Parlamentario Endy a reacciona riba tratamento di ley di LAFT cual a tuma luga diahuebs ultimo den parlamento di Aruba. Mike Eman y AVP, debi na un maneho financiero di gobernacion di mal calidad, a wordo frena na aña 2014 mediante un KB esta un Koninklijk Besluit.

Si pueblo ta corda Hulanda dia 11 di juli 2014 a prohibi gobernador pa firma presupuesto 2014 cual por cierto tabata hopi laat. Un deficit di 9.3% di e debt to GDP, esta un buraco di mas di 400 miyon florin. Pa Mike Eman y AVP e fiesta mester a continua. Por corda compania Horizon Consultancy di e propio Richard Arends a strica 4 miyon for di saco di pueblo pa conseha Mike Eman. “Pisca cu Pushi”.

Ley LAft contra constitucion
Tur esaki a desemboca cu Mike Eman a bay bao di un palo cu un welga di hamber batiendo wea pidiendo gobernador pa “firma awor”.

Nos tur por corda e show aki acompaña cu bebemento di Ensure scondi den anochi. Hulanda a bin cu un protocol 2 di mei 2015 cual protocol a haya un bida propio cu ‘wettelijke grondslag’ momento cu Parlamentarionan di AVP dia 27 di augustus 2015 tur a grita na fabor pa asina pasa un ley contra nos constitucion, contra consehonan di Raad van Advies y te hasta Raad van State mas despues tambe a vocifera su mes cu esaki ta contra constitucion.

Manipulacion cu informacion
Diahuebs ultimo sinembargo Richard Arends tabata e unico orador di AVP den sala di parlamento.

Otronan manera Dowers, Benny Sevinger, Mike de Meza, Mervin Wyatt Ras, lider di Fraccion Marlon Sneek tur a cobardia y no a hiba ni un solo palabra. Pues nan no tabata apto pa defende un ley cu nan mes a introduci. Desde cu a aproba e ley aki na 2015 AVP a entrega un parti di nos  Status Aparte riba e aspecto financiero. Richard ‘Horizon’ Arends den su ‘betoog’ a splica cu na 2014 AVP a haci un ‘eenmalig overdracht’ na APFA y esaki a causa cu e debt to GDP a alcansa 9.3%, esta un deficit di mas di 400 miyon florin pa aña 2014. Parlamentario Endy Croes ta lamenta masha hopi con despues cu Mike Eman y Richard Arends cu partido AVP a ruina Aruba na un manera sin escrupulo ainda Richard den Parlamento kier manipula pueblo cu informacionnan incorecto. Parlamentario Endy Croes den su ‘betoog’ a lansa e pregunta mesora den direccion di AVP.

Debe extra di 2.2 Biyon
Endy Croes a presenta un tabel oficial di Banco Central unda tin cifranan extra oficial al respecto deficitnan causa pa AVP den cada aña di nan Gobernacion.

Na aña 2010 manera AVP a sinta, AVP a percura pa un deficit di 189 miyon. Pues mester a presta 189 miyon pa cera e buraco den presupuesto di placa cu AVP tabata malgasta extra cu no tabata tin. Na aña 2011 esaki a aumenta pa 325 miyon.

Na aña 2012 esaki a alcansa 443 miyon y Hulanda tabata hopi preocupa desde aki. Na aña 2013 e deficit tabata 333 miyon y na 2014 esaki a alcansa 406 miyon. Pues di 2010 pa 2014 den un tempo record Mike Eman y AVP a crea un debe extra pa pais Aruba di 1.7 BIYON esta 1700 miyon florin y ainda tabata falta e tempo aya 2015, 2016, 2017 unda e debe a surpasa 2.2 BIYON extra cual tin e stempel y seya di Mike Eman y AVP. Parlamentario Endy Croes no por compronde e actitud y splicacion infantil di Richard Arends tratando di haci nechi locual e sa masha bon cu no ta asina. Mega debe tin nomber y fam: Mike Eman y AVP. Richard Arends manera un discipulo di Mike Eman y AVP kier hunga comedia barata pa purba scapa nan curpa.

Parlamentario Endy Croes a termina bisando cu ohala hendenan di AVP cu a hinca Aruba den e debacle financiero aki por tin un tiki curason y poco honor pa ta sincero cu pueblo en bes di continua cu e politica di mentira y manipulacion.

 

LEAVE A REPLY

Please enter your comment!
Please enter your name here