Ayera mainta durante un conferencia di prensa parlamentarionan di fraccion AVP, Jennifer Arends-Reyes y John Hart a trece dilanti varios punto. Un di e puntonan cu parlamentario Hart a menciona ta e control di e ley di LAP (Landverordening Algemeen Pensioen), specificamente e control di esaki.

Parlamentario Hart a splica cu den aña 2011 fraccion di AVP y gobierno e tempo ey Gabinete Mike Eman a bin cu un ley cu ta sumamente importante pa trece un balansa den e mercado laboral, sobre todo pa e clase trahado, e ley di LAP (Landsverordening Algemene Pensioen).

El a sigui splica cu desde cu e ley aki a drenta na vigor e ley ta bisa cu un trahado y un dunador di trabou mester cumpli cu un porcentahe pa pensioen di e empleadonan. “Na final di dia nos kier pa ora un trahado yega su edad di pensioen cu e tin e siguransa cu e ta haya algo, apart di AO, acumulando cierto suma cu por bay cu un pensioen trankilo, aunke cu bida ta caro, pero pa mesun motibo tambe bo mester por tin un pensioen,” el a remarca.

Parlamentario Hart a indica cu prome cu e ley aki a ser introduci no tabatin un structura ni fundeshi pa loke ta trata ley di pensioen, y cu ta gobierno di AVP a bin den aña 2011 cu e ley aki. El a menciona cu den e mesun ley aki ta poni cu mester bin un instancia cu ta controla cu e ley aki ta ser cumpli debidamente.

El a agrega cu den aña 2017 diferente instancia, entre otro Social Economische Raad a haci un evaluacion di e ley y den e evaluacion nan ta bisa cu gobierno e tempo ey, esta Gabinete Wever-Croes I, mester tene cuenta cu no tin un instancia cu ta controla cu e ley aki ta ser bon ehecuta.

“Control ta hopi importante pasobra mester ta sigur tambe cu na momento cu un empleado ta haya su payslip, pa ley e mester por wak cu e suma determina cu ta ser kita realmente tambe ta bay na e compania di seguro, cual ta locual ley ta prescribi. Dunador di trabou ta duna un porcentahe y e trahado tambe ta duna un porcentahe,” el a subraya.

Segun parlamentario Hart a remarca cu control di e ley aki desde 2017 te cu awor no ta tumando luga door di un instancia, cual el a enfatisa ta un di e problemanan mas grandi cu tin ora cu ta papiando di e parti legislacion.

“Bo por tin ley, pero si bo tin control di bo leynan e ta bay bira un problema. Ami ta para pa e clase trahado pasobra mi a wak mi mesun tata por ehemplo bringa pa e por haya su derechonan di pensioen cu awe e por disfruta di un pensioen. Nos no por biba pensa pa awe so, nos tin uc pensa pa mañan tambe. Pa e motibo ey mi a cuminsa na pone un tiki mas presion na e gobierno aki pasobra nos no a bin pa planta mata so, nos mester planta ordo tambe den control di nos leynan,” el a enfatisa.

El a agrega cu si den e ultimo añanan e topico di control di leynan laboral tabata un prioridad pa e gabinete anterior, e ora ey nan lo a percura pa bin cu un instancia cu ta controla e ley aki. “Nan no a haci’e, nan no a percura pa e clase trahado. Es mas, door di e negligencia a perhudica trahadonan na e momito cu no tin un control debidamente di e ley aki,” el a señala.

Parlamentario Hart a subraya cu durante tratamento di presupuesto complementario e lo entrega un mocion departamento pa asina urgi gobierno aki si cumpli cu e control aki y apunta un instancia cu lo bay percura pa control di e ley aki.

El a indica cu talbes esey ta nifica cu lo mester bin cu tayernan pa por realisa control di e ley, pero ta importante pa trahadonan tin e siguransa cu ora nan yega nan edad di pensioen nan por tin un pensioen.

El a splica cu el a sinta cu diferente compania y tin compania cu si ta cumpliendo cu e ley aki debidamente, cu ta pone e porcentahe cu mester pone y tin di nan cu ta haci control di esaki habri caminda te hasta via un app empleadonan por subi y wak cu e compania ta cumpliendo conforme e ley y ta kitando e placa. Pero di otro banda tin casonan den corte caminda cu e empleado ta bay y ta bisa cu nan a kita e placa tur e tempo, pero no por hay’e.

“Nos ta biba den un pais caminda cu tin derecho y si bo tin bo derecho anto pa ley e ta estableci y e ora ‘kinan nos rol ta como Parlamento, e parti legislativo pa nos urgi e gobierno pa leynan ser bon controla. Mi ta kere cu nos tin cu hiba un politica caminda nos ta cuestiona maneho y nos ta mehora e pais aki, lag’e miho di loke e tabata y si un ley no ta ser bon controla y e ora nos mester urgi e gobierno pa haci e trabou aki,” el a remarca.

Por ultimo e parlamentario a manda un mensahe pa Gabinete AVP-FUTURO y a ratifica e necesidad pa institui un instancia cu ta controla e ley di pensioen. “Laga nos no planta mata so, laga nos planta ordo y structura tambe riba e pais aki. Ban controla e leynan bon, institui un instancia cu ta bay controla e ley di pensioen aki mas pronto posibel,” el a enfatisa.

Di su banda parlamentario Jennifer Arends-Reyes, relaciona cu tratamento di presupuesto complementario 2025, a splica cu di locual nan por a wak, gobierno ta mantene e palabracionnan financiero caminda a incorpora e cambionan tambe pa resto di lunanan di 2025.

El a agrega cu den e presupuesto complementario aki tin un bista mas di cerca tambe di proyectonan andando y tambe inversionnan adicional, cu lo ta den tapara.