Ayera, Parlamento di Aruba a reuni pa trata asuntonan di belasting y desaroyo di economia. Despues di e reunion, lider di Fraccion MEP, Evelyn Wever-Croes a critica e actitud di minister di Asunto Economico, Geoffrey Wever (Futuro) na momento di contesta pregunta, y tambe a expresa duda y critica tocante su maneho.

“Awe nos ta den reunion riba temanan di belasting y con pa desaroya nos economia,” Wever-Croes a bisa riba rednan social. “Minister a anuncia 4 areglo di incentivo di belasting pa comerciantenan y pa esnan cu ta gana mas di 150 mil florin. Awe nos ta bay vigila si e gobierno ta sigui riba e rumbo financiero responsabel of ta cuminsa kibra e fundeshi financiero cu nos a traha asina duro riba dje.”

Despues, Wever-Croes a conta cu el a haci minister Wever “como 75 pregunta riba 4 nota di maneho cu el a

introduci dia 1 di januari 2026,” indicando cu “e minister a contesta ni mitar, anto bastante irita cu el a haya tanto pregunta.” Critica a bay tambe pa presidente di parlamento, Marlon Sneek (AVP), kende segun Wever-Croes “no a hasi nada tampoco. Jammer.”

“Ami a huramenta pa vigila gobierno, mi trabao no ta suppose di irita ningun minister,” Wever-Croes a indica. “Mi a pidi 8 estudio di impacto financiero, social y economico di e 4 manehonan, e minister kiermen cu nan no ta necesario. Ay no. Asina si no por. Ken cu ta por goberna asina, pero mi a kere cu e minister aki tabata mas serio. E notanan di maneho a wordo bon prepara pa nos profesionalnan, pero minister Geoffrey Wever su vision y curashi ta limita. Jammer,” el a finalisa bisando.

Despues di e reunion den parlamento, Wever-Croes a continua cuestionando e decisionnan di minister Wever, incluyendo su decision pa introduci un “tax holiday” pa comerciantenan di cierto area.

“Minister Geoffrey Wever a DICIDI: comerciante den Playa y San Nicolas so ta haya “tax holiday” pa 10 aña si nan drecha nan edificio. Comerciantenan den Savaneta, Santa Cruz, Paradera y Noord no ta haya e mesun beneficionan. Pakico? Pasobra e a dicidi. Sin haci un estudio, sin consulta cu Parlamento. E so a dicidi!” Wever-Croes a finalisa.