Eduard Pieters, miembro di Parlamento pa fraccion di PPA, a lansa un advertencia fuerte pa Parlamento di Aruba, relaciona cu e forma con e Presidente di Parlamento ta manehando e proceso di democracia parlamentario.

Segun Pieters, ta un falta di respet grave y grandi, cu henter Parlamento ta ignora peticion formal di e gremionan sindical y comercial cu ta representa e voz di un cantidad grandi di trahador Arubiano.

E bosnan di trahador ta keda sin oido

Pieters a referi na e dos cartanan cu e 13 gremionan, esta e representantenan di e trahadornan di sector publico y priva, a manda na Presidente di Parlamento pa haya oido riba e tema di Rijkswet HOFA. “E prome carta nan a indica nan posicion pa loke ta Rijkswet y pa duna nan proposicion pa hacie un otro forma cu no ta Rijkswet.

Sinembargo dialuna merdia, esta 10 di november, Pieters tambe a ricibi un carta di e peticion di e gremionan, unda nan ta pidi Encuentro Publico cu Parlamento completo, pa e gremionan por expone nan postura na e cas di pueblo.

Tanto Pieters di PPA como fracion di MEP a trece e punto aki dilanti como un punto di ordo, pidiendo Presidente di Parlamento pa suspende e reunion pa asina por scucha e gremionan tambe, pero a nenga totalmente e peticion aki. “Ta hopi lamentabel,” segun Pieters, “cu e gremionan, cu ta un parti integral y crucial di nos sistema democratico, Parlamento ta djis cera e porta pa nan. Nos ta lubida cu ta trata aki di e trahadornan balente, cu ta hiba Aruba dilanti tur dia.”

Un Parlamento autoritario y cu deficit parlamentario

Pieters a bisa cu e argumento di e Presidente di Parlamento tabata, cu tur fraccion a sinta caba cu e sindicatonan, cual no ta berdad! “PPA a sinta cu nan den luna di juni, juli y october pa traha riba un Frente Nacional,” el a recorda. “Fraccion di MEP tambe a sinta cu nan apart, pero ni AVP ni FUTURO a haci esey. Nan nunca a scucha di cerca kico ta biba bou di e trahadornan cu nan ta representa.”

Pieters a recorda cu na 2008, durante e lucha di indexering, e trahadornan di tur sector a uni y a pone Aruba plat. “Nos no mester bolbe na esey, pero si nos ta nenga derecho basico di participacion, ta cla cu nos no ta siña les di nos propio historia.”

Fraccion di PPA ta para firme cu e gremionan y ta sostene nan peticion pa un debate publico, cu ta ofrece espacio pa e bosnan di trabou y di pueblo Arubiano den Parlamento.

Eduard Pieters a conclui cu un apelacion cla: “Democracia no ta solamente vota pa un ley, democracia ta scucha e pueblo.” El a insisti cu el no lo keda trankil, mientras Parlamento ta cera nan porta na e representantenan di e trahadornan. Pa Pieters y PPA, respet pa voz di pueblo ta fundamental di nos nacion. “Si nos no scucha pueblo, con nos por yama nos mes Parlamento di Aruba?”

Nota di redaccion: E articulo aki ta opinion di e autor y no ta representa opinion di Bon Dia Aruba.