Recientemente parlamentario John Hart di fraccion AVP durante un conferencia di prensa a trece dilanti diferente punto. Entre nan el a menciona e rapport Calidad di Bida di Hubentud Arubano, den cual el a resalta con entre otro e barionan, e ambiente den cual e mucha y hobennan ta lanta ta afecta nan, y con esaki, segun e parlamentario, a bay atras den ultimo añanan.

E parlamentario a indica cu den e rapport aki, cual Parlamento di Aruba a haya un presentacion di dje, e investigadornan ta haci un comparacion di aña 2019 te aña 2023 y segun e parlamentario tur cos a bira pio. “Pio tur cos a bira. Entre 2019 y 2023 cosnan a bira pio. Den e rapport ta papia cu barionan tin un influencia grandi den con nos hobennan ta lanta, pero e barionan ta mas sushi cu nunca,” el a indica.

El a splica cu na momento cu gobierno no ta duna atencion na cosnan simpel, manera mantencion di un bario pa e ta un bario limpi y decente, e tin un influencia riba e mucha y hobennan y ta interconecta cu cosnan manera prestacion di e mucha y hobennan na scol. El a sigui splica cu muchanan cu ta lanta den barionan asina ta lanta pensando cu e situacionnan ey ta normal, siendo cu nan no ta normal. cu esaki ta normal, siendo cu e no ta normal.

“No ta tur cos ta problema di gobierno. Tin algo na e pais aki den e mentalidad di nos como conciudadanonan, y mi ta bisa esaki como hende, nos tambe mester por kier miho y haci miho,” el a remarca.

E rapport di Calidad di Bida di Hubentud Arubano ta un proyecto di estudio nacional bou di direccion di Minister di Enseñansa y Deporte y Minister di Husticia y Asunto Social, den Gabinete Wever-Croes II. E proyecto ta basa riba algun di e cinco pilarnan di e 17 meta di desaroyo sostenibel di Nacion Uni (SDG3 & 4), cu e meta pa mapa y mehora calidad di bida y bienestar di su generacion futuro na Aruba.

Na november 2020, un piloto a ser entrega na e minister di Enseñansa di e tempo ey. Dato a ser colecta a traves di encuesta cu hubentud y entrevista, realisa prome cu COVID-19, cu profesional di enseñansa di 11 scol piloto. Den e rapport ta enfatisa cu scol ta considera como e institucion central unda experiencia y ambiente di bida di mucha ta tuma lugar. E desafionan social ta contextualisa usando e modelo di analisis di dato di Bronfenbrenner.

E estudio di continuacion aki tin como meta pa duna un bista completo y mas claridad tocante calidad di bida di hubentud di Aruba entre edadnan di 10 pa 14 aña durante y despues di pandemia. E ekipo aki ta multidisciplinario, multicultural y multi-etnico y ta conecta na Vrije Universiteit Amsterdam (VU)/NSCR y Instituto Pedagogico Arubano (I.P.A.). E meta ta implementa e resultadonan pa sigura y realisa un plan di maneho evidence-based sostenibel pa curso di bida saludabel y sigur pa hubentud.

Segun e rapport ta indica districto of barionan ta ser distingui pa cultural specifico of caracteristica socioeconomico, y casi tur e respondentenan a enfatisa e diferencianan di caracteristica di bario, manera planificacion espacial, infrastructura, contexto sociocultural y cuido.

Tur directiva di scol, trahadonan social, y/of oficialnan di IB ta kere cu e bario y/of districto caminda studiantenan ta biba of caminda e scol ta situa tin un influencia significante riba calidad di bida di studiantenan.

Tin un variedad grandi di barionan dentro di e districtonan, cu ta core di luhoso te pober, sushi y descuida, cu hopi biaha ta overlap. Barionan insigur ta ser caracterisa pa gangnan (formacion), benta di droga, pobresa (scondi), sushi, ladronicia, y infrastructura deficiente y luznan di caya. Sinembargo, gangnan no ta presente of activo den tur bario.

Segun e rapport ta indica e profesionalnan di enseñansa a splica cu actividad di gang ta sucede principalmente a traves di hortamento. Algun studiante ta bin den contacto cu traficacion di droga (suave) riba caya of banda di nan cas of scol. Un bario insigur ta un centro di potencial di crimennan violento, bringamento y/of intimidacion. Sinembargo, den añanan recien, e bario of

vigilancia di polis tabatin un impacto positivo riba seguridad di bario.

E rapport ta splica cu peer pressure riba studiantenan pa envolve nan mes den ladronicia, actividad di gang of actividad di droga ta varia di bario pa bario. Esaki ta depende entre otro di e vigilancia di bario y kico e studiantenan mes ta bisa di dje.

Segun profesionalnan di enseñansa, cosnan a bira mas trankil rond di e edificionan di scol,

aunke tin kehonan tocante sushi y chollernan cu ta keda rond di algun edificio di scol. Algun studiante ta topa cu droga y vaping pafo di scol. Problemanan relaciona cu droga riba tereno di scol ta ser raporta mas frecuente na scolnan secundario.

Tur participante di e investigacion a indica cu durante e ultimo decada, cambionan demografico, tanto causa pa residentenan local como migrantenan, a cambia fundamentalmente e composicion demografico di e areanan residencial nobo, of barionan. E desaroyonan demografico aki a ser inicia door di e procesonan socioeconomico cu a resulta di e construccion di hopi hotel y e areanan residencial nobo. E transformacionnan demografico aki a cambia fundamentalmente e perfil di mayoria bario.

Segun profesionalnan di enseñansa ta indica den e rapport, tur scol ta depende di centronan di bario y/of di comunidad y cuido despues di scol (Traimerdia) pa nan actividadnan extracuricular. Studiantenan cu no por ser busca pa nan mayornan, tutornan, educadornan of miembronan di famia por asisti na cuido despues di scol cerca di e scol. E opcionnan aki ta varia di programanan structura (subsidia pa gobierno) despues di scol te na opcionnan alternativo.

Profesionalnan di enseñansa a enfatisa tambe e impacto positivo di barionan riba bida di studiantenan. E eventonan anual di comunidad folklorico y celebracionnan cultural, e renobacionnan di infrastructura (construccion di acera, asfalt, edificionan multifuncional moderno), y e enfoke di bario sigur ta bon ehempel di esaki.

E dinamica multicultural dentro di barionan ta ser fomenta door di e fluho continuo di migrante of residentenan nobo, pero no ta tur hende ta reacciona positivamente riba esaki. Algun mayor di varios districto ta cita e aumento di inseguridad como un resultado di e afluencia di migrantenan for di Venezuela y e islanan Caribense. Casi tur mayor a enfatisa cu e diversidad etnico y cultural no necesariamente ta ser percibi como negativo, pero cu e sentimento di familiaridad den algun bario a disparce.

E perfil di bario a cambia significantemente debi na e aumento di migrantenan. Algun

mayornan ta preocupa pasobra cierto caya y barionan a bira ireconocibel, y cu hopi mucha cu un background migrante den algun bario ainda ta hunga riba caya hopi laat pasobra nan mayornan ta traha hopi laat.

E rapport ta indica cu hopi biaha e encuestadonan a señala cu e desigualdad social creciente ta conduci na inseguridad den barionan. Segun nan, tin un desigualdad social significante entre bario y districtonan. Esaki ta bisto den un falta di orden y vivienda bon manteni, y patruyanan (i)regular di polis.

Problemanan social despues di COVID awor ta manifesta principalmente den pobresa visibel y scondi, problemanan financiero, stress y desempleo den casnan. Infrastructura tambe ta ser neglisha, manera por mira den por ehempel camindanan cu no ta ser asfalta.

Segun profesionalnan di enseñansa, desigualdad social den barionan ta afecta e desaroyo di identidad di mucha.

Pa e motibonan ya caba menciona, algun directiva di scol ta enfatisa cu sosten di cuido y/of un structura di cuido di e scol ta crucial. Sinembargo, en general, gerentenan di scol ta kere cu mayoria bario ta relativamente sigur. A pesar di studiantenan cu tin acceso na cuido despues di scol, cual hopi mayor ta indica ta mucho caro, deporte y/of hobby, tanto gerentenan di scol como mayornan ta kere cu tin mucho tiki oportunidad di tempo liber pa mucha y hobennan den mayoria di districto.

E contexto local den cual e scol ta situa y den cual e funcionnan di famia ta funciona ta e bario of distrito. Migracion a cambia fundamentalmente e perfil demografico di barionan den decadanan recien. Profesional y mayornan ta kere cu pobresa visibel y invisibel ta generalisa y ta pone salud mental di hobennan na peliger. Inseguridad den bario, incluyendo traficacion di droga y

formacion di gang, tambe ta un problema cu hopi mucha ta enfrenta.