Durante e conferencia di prensa semanal di fraccion AVP, Parlamentario ing. Carlos Bermudez a subraya e importancia di e paso historico cu Aruba a tuma den e redestinacion di e tereno di refineria na San Nicolas.

Bermudez a referi na e anuncio haci diasabra ultimo door di Prome Minister Mike Eman, hunto cu Prome Minister demisionario di Hulanda, Dick Schoof, tocante e cooperacion entre Aruba y Hulanda pa desmantela e instalacionnan di refineria, sanea e tereno y crea un base pa un futuro nobo pa Aruba.

“E refineria a contribui significantemente na nos economia pa mas cu shen aña,” Bermudez a bisa. “Pero nos ta na un punto caminda e modelo di ayera no por sostene e futuro cu Aruba merece.”

Segun Bermudez, ta momento pa Aruba sigui cu su transicion energetico pa haci nos isla menos dependiente di Heavy Fuel Oil, un transicion cu, lamentablemente, no a haya e atencion necesario bou di e dos gabinetenan anterior.

E parlamentario a enfatisa cu gobierno di Hulanda ta comparti e vision pa un transicion energetico y desaroyo sostenibel pa Aruba. Como parti di esaki, Hulanda a pone €53.6 miyon na disposicion pa fortalece e red di corriente, pa por maneha un cantidad mas grandi di energia alternativa.

“Esaki no ta solamente un acto di cooperacion tecnico-financiero,” el a aclaria. “Esaki ta un acto di confiansa den e direccion cu Aruba ta tuma bou di liderazgo actual.”

Bermudez a referi tambe na e mocion presenta den augustus 2025 door di colega parlamentario ing. Mike de Meza, cu a propone pa desmantela e refineria y converti e tereno pa uzo comercial, cultural y industrial. “Nos mocionnan no ta bay den lachi,” Bermudez a bisa. “Den apenas algun luna, nos ta mira accion concreto. Esaki ta e manera cu gobernacion eficaz mester traha.”

El a agrega cu den Plan di Gobernacion 2025–2028 ta contempla un buskeda proactivo di inversionista pa introduci actividadnan innovativo, entre nan bitcoin mining y fintech, un sector cu ta atrae hopi hubentud y talento creativo.

“Si nos kier retene nos hubentud na Aruba, nos no por sigui pensa manera ayera. Nos mester habri caminda pa innovacion, pa creatividad y pa progreso real. E futuro no ta den pasado — e ta den nos curason, nos vision y nos balentia pa traha pa nos metanan awe.”

Nota di redaccion: E articulo ta opinion di e autor y no ta representa opinion di Bon Dia Aruba.