Lider di Fraccion di MEP Evelyn Wever-Croes a manda ayera un carta oficial na Gobernador di Aruba pa expresa su preocupacion grandi riba e falta structural di contesta di gobierno riba preguntanan di e Parlamento.
Cifranan mas reciente di relato oficial di Parlamento ta mustra cu di e 2.275 preguntanan cu miembronan di Parlamento a haci, solamente 585 a wordo contesta. Esaki ta nifica cu 75% (1.684 pregunta) a keda sin contesta. Segun Wever-Croes, esaki ta un falta grandi di transparencia y un falta di respet cu gobierno mester mustra pa Parlamento y pa pueblo.
“No ta solamente cifra,” segun Wever-Croes. “Ta trata di tema crucial di importancia pa comunidad, y cu Parlamento mester mas informacion pa por haci su trabao. E hecho cu preguntanan asina importante ta keda sin contesta ta inaceptabel.” Wever-Croes tambe a pone atencion riba e hecho cu peticionnan di fraccion di MEP pa convoca reunionnan tampoco no a ser atendi. E ta enfatisa cu esaki ta contra nos Constitucion y Reglamento di Ordo di Parlamento di Aruba.
Den su carta, Wever-Croes a menciona Articulo 32 di Constitucion di Aruba, cu ta stipula cu ministernan ta individual y colectivamente responsable na Parlamento. Ademas, Articulo 62, di tres paragraf di Reglement van Orde di Parlamento ta obliga gobierno pa contesta preguntanan entrega dentro di un tempo rasonable. Pues e fayo structural den duna contesta ta un violacion di e provisionnan aki.
Ademas, e ta nota cu Articulo 62 di Constitucion y Articulo 46 di Reglement van Orde ta prescribi cu Parlamento tin derecho pa convoca reunion y cu gobierno tin obligacion di cumpli. No cumpli cu e obligacion aki ta daña e principio di separacion di poder.
Wever-Croes ta continua bisando cu “Parlamento ta e institucion par excellence cu ta representa pueblo y ta supervisa gobierno. Ora pregunta di Parlamento ta keda sin contesta consistentemente, ta mina seriamente e rol supervisor aki.”
Tocante e reunionnan cu fraccion MEP a pidi cu no a haya contesta, Wever-Croes a menciona cu tabata bay tocante “topiconan di gran importancia publico – manera e progreso di e landspakket, negociacionnan cu gobierno di Reino, aumento di prijs, acusacionnan contra minister Gerlien Croes tocante e desaparicion di 14 miyon florin, e provision di informacion tocante screening ministerial, y e disponiblidad di remedi.” Wever-Croes ta nota cu no duna informacion ta conduci na un falta di transparencia inaceptable tanto pa Parlamento como pa comunidad.
Cu su carta, Wever-Croes ta pidi Gobernador pa percura cu gobierno cumpli cu su obligacion constitucional di informa Parlamento. “Solamente cu transparencia y respet pa Parlamento nos por restaura e confiansa di pueblo den nos democracia y nos estado di derecho,” el a conclui.
