Fraccion di MEP a expresa critica fuerte riba e decision di Presidente di Parlamento pa nenga e reunion planea diabierna ultimo cu College Aruba Financieel Toezicht (CAft). CAft ta bin Aruba dos biaha pa aña, y ta reuni dos biaha pa aña cu Parlamento. E biaha aki, Presidente di Parlamento a cancela e reunion, pasobra un delegacion di 10 parlamentario ta na Hulanda.
“Tabatin 11 miembro di Staten presente na Aruba y e vice-presidente por a dirigi e reunion. Asina mes nan a tuma e decision pa no tene e reunion. Asina nos di fraccion di MEP a keda sin e oportunidad pa haña informacion crucial di CAft,” segun lider di fraccion di MEP Evelyn Wever-Croes.
Segun fraccion di MEP, e decision aki ta sigui un tendencia preocupante desde cu e gobierno di AVP y Futuro a tuma mando 6 luna pasa. “Nos ta bibando den un cultura den cual e Gobierno no ta duna informacion, preguntanan di miembro di Parlamento no ta wordo contesta, presidente di comisionnan fiho di Parlamento ta purba censura fraccion di MEP, y peticionnan pa reunion publico ta wordo ignora. Den esey, cancela e reunion aki cu CAft ta parce hopi riba censura y ta debilita e rol di control di Parlamento,” Wever-Croes a bisa.
Fraccion di MEP ta pidi presidente di Parlamento pa evita ripiticion: “Parlamento no mester wordo kita for di e proceso. Transparencia ta e base di nos democracia.”
