Atrobe nos ta celebra dia di Betico dfm y awor cu e conocemento y gozo cu COHO, un ley cu netamente lo a atraca nos libertad autonomo ta pa pasado. E ideologia cu tanto e lider inmortal aki a lucha pe, esta pa nos ta baas den nos mes cas, awe ta wordo experiencia den e era nobo aki.

A pesar cu hopi hobennan di e generacion nobo no ta completamente consciente di e lucha di Betico dfm pa motibo cu polarisacion politico semper a stroba pa su historia wordo conta na scolnan, awe mi ta spera cu lo ta un dia cu nos lo refleha, ariba su lucha y resultado cu a trece un gran balor pa nos pais Aruba. Ta pa motibo di a logra uni nos pueblo, bringa pa un status autonomo cu a saca nos for di bou di Antias, a habri porta pa awe nos tin un pilar economico turistico, cu ta un di esnan mas fuerte y exitoso den Caribe henter. Naturalmente hopi otro lidernan a aporta den e lucha, y otronan a sigui construi riba e logro grandi aki, pero nos no por lubida cu pa motibo di Betico dfm su perseverancia nos a logra bolter e blachi otro banda pa un comienso nobo na 1986.

Betico Croes, ta un estadista Arubano cu te cu awe ainda ta inspira nos. Mi deseo ta cu nos por comparti tur e storia documenta na un manera mas actual pa e generacion aki, pa nan tambe por disfruta di dje. Full e siman aki nos lo ta bishitando scolnan no pa conta storia di un partido politico, sino di un persona, un Arubiano cu a destaca y sirbi su pais di un manera formidabel. Te cu awe bo por nota e impacto cu su decision y pasonan tuma aña atras tin riba nos pais, nos partnernan den Reino Hulandes y tambe nos pueblo, y nos tin di comunica esaki na e studiantenan di awe. Personalmente mi ta convivi cu e ideologia y pensamento cu Betico dfm a presenta, esta esun di: ta sincero den bo intencion, y no haci nada pa bo propio interes. Algo cu den e era moderno ta birando un scarsedad y hopi dificil pa haya. Cu esaki mi no kiermen cu na Aruba no tin, sigur cu si, Arubianonan ta hende noble y servicial. Pero si nos no tene cuidou y inculca esaki mas fuerte e lo por sigui disminui.

 

Aruba a conoce diferente politico, di diferente partido. Ami personalmente ta tin admiracion pa defunto sr. Watty Vos, defunto sr. Benny Nisbet y tambe pa awe pensionado sr. Nelson Oduber. Tur di nan na nan mes manera a impacta e mente y curason di nos pais y nos mester siña cu como pueblo pa brinda nan e respet, apesar di nos pensamento politico pa nan esfuerso y tempo dedica na sirbi Aruba y su comunidad. Si nos madura den un pensamento cu ta traspasa politica, Aruba lo ta mas grandi y mas fuerte aun y segun mi, ta p’esey Betico dfm su mensahe tawata uno cu ta bay riba politica, y tambe riba un partido. Su mensahe a etala ariba un nivel mas halto, un mensahe cu a busca pa uni un pais y conscientisa nan di e potencial cu ta scondi den nos suela.

Aruba por ta orguyoso di por a produci un yiu cu a sa di carga su pais, un lider cu den tur honestidad a splica den pleno campaña na su pueblo e seriedad y retonan su dilanti, a pesar di core e risico di perde un eleccion. Un persona cu a pone tur su tempo y esfuerso, pa logra e meta di un status nobo pa su pais. Awe, no solamente nos pero henter Reino Hulandes y region Latino Americano ta bon na altura di kende ta Betico y ken ta Aruba.

Awo nos tin e dificil tarea, pa mescos cu esnan cu despues di dje cu a percura di practica e ideologia aki, pa continua y aplica e ideologia di uni, respeta, lucha y sacrifica pa logra progreso pa Aruba su bienestar. Di curason ta mi deseo pa nos comunidad y nos hendenan aplica e balornan aki cada oportunidad cu presenta. Aruba, pabien awe riba dia di Betico!

LEAVE A REPLY

Please enter your comment!
Please enter your name here