Ayera mainta, autoridadnan encarga di haci investigacion, entre nan unidad di RST y Landsrecherche, a haci un entrada hudicial na cas di ex-minister y awor parlamentario di partido AVP, Benny Sevinger y tambe na otro luganan relaciona cu investigacionnan den e caso denomina ‘Avestruz’.

Caso Avestruz ta enfoca riba soborno, falsificacion y labamento di placa vincula na otorgamento di terenonan den gobierno di e periodo entre aña 2009 te 2017. E entrada aki ta pa motibo cu tin sospechonan cu tempo cu Sevinger tabata mandatario lo a haci cosnan cu tabata contra ley.

Sevinger a duna di conoce cu e ekipo di personanan aki a yega na su cas pa 6.30 mainta pa haci un otro bishita y busca un telefon. Manera el a indica, “el que nada teme, nada debe; mi no tin nada di sconde”.

Esaki tabata e di dos biaha cu autoridadnan y ekipo di investigacion ta haci un entrada hudicial na cas di Sevinger. El a sigura “cu no ta straño pa nan bin un biaha mas, pasobra e aña aki ta di eleccion.” E prome entrada hudicial na cas di Sevinger tabata na luna di october 2019, tempo cu el a bisa cu nan a drenta “pa busca droga, arma y computer”.

Te ainda e investigacion ta andando, pero e no tin conocemento di kico ta pasando eynan. El a duna di conoce cu e situacion aki a cuminsa for di tempo di campaña di aña 2017, na unda partido MEP a cuminsa haci denuncia. Y na momento cu nan a drenta den gobierno, e parlamentarionan di e partido aki a bay na Ministerio Publico pa haci un otro denuncia y pone presion pa traha un caso contra Sevinger.

Segun el a conta, Ministerio Publico na e momento ey a informa cu nan no tabatin suficiente hende pa haci investigacion. “Nan a bisa cu nan a pone fondonan pa trece personal di recherche di Hulanda pa haci un investigacion specificamente riba Benny Sevinger.”

Sevinger a comenta cu esaki ta trata di un persecucion politico contra su persona y cu na Aruba husticia ta ciego y no ta conta pa tur hende. El a specifica cu e no tin ningun problema pa nan haci un investigacion, pero cu “no por ta asina cu den dos aña ta haci onderzoek keto bay y awo ta busca kico mi por haya pa mi acusa e homber aki”, Sevinger a manifesta.

Ademas a keda conoci cu Sevinger presuntamente tabata bende terenonan pa empresario- y amigonan cercano tempo cu e tabata como minister di Infrastructura den gabinete di ex-prome minister Mike Eman. Di esaki el a sigura cu nan a drenta su cas pa busca “e miyones cu nan a bin busca di tereno cu a wordo bendi, caminda cu mi tambe ta busca, pero mi no a haya nada.”

Pa motibo di trabaonan di construccion cu Sevinger ta haciendo na su cas, e ta kere cu esey por ta e motibo pa e cual e ta wordo persigui. “Ami a traha e cas aki prome cu m’a bira parlamentario y tur dia mi ta trahando riba mi cas”, Sevinger a afirma.

Tambe el a trece dilanti cu tur cos ta pa motibonan politico y cu si e tabata un ciudadano mas, esaki lo no sucede, ni nunca e autoridadnan lo drenta den su cas.

2021 ta un aña di eleccion na unda comunidad tin cu scoge parlamentario-, minister y prome minister pa goberna y maneha nos pais. Di esaki Sevinger a menciona cu mirando e partido MEP con su situacion ta na e momento aki, “ta un desaster pa e pais aki cu den cuatro aña nada nan no a cumpli cune.” Ademas el a puntra con nan ta kere cu nan ta bay presenta pa eleccion asina.

Asina mes, Sevinger a nenga un biaha mas cu no tabata existi ningun dunamento di placa pa bendemento di tereno y poco poco e berdadnan ta bin dilanti. “Cuanto biaha cu nan kier bin mi cas, nan ta bonbini cualkier momento, pasobra mi no tin nada di sconde, ni placa mi tin ”, el a expresa.

Di loke ta trata e otro luganan na unda tambe a haci un entrada hudicial, Sevinger a bisa cu un di nan ta pertenece na un amigo di dje, ken e ta conoce desde algun aña caba, desde epoca di Watty Vos.

“Ta un lastima cu nan a bay eynan. Mi no sa kico nan tabata busca, pero aparentemente tur amigo y amistad cu ta di mi nan ta bay eynan pa wak si nan por haya algo”, Sevinger a sigura.

Pa finalisa, el a duna un mensahe pa comunidad den cual el a reafirma cu persecucion politico ta sigui: “Partido MEP no por gana eleccion door cu nan no a haci nada pa e pueblo aki y unico forma cu nan ta pensa cu nan por gana eleccion ta si nan tin un acusacion fuerte contra Benny Sevinger”, el a manifesta.

LEAVE A REPLY

Please enter your comment!
Please enter your name here