Mi a tuma nota cu lider di AVP Sr. Mike Eman un biaha mas ta haci mal uso di un virus cu a afecta mundo completo pa e por haya simpatia den pueblo, pa wak si pueblo aki un biaha mas por lubida den tempo corto ki daño Sr. Mike Eman y su partido AVP a haci Aruba di 2009 pa 2017 y sin conta e era di su ruman homber Sr. Henny Eman unda cu pueblo a paga debenan acumula di proyectonan di entre otro Beta Hotel y Racetrack.

Sr. Mike Eman a haci mal uso den pasado di un crisis mundial pa yega na poder

Na aña 2008 mundo completo a wordo confronta cu un crisis economico cu a afecta Aruba tambe. Entre nan subida di prijs di petrolio cu a conduci entre otro cu e refineria Valero no tabata rendabel mas y tabata rumbo pa stop di funciona. Sr. Mike Eman a dicidi haci mal uso di e crisis aki pa tira culpa riba BBO cu prijsnan a subi y sigur cu mesun lema di lastra hende cu tur hende ta ‘friends and family’.

Sr. Mike Eman a abusa di e oportunidad cu pueblo a dun’e

Despues cu a gaña pueblo cu lo reduci BBO, lo hiba un finanzas sostenibel, lo crea un vision berde cu lo crea 1600 cupo di trabao y lo habri e refineria, tur esakinan a resulta di ta un fracaso total. BBO a ser redobla, finanzas di Aruba a conoce un crecemento desproporcional unda cu nos debe a bay di 43% pa 93% di nos GDP, vision berde a crea algun miyonario nobo entre nan Sr. Richard Arends, Citgo tabata un fracaso total pero si a sirbi solamente un grupo pa enrikece nan mes.

Banda di esaki e gobernacion a caracterisa su mes pa corupcion unda un minister a wordo condena y un otro cu muy pronto lo aparece dilanti corte. Siguramente tambe a conoce lasonan cu hendenan cu awendia ta cera pa corupcion entre nan Sr. Rincon cu a haci donacionnan grandi na Sr. Mike Eman su campaña unda a duna diferente transaccionnan di $50.000 y pa despues den 2 dia ex Minister Sevinger a otorga miles di metro cuadra na tereno comercial na e persona aki. Banda di esaki nos isla a conoce un deterioracion social hamas antes bisto y sigur unda awe por pasa ainda y wak cuanto edificio di scol a keda den super mal estado.

Un biaha mas Sr. Mike Eman y AVP kier maluza un virus pa yega na poder

Sr. Mike Eman y AVP ta kere cu e pueblo aki ta uno ignorante, unda cu un biaha mas kier maluza di un virus cu a causa morto, a crea desempleo y sigur a afecta entrada di nos hendenan.

Awor Sr. Mike Eman kier papia di reconstrui, pero awe nos ta biba su mal maneho di 2009 pa 2017 cu a destrui e pais aki haciendo esaki uno vulnerabel cu no lo a wanta ningun crisis mas y awo pueblo di Aruba ta bibando e consecuencia di esaki.

Lamentablemente Sr. Mike Eman ta aplica e filosofia di Machiavelli unda cu bo tin di haci todo por todo pa yega na poder, pues si tin di gaña, manipula, cumpra hende entre otro y ora yega na poder ta wak tambe con por sigui maluza fondonan y poder pa keda na poder. Y e tipo di pensamento aki di AVP y Sr. Mike Eman a haci awe cu Aruba ta den e situacion precario aki.

Mientras cu Gabinete Evelyn Wever-Croes ta haciendo lo maximo pa yuda entre otro cu fase, loonsubsidie, ayudo na comercio y tambe a bin cu alivio fiscal pa trata na yuda pa wanta e impacto di Covid-19 pa asina por brinda e oportunidad di recuperacion, Sr. Mike Eman y partido AVP ta hunga cu sentimento di hende cu ta pasando momentonan dificil.

Mi ta kere cu ta bon pa pueblo puntra e pregunta cardinal na Sr. Mike Eman, mirando cu nos ta pasando den un tempo dificil asina unda cu no tin placa pa come y unda clubnan deportivo ta bati na portanan cu no tin placa pa sponsership, ta di unda Sr. Mike Eman y AVP ta saca placa pa tene tur e cumbrenan na hotel? Of ken ta e sponsor superpoderoso cu ta yuda nan? Y sigur Sr. Mike Eman tin 3 aña sin trabao y no ta riba fase; ta ken ta sponsor Sr. Mike Eman of el a spaar suficiente di locual el a saca di cartera di pueblo di 2009 pa 2017?

LEAVE A REPLY

Please enter your comment!
Please enter your name here