Parlamentario Endy Croes cu hopi atencion a atende un presentacion di WEB Aruba N.V. Durante fin di siman. WEB pushando padilanti cu intencion serio pa sigui baha e uzo di heavy fuel oil esta (HFO) mas y mas pa futuro. Desde 2005  WEB tabata uza rond 6200 bari di fuel pa dia, a logra baha esaki cu introduccion di plantanan di RECIP y SWRO (2006, proyectonan di MEP ) enadelante te cu awor na 2018 cu 40%.

Esaki ta un rebaho di rond 6200 bari di fuel pa dia pa 3700 bari pa dia. Intencion ta pa sigui den un siguiente fase esta core plantanan riba LNG den futuro cercano y baha mas ainda e cantidad di 3700 bari di HFO pa rond 2000 bari pa dia y kisas mas abou. Locual a sali hopi cla durante e presentacion aki cu WEB nunca pero nunca a para pa e vision cu Mike Eman a bende pueblo y manipula rond mundo cu su idea esta cu pa 2020 Aruba lo ta liber di fossil fuels (HFO).

Mike & Mike, politiconan gañado.
Mike Eman y Mike de Meza den nan publicacion 2020 Vision Green Deck a dedica gran parti di esaki den combinacion cu expertonan pa manipula pueblo atrobe. Pakico mi ta bisa esaki? Pasobra awor e ta hopi cla cu declaracion di WEB y otro expertonan cu nan nunca a para tras di esaki como cu pa 2020 esaki sigur no tabata posibel. Mike Eman den e publicacion di su gobernacion “2020 Vision Green Deck” a haci uzo di Harvard University, University of the district of Columbia, Rocky Mountain Institute y Carbon War Room, e ultimo aki di Richard Branson kende tambe a ranca miyones di pueblo y hunto asina  tuma pueblo haci chambon cu su vision. Esaki a crea espacio pa Mike Eman y Mike de Meza chica WEB miyones cu tur tipo di Green Conferences creando un “smoke screen” cu su vision. Declaracion di e experto Mike de Meza “Aruba has set its goal to become 100% independent of fossil fuels by 2020”. Declaracion di Mike Eman textualmente “This approach was crystallized in the 100% sustainable energy target 2020”. Ambos politico a gaña pueblo haciendo mal uzo di nan poder politico pa crea storia pa hinca nos compania di Utilidadnan den debe y saca placa pa amigo for di nan.

Politica di mentira y manipulacion.
Henter e storia y sprookje di Roodkapje aki a resulta un engaño total. Esaki awor a wordo confirma pa WEB mes cu nunca pero nunca WEB a kere den e vision aki di Mike pasobra nan tabata na altura cu esaki no ta berdad. Pakico un politica di mentira y manipulacion asina grandi? AVP no solamente ta un partido corupto te den su higra pero traves di mentira kier a yega bek na poder un biaha mas. Pueblo mester ta consciente cu e hendenan aki a causa pueblo hopi daño. No solamente financia publico nan a laga total los, pero poco poco ta wordo agrega riba nan lista cu cada dia ta wordo desenmascara. Aruba awor ta den bon man y WEB ta trahando bek den libertad cu e realidad converti den nan vision pa futuro. Aruba por keda pendiente pasobra cu e cambionan pa LNG den futuro cercano Gabinete Evelyn Wever Croes na su tempo debido lo anuncia un rebaho den prijs di awa y coriente. Berdad ta cu desde a drenta a haya e prijs di coriente na 0.37 cen pa Kwh y no a cambia esaki aunke prijs di petroleo mundial si a cambia a percura pa absorba esaki pa pueblo y pa 2 aña straight e prijs a keda mescos. Gobierno lo sigui traha duro pa pronto bin cu un anuncio hopi beneficioso. No mas mentira, no mas manipulacion, No mas AVP.

 

1 COMMENT

  1. Que hubo nos laga nomber di oposishon bai, cuminza na un sistema POSITIVO cu e pueblo aki. Den tur cos den bida, tin un banda positivo: mente positivo, curpa positivo. Ban laga e pasado bai cu biento y cuminza un bida nobo, respirando aire di SPERANZA. Dos palabra pa awe: positivo y speranza. Mundu ta yena cu mal noticia y esey ta crea desesperashon y depreshon: nos tin mester di boost up nos isla chikito. No mester di alcohol ni droga pa hende haya e happy place cu nan ta rondia, nos mester stimula otro cu mentalidad positivo: cos ta malo, nos ta bai surpase! Nos tin un mega debe, nos ta bai page: nos tur mester muri un dia, nos ta bai resusita huntu cu Cristo! Pa tur problema tin un salida, ban sonrei, nos ta na bida!

LEAVE A REPLY

Please enter your comment!
Please enter your name here