Miembro di Parlamento, Jennifer Arends-Reyes a informa mediante un comunicado di prensa, cu “despues di reflexion profundo y consideracion serio”, el a tuma e decision pa no acepta e oferta pa bira e proximo Minister Plenipotenciario di Aruba na Hulanda.

“Mi ta sumamente honra di a ser acerca y considera pa un posicion asina importante. E hecho aki ta pa mi, un gran reconocemento pa mi trayectoria politico y profesional,” Arends-Reyes a bisa den e comunicado. “Mi kier gradici tur persona cu a expresa nan apoyo y a duna mi nan voto di confiansa cu mi por cumpli esey cu dignidad y excelencia,” Arends-Reyes a bisa.

Sinembargo, despues di haya hopi conseho y analisa e situacion di reto cu nos pais ta enfrenta actualmente, Arends-Reyes a conclui cu su lugar ta aki na Aruba. “Mi compromiso y responsabilidad ta pa sigui traha pa bienestar di Aruba, incluyendo asuntonan importante pa nos studiantenan den exterior y asuntonan di reino cu ta importante pa e futuro di Aruba.”

Como lider di fraccion di AVP den Parlamento, Presidente di Comision di Turismo y tambe Presidente di Relacionnan den Reino y Asuntonan Exterior, Arends-Reyes ta tuma su rol cu seriedad y dedicacion. “E tareanan aki ta fundamental pa e desaroyo di nos pais. Mi kier mira mi metanan bira realidad – mi kier sigui traha banda di mi coleganan y mi pueblo pa logra un progreso integral pa Aruba.”

Segun e comunicado, e decision pa keda Aruba no ta uno tuma facilmente, pero cu un profundo sintimento di responsabilidad y amor pa su pais. “Mi lo a haci mi maximo esfuerso pa Aruba for di Hulanda y dedica na temanan cu ta cerca di mi curason cu energia y determinacion tambe, pero mi ta sinti cu actualmente, mi ta mas necesario aki mes, den medio di nos pueblo trahando pa un y tur ,” el a conclui.

Representacion di votadornan

E decision di parlamentario Arends-Reyes ta refleha dos aspecto di e realidad politico di Aruba.

Di prome, e hecho cu un politico cu keda eligi den Parlamento tin e deber di representa su votadornan. Parlamento ta encarga di controla e trabao di gobierno, y tin derecho y habilidad pa haci pregunta y haya informacion relevante tocante diferente aspecto cu ta afecta e ciudadanonan di Aruba. Na momento cu e ciudadanonan pone confiansa den un politico, nan ta spera cu e politico ey lo ta den Parlamento defendiendo nan interesnan. Na momento cu e politico scoge un otro posicion, e ta laga su votadornan sin representacion parlamentario.

E decision di parlamentario Arends-Reyes ta mustra su interes den cumpli cu su votadornan door di keda den Parlamento en bes di bay mesora pa un posicion ministerial na Hulanda.

Olvido na Hulanda
 Di otro banda, di punto di bista politico, e posicion di Minister Plenipotenciario na Hulanda ta bira un sorto di “out of sight, out of mind”, unda e politico ta keda leu di mente di pueblo, y esaki por tin consecuencia negativo pa su carera politico. Kedando na Aruba, e ta keda traha y keda den mente di su votadornan, y ta haya oportunidad pa cumpli cu su promesanan di campaña of profila su mes miho pa un siguiente eleccion.

Minister Plenipotenciario
 E posicion di Minister Plenipotenciario na Hulanda ta keda bashi. Den e proceso di formacion, tabatin indicacion cu e intencion tabata pa Rene ‘Baba’ Herdé ocupa e posicion aki pa Gabinete AVP-FUTURO. Sinembargo, despues cu no a logra nombra Mike de Meza como minister di Integridad, Energia y Telecomunicacion, Sr. Herdé a keda nombra como minister di Integridad, Energia y Medio Ambiente. Cu esaki, a laga e posicion di Minister Plenipotenciario bashi. Te awo, no ta conoci ken ta e posible candidatonan pa ocupa e puesto aki.