Awe mainta ta tuma luga e reunion den Parlamento di Aruba pidi pa fraccion POR y sosteni pa e otro fraccionnan di coalicion, MEP y RED.

Den e reunion aki, parlamentarionan di fraccion di POR, Dellanire Maduro y Alan Howell kier entrega un mocion di censura contra nan propio minister di nan partido, Marisol Lopez-Tromp. E fraccion mas grandi di oposicion ta prefera di scucha prome e deliberacion rond di mocion di censura, pa asina nan asumi nan posicion, asina lider di fraccion di AVP, Marlon Sneek a declara na Bon Dia Aruba.

“Mi tin cu bisa cu posicion oficial no tin ainda…” asina parlamentario Sneek a declara ayera tardi. Nan kier scucha prome kico ta e argumentacion tras di e mocion. Pero tambe kico e minister mes tin cu conta, pa asina nan por tuma un posicion. El a reitera cu nan fraccion no ta participa den e tipo di discusion aki, caminda e ta haya cu un tipo di discusion di ‘ego’ ta tumando luga.

‘Hamerstuk’

Encuanto si e reunion aki su caracteristica ta esun di un ‘hamerstuk,’ kiermen bin vota riba e mocion di censura sin debate, el a bisa cu esaki no ta berdad. Parlamentario Sneek a splica cu un ‘hamerstuk’ ta ora cu bo yega un reunion publico, caminda tur partner ta di acuerdo por ehempel riba un ley cu mester wordo trata y prome cu esey, bo ta yega na acuerdo cu no lo bay tin un lista di debate. Kiermen cu niun hende ta skirbi su mes pa hiba palabra riba e ley, e ora ey nan por bay di biaha pa votacion. Segun parlamentario Sneek, esaki ta e proceso cu ta wordo yama como ‘hamerstuck.’

Pero e ta haya cu e caso aki relaciona cu e reunion pa entrega un mocion contra minister Lopez-Tromp ta diferente. Ya cu di un banda un reunion a wordo yama pa entrega un mocion. E ta haya cu automaticamente lo mester tin un parlamentario cu mester entrega e mocion ey. Kiermen cu automaticamente no por papia di ‘hamerstuk’ mas.

Ya cu hende a lo menos tin cu bisa bon dia y cu e kier entrega un mocion, y e tin cu lesa loke ta e tema di e mocion. Pa wak si tin mas hende cu kier hiba palabra. Pero tambe pa e minister duna su contesta of su sentimento ariba locual a wordo presenta y si eynan nan por bay over na votacion. “E simpel hecho cu mester entrega un mocion caba ta kita e aspecto di hamerstuck,” el a bisa.

A pesar cu nan ta den oposicion, parlamentario Sneek a bisa cu nan no ta haya prudente cu e tipo di discusion aki di dimension politico ta tumando. Mientras cu tin asunto di interes general como e posicion cu pais Aruba tin cu tuma riba e ponencia di Hulanda riba e dos ley di reino cu nan kier introduci, y cu e ta considera cu tin mas prioridad. Mientras cu di e situacion aki nos no ta scucha nada, manera nada a pasa. Pero si nan a dicidi pa bin cu un reunion pa trata un mocion di censura.

E no ta di acuerdo pa bin cu e tipo di discusion aworaki den Parlamento cu un minister cu a bay cu vakantie. Si nan tabatin duda cu e minister en cuestion por a tuma cualkier decision cu nan no ta comparti e mesun opinion cune, ta otro cos. Pero considerando cu e mandatario no tabata na Aruba, y cu no por tuma niun decision desde afo, no ta wordo hustifica pa yama un reunion pa discuti riba su posicion. Mientras nan por a warda cu receso di Parlamento caba pa discuti cualkier diferencia di opinion riba e asunto aki.

 

 

 

LEAVE A REPLY

Please enter your comment!
Please enter your name here