ley cu, Landsverordening instelling Aruba Quality and Hospitality Authority (AQHA), pa regula vacation rentals y institui Aruba Quality Hospitality Authority. El a puntra e mandatario si e ta sostene e iniciativa di ley aki.

Alabes el a puntra ki dia por spera cu e ley importante aki lo ser trata den parlamento, si e no ta considera urgente pa trata e ley aki, y si e por informa parlamento cuanto mas mester warda pa trata e ley aki.

Parlamentario Oduber a puntra minister Cicilia si e por comparti cu Parlamento di Aruba e vision y maneho cu e kier hiba pa turismo di Aruba, y kico ta e prioridadnan y enfoke principal pa e mandatario pa loke ta trata turismo.

Oduber tambe a puntra e mandatario como minister encarga cu labor, si e por informa parlamento si tin un plan concreto di accion tambe con ta adresa e problema cu tin den sector pa cu e escasez cu tin di trahadonan pa cierto cupo di trabou, y si den caso cu e contesta ta si, si e por comparti esaki cu Parlamento di Aruba.

Por ultimo, parlamentario Oduber a puntra minister Cicilia kico ta su maneho pa cu otorgamento di permiso di taxi, T-O, V, watersport, si e por comparti e manehonan aki cu Parlamento di Aruba, y el a puntra e mandatario, segun e, cual ta e retonan mas grandi den e sector di turismo.

Bon Dia Aruba a tuma contacto cu pers chef di Gabinete AVP-FUTURO pa puntra si por informa si minister Cicilia tin un reaccion riba preguntanan di parlamentario Oduber y si e ta pro of contra e construccion di mas camber di hotel.

Den su contesta el a indica cu minister Cicilia lo duna un respuesta dialuna, ora cu e regresa back for di su biahe.