Recientemente ex minister di Finanzas y Cultura y actual parlamentario Xiomara Maduro a manda un carta cu ta consisti di varios pregunta pa minister di Finanzas, Economia y Sector Primario Geoffrey Wever relaciona cu representacion legal di DIMP den corte den e caso cu parlamentario Mike de Meza a entama contra DIMP.

Den su carta parlamentario Maduro ta indica cu el a tuma nota den algun publicacion den medionan di comunicacion dia 20 di mei cu un abogado di Corsou, mr. Murray, lo representa Departamento di Impuesto (DIMP) den corte den e caso cu De Meza a entama contra nan.

E mesun anochi minister Wever a haci declaracion na medionan di comunicacion cu e no a duna autorisacion pa nombra mr. Murray como abogado pa defende DIMP. Parlamentario Maduro ta indica cu minister Wever a anuncia cu apart di cu e no a duna autorisacion pa nombra e abogado, e no a hiba esaki tampoco den Conseho di Minister, pero cu den su forma di traha e lo presenta esaki na Conseho di Minister.

Dos dia despues, 22 di mei, segun parlamentario Maduro ta indica, abogado Murray a manda un email informando medionan di comunicacion local cu e no lo representa DIMP den corte mas.

Relaciona cu e esaki parlamentario Maduro a manda un lista di 11 pregunta pa minister Wever.

E parlamentario a puntra e minister pa indica si DIMP ta autonomo na momento cu un caso inicia contra inspector di belasting pa hiba su defensa sin envolvimento di e minister y tampoco Conseho di Minister.

El a puntra e mandatario si e por splica na Parlamento di Aruba si DIMP, den cuadro di su autoridad independiente, por acerca un abogado pa su defensa na momento cu e sinti cu tin mester di esey of sea acerca un abogado pa por defende den corte, of si e minister ta di opinion cu esaki mester sucede cu aprobacion di minister. Alabes e parlamentario a puntra den caso cu tin mester di aprobacion di minister, con e proceso ey lo mester encamina.

Parlamentario Maduro a puntra minister Wever si e tabatin contacto cu abogado Murray y si e ta na altura di e motibo pakico e abogado a scoge pa no representa DIMP mas den corte den e caso aki; y si e ta na altura di e contenido di e caso y si a discuti esaki sea cu DIMP of e abogado.

Maduro a puntra e mandatario tambe si e por indica na parlamento cual ta e ley of maneho cu ta duna un minister e autoridad di por dicidi cual abogado ta miho, contrario na opinion di DIMP na momento cu DIMP tin un opinion diferente na esun di e minister; y si e por indica cual y con leu su rol ta den e caso aki pa por dicidi tocante cual instancia por representa DIMP den corte.

E parlamentario ta indica cu den su declaracion minister Wever a bisa cu e lo bay Conseho di Minister cu e decision pa nombra un abogado cu lo representa DIMP. El a pidi e mandatario si e por indica cual ley of maneho ta determina cu mester bay Conseho di Minister pa un decision, discusion of pa informa pa loke ta trata e caso aki; y alabes Maduro a pidi si minister Wever por indica na parlamento ken tabata presente den e Conseho di Minister na momento cu a comparti informacion tocante escogencia di e abogado y/of informacion di e caso.

Por ultimo parlamentario Maduro a puntra si minister Wever por indica na parlamento kico a ser discuti den e Conseho di Minister tocante e caso aki y cual tabata e decision di Conseho di Minister; y alabes el a puntra si minister ta haya ta apropia cu ta pone e escogencia di abogado y informacion tocante un caso na discusion y/of informacion den Conseho di Minister den presencia di e dos formadornan cu ta forma parti di e proceso di screening y tambe coleganan di partido di e persona cu e inicia e caso y cu ta un miembro actual di parlamento.

Te ainda, algun siman despues cu hasta veredicto den e caso a bira conoci, no tin claridad riba kico precies a sucede cu e abogado di Corsou. Ken a contrat’e, y ken a tuma e decision pa descart’e un dia despues. Esaki pasobra, a pesar cu medionan local a reporta cu mr. Murray a presenta su mes como abogado pa DIMP na Corte, e declaracionnan di minister Wever, bao ken e departamento di DIMP ta cay y kende lo mester ta na altura di tur suceso relaciona cu e caso, a bisa cu e no tabatin conocemento di e desaroyo aki.

Bon dia Aruba a tuma contacto cu minister Wever pa puntra si el a ricibi e preguntanan cu parlamentario Maduro a manda pa su persona, si e tin un reaccion y si e por duna un splicacion of aclaracion riba kico precies a sucede den e situacion relaciona na e representacion di DIMP den corte.

Minister Wever a splica den su contesta cu e ta na altura cu parlamentario Maduro a manda algun pregunta pa su persona, pero cu no a ricibi esakinan ainda na su oficina.

El a sigura cu asina cu e ricibi nan e lo manda su respuestanan pa e parlamentario por escrito y asina duna un splicacion y clarificacion amplio di e situacion.

Bon Dia Aruba a tuma contacto tambe cu parlamentario Maduro pa puntra kico e ta spera cu e por saca afo di e preguntanan cu el a manda pa minister Wever.

Den su contesta parlamentario Maduro a indica cu ainda no a haya contesta y a menciona cu el a ripara cu ministernan ta tarda pa contesta pregunta y ya tin como 500 pregunta di fraccion MEP sin contesta.

“Ta importante pa nos sa si minister Wever a cumpli cu e responsabilidad cu e tin pa Gobierno/DIMP wordo bon asesora den corte y descarta cu minister Wever a sucumbi pa presion politico di AVP pa laga Gobierno/DIMP sin defensa di un abogado,” el a enfatisa.

El a subraya cu fraccion MEP ta insisti riba claridad, transparencia y bon gobernacion.