Despues cu ex parlamentario y lider di fraccion di PPA den Parlamento di Aruba, Otmar Oduber a anuncia su retiro temporal, a bira conoci cu Sr. Eduard Pieters, candidato number dos riba lista di PPA durante eleccion, lo asumi e responsabilidad. Dialuna atardi Pieters a huramenta oficialmente como miembro di Parlamento dilanti di Su Excelencia, Gobernador di Aruba Alfonso Boekhoudt.

Den un entrevista cu Bon Dia Aruba Pieters ta conta su sentimentonan, con e ta prepara pa continua cu e trabou cu Oduber a inicia y con e ta prepara pa representa PPA den Parlamento di Aruba.

“Despues di tur e emocionnan pa varios dia caba cu mi a cana cune cu a culmina cu mi para dilanti di Gobernador, mi tin un sentimento di alegria pasobra mi tin e honor di por sirbi mi pais despues di un eleccion na december caminda nos a saca un asiento,” el a expresa.

El a splica cu desde maart e tabata cana banda di Oduber como consehero principal di fraccion di PPA. “Mi ta sinti hopi orguyoso di por sirbi mi pais na un posicion publico dentro di e organo mas halto di Aruba,” el a enfatisa.

Pa hopi aña Pieters ta traha como empleado publico. El a cuminsa como maestro di scol, despues el a traha na SKOA, y despues na Departamento di Enseñansa tambe. “Semper mi tabata un sirbido publico y aworaki mi ta sirbi publico pero como parlamentario. E ta un honor pa sirbi bo pais di e forma aki,” el a agrega.

Pieters a expresa tambe cu ta sinti un sentimento di gratitud cu Oduber a deposita su confiansa den dje pa e por sigui lidera fraccion di PPA den parlamento. “Mi ta hopi agradecido pa e oportunidad aki y su confiansa. Tur e lunanan aki cu mi a cana banda di dje mi a siña masha hopi mes, y awor e lo cana banda di mi. E lo duna mi mi espacio si, pero e semper lo t’ey pa duna mi palabra di aliento, di sosten y conseho,” el a indica.

Tocante e topico di Ley di Reino di Conseso HOFA Pieters a sigura cu como lider di fraccion di PPA e lo sigui cana den mesun liña cu ex parlamentario Oduber. El a remarca cu PPA ta un partido cu ta un team y aunke en berdad Oduber ta e cara y lider di e partido, e postura pa loke ta trata e Ley di Reino ta di full partido PPA. “Otmar ta parti di dje, ami ta parti di dje, candidatonan ta parti di dje, bestuur ta parti di dje. Ora cu e tabata sali y papia, e tabata papia tambe na nomber di fraccion y di e partido,” el a indica.

El a ratifica cu e lo cana den e mesun liña cu Oduber a cuminsa cune. Y pa loke ta specificamente su caso, el a splica cu e cartanan cu fraccion a skirbi, e nota di minoria cu a ser entrega pa loke ta HOFA, tur documento, e hunto cu Oduber a traha. “Ta imposible pa cambia e rumbo di nos posicion den parlamento pa loke ta trata e HOFA,” el a remarca.

El a splica cu fraccion di PPA a caba di entrega un peticion pa tene un seniorenconvent riba e tema aki pasobra nan ta considera HOFA un topico hopi delicado y como fraccion di PPA nan ta keda para riba e punto cu Aruba no necesariamente mester di un Ley di Reino di Consenso pa loke ta finanzas publico.

El a sigui splica cu Ley di Reino di Consenso ta algo y nan ta aplaudi e posibilidad den Reino Hulandes cu por tin Ley di Reino di Consenso. El a indica cu tin Ley di Reino di Consenso cu ta sublime cu ta yuda combati narcotrafico y cu ta yuda cu corupcion cual nan ta aplaudi, pero di otro banda e Ley di Reino di Consenso, manera por ehempel den e caso di HOFA, cu no ta positivo.

Parlamentario Pieters a indica cu PPA su opinion ta cu tin suficiente instrumento huridico den e Statuto pa por mantene supervision desde Reino Hulandes cu no mester di ley riba nivel di Reino.

Anteriormente fraccion di PPA a manda un nota di minoria den cual nan a splica detayadamente pakico Aruba no mester di un Ley di Reino y a hasta presenta alternativanan. Un di e alternativanan cu e fraccion a presenta ta cu si Reino Hulandes ta preocupa pa e supervision, ta hinca e normanan di finanzas publico den Constitucion local cu e ora ta haci cu dos tercera parti di Parlamento lo mester vota pa por haci cambio den e normanan aki, y no un partido mayoritario so por haci e cambionan aki.

“Nos si ta kere cu nos por sigui cu supervision, pero supervision basa riba nos Statuto. Nos ta di opinion cu nos no mester di un HOFA pa haci esaki,” el a enfatisa.

Pa loke a trabou y efecto cu PPA lo eherce den parlamento, specialmente mirando cu e fraccion tin un asiento so, Pieters a splica cu a pesar di e hecho cu PPA tin un asiento so den parlamento, loke e fraccion a bin ta haciendo “ta netamente pa haci un impacto grandi den comunidad.” El a subraya cu e movemento cu fraccion tin aworaki, e programanan cu nan ta sacando, ruedanan di prensa caminda nan ta informa pueblo ta yuda nan tin un impacto grandi na pais Aruba.

E parlamentario a splica cu pais Aruba tin necesidad pa haya informacion y p’esey fraccion di PPA su enfoke riba esaki ta pa duna pueblo informacion basa riba leynan, maneho, Statuto di Reino Hulandes den caso di Ley di Reino por ehempel.

“Nos ta percura pa sigui informa pueblo sigui ta den pueblo, sigui papia cu hendenan den pueblo pa por tin un impacto. Manera ami semper ta bisa nos ta un petalo di Rosa cu ta cay den un lama y ta causa olanan grandi. Berdad e petalo di rosa ta un asiento den parlamento, pero lo bay traha olanan grandi cu nos lo yega comunidad pa den un proximo eleccion comunidad lo sa di sostene nos.

El a indica cu PPA tin un plan “Nos Aruba 2050” caminda for di parlamento e lo percura pa trece puntonan importante, punto hopi determinante pa yuda gobierno ehecuta e puntonan cu ta hopi importante pa Aruba su desaroyo. Nos ta yuda ehecuta e plan den oposicion.

Un punto importante den tur esaki, parlamentario Pieters a subraya, ta e colaboracion cu tin den e team di PPA y cu e team ta sigui crece. “Hopi ta pensa cu Otmar no lo ta den politica. Al contrario, e lo keda, pero aworaki el a tuma e decision basa riba principio, dunando balor na Parlamento di Aruba como un di e pilarnan di trias politico y p’esey el a entrega su asiento pa e por atende su asuntonan personal,” el a indica.