Diaranson anochi den un transmision en bibo a traves di su plataformanan social ex prome minister y actual parlamentario lider di fraccion MEP Evelyn Wever-Croes a reacciona riba diferente declaracion cu minister di Husticia, Integracion y Transporte Publico, Arthur Dowers a haci relaciona cu e topico di companianan estatal, specificamente e topico di cambio den Hunta di Comisario di Utilities Aruba N.V. y Good Corporate Governance.

Manera ta conoci anteriormente fraccion MEP a laga sa publicamente cu nan ta bay tene ministernan Arthur Dowers y Rene Herde personalmente responsabel pa 5 miyon florin extra den gasto di interes cu nan ta causando den companianan WEB Aruba N.V. y N.V. ELMAR, pa motibo di cambionan cu a ser realisa den e Hunta di Comisario cu lo por tin como consecuencia e boet di interes aki di 5 miyon florin pa aña.

Minister Dowers a reacciona riba e critica di fraccion MEP y a splica cu tin diferente investigacion ta tumando luga den e companianan di utilidad pa mira si loke e gobierno anterior a haci tabata cu un interes general y no un interes pa un grupo specifico.

“Mester mira si loke nan a haci ultimo añanan door di nombra nan famia, amigonan, mitar di partijraad di MEP den e organisacionnan aki, si nan a traha na interes di e comunidad, si nan a haci tur loke ta posibel pa percura e miho condicionnan a ser garantisa pa e financiamento cu nos ta haya y si e interes di e pueblo y di e organisacion aki tabata para central of si e interes di cierto grupo tabata para central pa nan por gana mas tanto placa posibel,” minister Dowers a indica.

Den su transmision en bibo parlamentario Wever-Croes a reacciona riba e declaracionnan di minister Dowers. Mirando cu e situacion ta draai rond di e tema di Good Corporate Governance tambe, e parlamentario a duna un splicacion di kico Good Corporate Governance ta. El a splica cu Good Corporate Governance ta reglanan di bon gobernacion cu ta delinea con un gobierno tin cu atende cu su companianan estatal.

“P’esey e ta importante, mirando e servicio importante cu nan ta duna, pa sigura cu nan ta ser maneha na un forma drechi na un forma corecto pa asina nos ta sigur cu nos por haya e servicio,” el a remarca.

El a indica cu Good Corporate Governance ta algo mundial y institutonan manera IMF y Banco Mundial ta exigi cu paisnan ta bin cu reglanan di Good Corporate Governance pa asina sigura cu e companianan estatal ta ser bon maneha y sigura cu e decisionnan cu ta ser tuma ta bon y cu e servicionan cu ta duna por continua y cu no ta perde servicionan aki cu ta asina necesario.

Parlamentario Wever-Croes a splica cu ora cu Gabinete Wever-Croes a drenta gobierno na aña 2017 tabata net ora cu e caso Ibis a bin dilanti y tempo cu Avestruz a cuminsa. “Tabata tempo cu tabatin asina tanto corupcion den gobernacion cu pueblo a pidi pone atencion riba integridad y pa haci algo pa caba cu corupcion,” el a señala.

El a sigui splica cu un di e cosnan cu nan a bin cune pa caba cu corupcion tabata introduccion di Good Corporate Governance code den companianan estatal.

El a indica cu prome cu e introduccion di e corporate governance code a haci un evaluacion pa mira unda cada compania ta para internamente y kico ta reglanan cu cada compania tin caba pasobra varios di e companianan tabatin nan propio reglanan di corporate governance pasobra nan tabata haci fiansanan grandi caba y basa riba e fiansanan aki e banconan tabata exigi cierto rekisitonan cu nan por a cumpli cune solamente cu e corporate governance code. Den caso nan no tabata cumpli cu e reglanan di Good Corporate Governance nan no tabata haya fiansa di banco.

Pa loke ta su reaccion directo riba e declaracionnan di minister Dowers, parlamentario Wever-Croes a indica cu e mandatario a bisa algun cos interesante y a admiti tambe cierto cosnan.

 

Segun e parlamentario, minister Dowers a admiti cu el a yega “bula cabes” di hende cu tabata traha den compania estatal sin papia cu nan pa wak si tin algo cu a bay fout, pero cu el a kita nan simplemente pasobra e [minister Dowers] no tabata gusta e hendenan pasobra nan lo a ser nombra tempo cu MEP tabata den gobierno.

“El a kita hende drechi y a pone hende di reputacion dudoso. Den su declaracionnan el a admiti cu e la haci esey sin haci investigacion ni papia cu e hendenan cu el a kita,” el a indica.

Wever-Croes a splica cu e ley di Good Corporate Governance no ta bisa cu no por kita hende, por kita hende pero mester sigui un procedura cuminsando cu mester tin un motibo valido pa kita un persona y ora tin un motibo valido mester sigui e procedura cua ta inclui, entre otro, cu mester busca aprobacion di banconan.

El a splica cu den e caso specifico aki door cu banconan a laga sa ora nan a presta Utilities placa, cu si Utilities kier cambia director of cambia miembro di Hunta di Comisario, Utilities mester consulta previamente cu e banco.

Esey, e parlamentario a remarca, ta den e acuerdo cu Utilities tin cu e banco. El a indica cu den e acuerdo ta bisa tambe cu e banco mester duna aprobacion prome cu nombra un persona nobo.

“Awe el admiti cu el a apunta hendenan sin papia cu banco sin cana procedura y eynan e problema ta sinta. El admiti cu el a kita hende drechi pa cambia nan pa hendenan di reputacion dudoso,” el a subraya.

Wever-Croes a indica tambe cu e mandatario a admiti tambe cu banconan no a acepta e nombramento di e miembronan pasobra pa banco tambe e situacion ta straño.

E parlamentario a splica cu ora cu banco no acepta e candidato cu gobierno a pone, e banco ta bin cu un boet di interes pasobra nan ta den default y mester paga extra interes. E boet aki di 5 miyon florin pa aña.

Parlamentario Wever-Croes a sigui splica cu minister Dowers no a bisa kico ta su plan, pero cu el a bisa cu e ta spera cu e banconan no yega asina leu di bay cobra e placa aki.

El a splica cu banconan ta bay cobra WEB y ELMAR 5 miyon florin extra pa aña na interes y si e fiansa ta 20 aña ta papiando di 100 miyon. “E 100 miyon aki kere mi cu nan ta bay hink’e den e prijs di awa y coriente cu pueblo tin cu bay paga y esey ta algo cu nos no ta haya husto. P’esey nos a bisa nos tene Arthurs Dowers personalmente responsabel pa e 5 miyon aki pa aña,” el a indica.

El a agrega cu no ta solamente minister Dowers, pero tambe minister Rene Herde, ken awor ta minister encarga cu energia, pasobra e tin e posibilidad pa corigi e situacion, pero y laga tur cos manera e ta. Ademas el a menciona cu minister Geoffrey Wever tambe ta responsabel pasobra minister Wever ta e minister encarga cu Good Corporate Governance y no ta haci nada.

“Mi ta hopi decepciona pasobra nos a hiba un gobernacion cu ami ta considera un gobernacion hopi serio, un gobernacion cu a logra cosnan grandi pa Aruba, pero nos no a tene cuenta cu cosnan lo por bay asina malo cu un gobierno cu lo drenta pa goberna den un forma asina malo. Nos a traha hopi duro, nos a traha e fundeshi pa e pais aki por sigui desaroya , sigui bay pa dilanti como pais cu ta respeta su mes y awor bo ta haya cu e hendenan ki ta bin cu maneho con cu ta,” el a enfatisa.