Durante un conferencia di prensa cu a tuma lugar ayera mainta lider di fraccion di PPA parlamentario Eduard Pieters a toca diferente punto. Un di e puntonan cu e parlamentario a trece dilanti ta e situacion cu un grupo di maestronan pensionado a trece dilanti cerca e fraccion.

Pieters a splica un grupo di maestro pensionado a acerca fraccion di PPA pa trece dilanti nan situacion incomodo. “Fraccion di PPA ta e fraccion cu ta para firme tras di e maestronan y ta p’esey nan tin e confiansa pa acerca pa trece nan dolornan pa dilanti,” el a remarca.

E parlamentario a splica cu e grupo di maestronan pensionado a expresa cu nan ta ser trata diferente y cu nan ta sinti cu nan ta ser discrimina entre e maestronan cu no ta pensionado. El a indica cu e grupo di maestronan aki a bisa cu for a kita e pago di ATV-dagen cu maestronan ta ricibi, mientras cu maestronan cu no ta pensionado si ta ricibi e pago aki. Esaki, segun e parlamentario a sucede durante gobernacion di Gabinete Wever-Croes II.

Pieters a remarca cu e maestronan aki ta traha pa medio di nan directiva di scol pasobra aunke nan ta pensionado, e directiva ta haya cu nan ta apto y profesional pa traha, locual el a enfatisa ta nifica cu no por trata nan diferente. “Bo no por discrimina nan pasobra nan ta pensionado, mester trata nan igual,” el a subraya.

El a splica cu e motibo cu a bin cu e Arbeidstijdverkorting (ATV) ta pasobra basta aña atras na momento cu tabatin e problema di indexering, gobierno a bisa cu no por indexeer e maestronan e salario di tal forma y e ora scoge pa duna nan den dianan liber, locual a bira e ATV-dagen.

E parlamentario a sigui splica cu tur empleado publico tin ATV-dagen cu ta compensa e perdida di compra. Pero pa loke ta trata e maestronan pensionado, el a remarca cu aunke nan ta cu pensioen, e dunador di trabou, cu ta ser subsidia pa gobierno, a bay di acuerdo pa tuma nan den dienst y e ora no por kita nan e derecho cu nan tin di ricibi e pago di nan ATV-dagen.

Parlamentario Pieters enfatisa cu fraccion di PPA ta bay haci preguntanan clave pa drecha e punto aki pasobra “no por discrimina hende pasobra nan ta di color, of pasobra bo ta di religion, of pasobra bo ta un pensionado. Nos ta biba den un estado di derecho. Nos Constitucion ta basa riba igualdad, esey ta nifica cu e pensionadonan aki cu a ser emplea pa un dunador di trabou mester ser trata honestamente, dignamente y mester bringa pa nan derecho.”

Segun Pieters a indica durante e conferencia di prensa, durante e gobernacion di Gabinete Wever-Croes a kita e pago di ATV-dagen. Bon Dia Aruba a tuma contacto cu ex prome minister y actual parlamentario lider di fraccion di MEP, Evelyn Wever-Croes pa puntra si en berdad durante su gobernacion a kita e pago di ATV-dagen.

Parlamentario Wever-Croes a splica cu ex minister di Enseñansa Endy Croes a confirma cu Directie Onderwijs cu e decision ey a ser tuma tempo di Gabinete Mike Eman II. “Un decision di ex minister Angel Bermudez, den su afan pa baha gasto di personal. Endy a purba cambi’e, pero a haya demasiado resistencia, y a dicidi di reevalua full e structura di pago di docentenan, incluyendo pensionado. Lamentablemente el ser baha como minister un aña pasa, y no por a finalisa e trabou. Pues parlamentario Pieters ta equiboca,” el a declara.

Pa loke ta trata e situacion den sector di enseñansa en general y maestronan, Pieters a sigura cu gobierno y parlamento por haci mas. El a splica cu pa loke ta e aspecto salarial, ta conoci cu tin combersacionnan andando entre sindicato cu gobierno, pero segun e parlamentario esaki a pega pasobra minister actual di enseñansa a bisa cu no por priminti nada, mester wak kico ta e espacio cu tin pa por logra yega na un solucion.

Pa loke ta e seguridad den klas, el a indica cu segun e por a compronde a baha e cantidad di mucha pa cada klas. Esaki, el a indica, ta un cambio positivo ya cu awendia e muchanan ta duna mas reto na e maestro, y e decision pa baha e cantidad di mucha den klas ta duna e maestro un tiki mas oportunidad pa yuda e muchanan den klas.

Parlamentario Pieters a remarca cu loke si ta keda un pregunta ta con ta bay yuda e maestronan cu nan propio salud, tanto salud mental como salud fisico. “Traha cu mucha no ta un trabou facil, maestronan ta sufri no solamente cu e muchanan cu tin diferente tipo di trastorno di desaroyo awendia, pero tambe cu muchanan cu na cas no ta haya e educacion corecto of educacion diferente,” el a indica.

Aki, el a menciona, tin tres aspecto cu ta hunga un rol. Uno ta e ayudo psicologico profesional pa e maestro, di dos ta tambe e parti di profesionalisacion di e maestronan tocante con pa anda cu muchanan cu ta un poco dificil y ta reta e maestro, y di tres tambe ta con pa anda cu mayornan.

“Educacion di un mucha no ta den man di maestro so, e ta den man di comunidad, e ta den man di e mayor y maestronan. Hunto nos por logra. Si nos ta keda kere cu maestronan por haci milager, e no ta bay sucede. E maestro por ta e catalisador pa por yuda e mayor cu educacion na cas y ta sigur cu e por sigui desaroya optimalmente den e scol,” el a agrega.

Parlamentario Pieters a enfatisa cu tin hopi reto den caminda y loke tambe ta conoci y ta hunga un rol, papiando di su experiencia den e area di enseñansa, ta cu tin hopi maneho entrega y aproba, pa ex minister Lampe, pa ex minister Endy Croes y aworaki pa minister Gerlien Croes.

El a enfatisa cu den tur esaki e punto cardinal ta cu no por yega benta tur cos afo y cuminsa di nobo. “Enseñansa ta un area cu ta hopi importante pa tin continuidad. Si haci demasiado cambio, e maneho por cay den otro. Si no tin continuidad, si tur hende ta benta tur cos un banda pasobra ta bin cu un maneho nobo, enseñansa no lo cambia,” el a subraya.

Pieters a agrega cu pa logra cambio den enseñanza, tur hende mester wak den e mesun direccion y pa esaki sucede, el a indica, mester lidernan cu ta inspira di tal forma cu no ta obliga hendenan pa cambia y ta haci cu nan ta wak e necesidad pa un cambio pa sirbi nan pais di un manera, pa sirbi e mucha y mayornan miho.

“Mester di lidernan cu ta inspira hende, lidernan cu ta consecuente, cu ta tuma e trabou di nos profesionalnan na serio. Tur hende mester wak den un solo direccion y traha segun meta y segun exigencianan di calidad pa drecha e sistema di enseñansa. Nos no ta eynan ainda, pero e prome stap ta pa tur hende wak den e mesun direccion,” el a finalisa.