Parlamentario Endy Croes “ta lamenta masha hopi algun expresion di [minister di Enseñansa, Deporte y Relacionnan di Reino], Gerlien Croes (AVP), cu el a expresa siman pasa net promer cu el a sali pa Paraguay,” segun un comunicado di prensa.
Minister Gerlien a realisa su di 3 biahe riba custia di pueblo den apenas 4 luna di trabou y ta conta cu 30 dia den exterior den 120 dia di trabou. Na su salida pa Paraguay recien Gerlien a declara den prensa algun preocupacion den enseñansa cual nos lo ripiti awe y lo reacciona riba nan.
Necesidad pa educador ta hopi grandi
Gerlien Croes a splica cu e necesidad pa educador ta hopi grandi. Algo cu Gerlien a descubri apenas awor. Comokiera cu constantemente Gerlien ta den exterior y kisas no a pone atencion debido na esaki y awor finalmente e ta biba cu e realidad berdadero di Aruba. Ta algo cu for di basta tempo ta conoci den e veld di enseñansa. Bo trabao como minister ta pa bin cu solucion.
Hopi docente ta sali for di veld of ta bay traha duna les na otro pais
Gerlien Croes a declara tambe den prensa cu hopi docente ta sali di e veld bay haci algo otro y tin hopi ta bay duna les na otro pais, manera entre otro Bonaire. Segun Gerlien como cu e salario pafor di Aruba ta mas aantrekkelijk y e condicionnan ta mihor. Pues palabranan di Gerlien. Nos ta reacciona puntrando Gerlien Croes ta den cual mundo e ta biba? Hustamente Gobierno anterior Gabinete Wever Croes 2 a traha riba un structura di salario nobo pa docentenan y a laga esaki cla pa un conseho final na DRH. Mira bo ‘overdrachtsdocument’!
‘Adviescommissie’ Restructuracion Salarial di Maestro
‘Aviescommissie’ aki di cual SIMAR a forma parti a traha desde november 2023 riba un conseho pa e minister anterior. E conseho final aki ta firma pa tur experto incluso SIMAR. Nomber di e documento ta ‘Leerkracht Beter Betaald, Onderwijs Beter Behaald’.
A laga esaki cla cu 4 opcion pa por scoge for di dje. Desde Juli 2024 e documento aki tabata na DRH pa conseho final pa asina por ehecuta un decision momento aña escolar nobo 2025-2026 inicia. Opcion 1 ‘gelijktrekking’ varios schaal cu lo costa rond 4.6 miyon plus despues di ‘gelijktrekking’ un aumento di 4% pa tur schaal cu un costo di 6.7 miyon. Total esaki lo costa gobierno 11.3 miyon pa aña. A laga 500 miyon florin di surplus den caha pa por ehecuta esaki.
Kico ta e problema real cu ainda Gerlien no por a duna poco mas atencion y contenido real na esaki? Gerlien kisas ta demasiado den avion? Por a nota cu den 4 luna di trabao como minister, Gerlien a biaha na 3 ocasion. A bay Hulanda, Republica Dominicana y actualmente ta na Paraguay, mientras scol ta den habri y e salario di docentenan no a wordo regla.
Parlamentario Croes ta lamenta e forma di traha di Gerlien Croes y a bisa cu poco mas boluntad, amor y pasion pa bo trabao bo por a logra esaki pa e aña escolar 2025-2026.
No obstante esaki, Gelien Croes a corta 2.9 miyon den enseñansa 28 di maart 2025 momento e coalicion nobo a aproba e presupuesto 2025. Mas tristo ta cu actualmente den presupuesto complementario cu ta na Parlamento y lo wordo trata awor den luna di augustus, Gerlien ta bay corta otro 3 miyon den enseñansa, hustamente den salario di docentenan. Ta yega ora pa Gerlien duna cara di berdad na docentenan. Modela y saca selfie kisas ta bon pa bende bo mes, pero banda di esaki trabao di minister ta pa tuma decision y ehecuta un plan. Nos lo keda haci nos trabao pa controla gobierno y informa pueblo.
Nota di redaccion: E articulo aki ta opinion di e autor y no ta refleha opinion di Bon Dia Aruba.
