Parlamentario Eduard Pieters (PPA): Nos ta realmente honra nos historia di 40 Aña Status Aparte y 50 Aña Himno y Bandera?

Diaranson Aruba ta celebra dos momento historico cu ta defini nos identidad como pueblo: 50 aña di nos Himno y Bandera y 40 aña di nos Status Aparte. Dos simbolo poderoso cu no a origina djis pa ceremonia of discurso bunita. Nan a nace for di lucha, conviccion y sacrificio di un pueblo cu a dicidi pa para riba su mesun pia. Pero e pregunta cu nos mester haci awe ta uno serio: Nos ta realmente compronde loke e simbolonan aki ta nifica?

Recordatorio di nos lucha

“Nos bandera y nos himno, Aruba Dushi Tera, no ta solamente un tela y musica cu nos ta canta durante ceremonia. Nan ta un recordatorio di amor profundo pa nos tera, pa nos cultura, pa nos identidad. Y exactamente 40 aña pasa, Aruba a logra un conkista historico: Status Aparte dentro di Reino Hulandes. E posicion constitucional unico aki no tabata un regalo. No tabata un fabor di niun hende. Tabata un resultado di decada di lucha politico, social y cultural. Tabata e pueblo di Aruba cu a lanta su bos pa bisa: ‘Aruba kier ta baas den su mesun cas’. Pero un celebracion sin reflexion, ta perde su significado”, Eduard Pieters a expresa.

Status Aparte un responsabilidad di nos tur

Nos Status Aparte no ta solamente un historia pa celebra cada 18 di maart. Nos Status Aparte ta un responsabilidad diario pa proteha nos autonomia, nos democracia y nos derecho pa tuma decision pa nos propio pueblo. “Como miembro di Parlamento di Aruba y representante di fraccion di Partido Patriotico di Aruba (PPA), mi no por celebra e fecha aki sin tambe manda un alerta. Pasobra un pueblo cu a lucha pa autonomia na Aruba y autodeterminacion den Reino, no por despues entrega esaki paso a paso, decision pa decision. Nos antepasadonan no a lucha pa Aruba bira un pais cu ta warda permiso pa tuma decision pa su propio pueblo. Nan a lucha pa un Aruba cu tin su propio bos, su propio orguyo y su propio responsabilidad”.

Di cua libertad nos lo referi den nos himno

Den nos propio Himno Nacional nos canta un frase profundo: “Cu Dios por guia y conserva su amor pa libertad.” Segun Pieters: “Esakinan no ta palabranan bunita pa canta durante ceremonia y despues lubida nan significado den e decisionnan politico. E ta un promesa cu nos a haci como pueblo. Y mi kier puntra awe: con nos por sigui canta tocante amor pa libertad, si poco poco nos ta perdiendo e libertad ey door di e decisionnan politico manera e ley di consenso HOFA?

Nificacion di nos Autodeterminacion

Segun Pieters, ta bon pa nos para keto un rato cu autodeterminacion no ta un palabra bunita pa djis pa ora di discurso politico. Autodeterminacion ta e derecho pa tuma decision pa bo pueblo. Autodeterminacion ta e derecho pa controla bo propio destino basa riba bon gobernacion. Y si nos no ta alerta, si nos no ta proteha e conkista aki cu conviccion, nos ta core e riesgo pa perde poco poco loke e generacionnan anterior a gana cu lucha incansabel. E bandera cu nos ta hisa, mester keda recorda nos cu Aruba tin dignidad. E himno cu nos canta awe, mester keda recorda nos cu Aruba tin alma. Pero dignidad y alma di un pais no ta mantene su mes. E ta pidi liderazgo, conviccion y curashi.

Nificacion di ta un berdadero Arubiano?
“Ta un berdadero Arubiano no ta solamente hisa bandera riba dia di celebracion. Ta un Arubiano ta compronde historia di nos pueblo, honra lucha di nos lidernan y para firme pa proteha autodeterminacion di nos pais,” Eduard a enfatisa.

Pueblo di Aruba a lucha cu sanger, sodo y determinacion pa logra Status Aparte. E conkista aki no ta propiedad di ningun gobierno, ningun partido ni ningun politico. Status Aparte ta propiedad di pueblo di Aruba. Y pueblo so tin e derecho pa dicidi su futuro.

“Awe nos ta celebra 40 aña di autodeterminacion den Reino. Pero mas importante ainda, nos mester puntra nos mes: Nos ta protehando e legado aki? Of nos ta permiti cu poco poco nos ta perde y bay bek na un estilo colonial moderno? Aruba no ta solamente un isla. Aruba ta un pueblo cu a lucha pa su dignidad. Y si nos kier honra nos Himno y Bandera, nos mester para firme pa e principio cu a crea nos pais: Ta baas den nos mesun cas!

Nota di redaccion: E articulo aki ta opinion di e autor y no ta representa opinion di Bon Dia Aruba.