Parlamentario Marisol Lopez Tromp(POR): ‘Ta importante pa tin un bon bista riba e situacion di vacunacion contra enfermedadnan den caso di asilo’

ORANJESTAD – Parlamentario Marisol Lopez-Tromp haciendo uzo di su derecho a manda un serie di pregunta pa minister di Salud Publico relaciona cu carta manda door di Secretario di Estado encarga cu Asuntonan di Reino, Raymond Knops, pa Tweede Kamer den cuadro di e situacion na nos pais bisiña Venezuela.

Den e caso aki e Secretario di Estado a menciona cu gobierno Hulandes lo asisti cu vacunacion contra diferente enfermedad.

Raymond Knops ta menciona algun di e enfermedadnan pa cual nan lo duna asistencia, manera ta sarampi, tosferina, difteria, cacheton, tetanus, polio DKTP y rubeola MMR. E asistencia aki ta bin riba peticion di Corsou.

Basa riba e declaracionnan aki Lopez-Tromp a haci e siguiente preguntanan na Minister Dangui Oduber.

  1. Gobierno di Aruba a haci e peticion pa haya asistencia pa vacunacion pa cu e enfermedadnan ariba menciona?
    1. Si ta asina pa ki tempo lo por haya e asistencia aki?
  2. A confirma caso(nan) di algun di e enfermedadnan ariba menciona?
    1. Si e respuesta ta positivo, cual(nan) ta e tipo di enfermedad cu a keda registra y cuanto caso tin registra?
  3. Ki pasonan Minister di Salud Publico ta tumando pa preveni un brote di un di e enfermedadnan ariba menciona riba nos isla?
  4. Aruba lo mira e posibilidad pa expande e cooperacion cu RIVM di Hulanda, mescos cu Corsou a pidi, den e areanan di keintura geel y difteria?

Pa loke ta e pregunta si a confirma algun di e enfermedadnan y si ta asina cual y cuanto caso tin registra, Marisol Lopez-Tromp a yega di haci e pregunta aki caba den reunion publico den parlamento algun luna pasa pasobra tabatin indicacion cu tin malesanan cu a desaparece for di hopi tempo caba particularmente na Aruba y cu recientemente e malesanan aki t’ey atrobe den nos comunidad.

Parlamentario Lopez-Tromp ta indica cu ta hopi importante pa tin un bista riba esaki, pasobra esaki por toca cualkier persona riba nos pais cu normalmente ta vacuna contra e malesanan aki. Si por ehempel tin mucha cu no tin e vacunanan aki, teniendo na cuenta cu tur mucha tin derecho riba educacion y enseñansa, mester por sa kico e lo significa pa nos muchanan en general na Aruba.

P’esey mes a manda e preguntanan por escrito y ta spera di por haya un contesta pronto for di e mandatario en cuestion riba esakinan.

 

You May Also Like

Aruba ta e unico pais den Reino cu ta canando atras considerablemente riba e tema di integridad

Ayera e reunionnan interparlamentario a continua na Den Haag. Un di e puntonan poni ...

‘Politiconan mester stop cu engañonan populista pa gana voto’

For di algun tempo caba partido MAS a tuma nota di varios engaño populista ...

‘Presupuesto supletorio mester ta un herment pa ahusta y control, no ultimo recurso ora baca a hoga’

Diaranson mainta parlamento di Aruba tabata den sesion publico pa tratamento di Presupuesto Supletorio ...

‘No por acepta reto di un Prome Minister cu no ta para pa loke e ta bisa’

Gobernacion ta continuacion caminda bou di ningun circunstancia, por tin argumento valido pa hustifica ...

Andin Bikker: “Ami no ta kere cu Alonso Tromp tin un caso”

Cuminsamento di siman Camara di Comercio a manda un carta pa Alonso Tromp caminda ...