Riba rednan social por a tuma nota di informacion cu ta circula indicando cu parlamentario di fraccion Futuro, Gino Goeloe a ser reemplasa como lider di fraccion den Parlamento di Aruba. Na su luga lo a nombra su colega parlamentario Ruthlyn Lindor.
Pa algun dia caba por a mira informacion ta circula tocante posible reemplaso di lider di fraccion di Futuro, parlamentario Gino Goeloe. Fraccion di MEP, entre otro, a publica informacion señalando cu sr. Goeloe a ser reemplasa como lider di fraccion.
Eleccion di 2024 ta prome biaha cu parlamentario Goeloe ta subi un lista politico despues di a traha pa hopi aña como director di Fundacion Wit Gele Kruis. Parlamentario Goeloe tabata number tres riba lista di partido Futuro y a logra ricibi 297 voto.
Segun informacion, su colega parlamentario Ruthlyn Lindor a ser nombra como e lider nobo di fraccion. Esaki ta di dos biaha cu Lindor ta participa den eleccion. Na aña 2021 Lindor tabata candidato number cinco riba lista di partido RAIZ y a logra 170 voto . Den eleccion di 2024 Lindor a ricibi 176 voto.
Bon Dia Aruba a purba tuma contacto cu parlamentario Goeloe, como tambe minister Gerlien Croes, lider y fundador di partido Futuro, pa asina puntra si e informacion aki ta corecto, y den caso cu e ta corecto, si por splica e motibo pakico a remplasa parlamentario Goeloe como lider di fraccion di Futuro. Te na momento di cierre di nos edicion no a logra ricibi contesta riba e preguntanan aki.
