Parlamentario Marlon Sneek(AVP): ‘Un biaha mas e falta di vision y incapacidad di gabinete Wever Croes a resalta’

ORANJESTAD – Siman pasa na hermana isla Corsou a tuma luga un tremendo actividad pa stimula economia di e isla caminda prome minister di Hulanda a bay Corsou cu representante di 40 compania Hulandes pa wal posibilidad nan pa haci negoshi y diversifica Economia.

Awe nos ta wak cu e decisionnan cu gabinete Wever Croes a tuma na momento di a drenta gobierno, pa para e Proyecto di gobierno di AVP, ‘Europe meets America’ cu tabata e base pa cuminsa cu un pilar economico nobo pa nos pais.

Parlamentario di fraccion di AVP, Marlon Sneek a mustra cu pa falta di vision di gabinete Wever Croes na momento di e tuma e decision aki, a pone cu siman pasa Aruba a perde e posibilidad aki cu bishita di un delegacion comercial pa Corsou, caminda a firma varios MOU pa converti Corsou den un hub entre Europa y America.

Marlon Sneek a sigui mustra cu no solamente gobierno no tin un vision economico ainda pero e incapacidad pa analisa desaroyonan cu tin pa e pais, mester a para mira con un delegacion di Hulanda cu un grupo di mas cu 40 comerciante y inversionista, a baha bay Corsou ya cu gobierno di Aruba no a sigui cu e proyecto aki.

“Tur loke Aruba a haya siman pasa tabata un bishita di pasa, come y bay dor di prome minister Rutte, reuni algun minuut cu fraccionnan den parlamento, haci un bishita na gobernador algun presentacion y a regresa Hulanda den oranan di anochi. Tur esfuerso cu gabinete Mike Eman a haca pa varios aña caba, trabounan di preparacion cu a wordo haci pa converti Aruba den un hub comercial entre sur America y Europa, entre otro cu mudamento di waf pa Barcadera, a bay perdi.

E falta di vision y incapacidad di gobernantenan actual ta pone cu awe Aruba a perde e pilar economico aki y esaki casi sigur lo bay bira e isla di Corsou cu mesora a gara e posibilidad aki cu man habri. Hasta Secretario di Estado Knops a forma parti di e delegacion aki cu a reuni cu varios instancia na Corsou despues cu gobierno di Aruba a dicidi di neglisha y no sigui cu e proyecto aki, pensando cu nan ta perhudicando partido AVP pero en realidad nan a perhudica nos propio pais pa crea un otro pilar economico.

E bishita di premier Rutte tabata simplemente un formalidad, un forma di gasta algun ora na Aruba prome cu el a regresa Hulanda pero sin cu por mira algo cu su bishita lo a trece pa nos pais y riba dje reuni cu un gobierno cu no tin un vision pa discuti di e mandatario Hulandes. Pa hopi tempo gobierno di AVP a traha riba e posibilidad grandi aki y a crea e departamento di Europe Meets America pa converti Aruba den un hub comercial entre continente Americano cu esun Europeo, caminda tabata cla pa sigura lasonan comercial nobo, crea un pilar economico solido pa nos pais y caminda nos hendenan cu nan experticio di nan conocemento di tanto e cultura Sur Americano como esun Europeo, lo tabata di gran importancia.

Sinembargo e mentalidad troci, e incapacidad pa goberna combina cu e falta di vision total pa goberna nos pais, a pone cu e proyecto aki practicamente lo bay wordo ehecuta pa gobierno di Corsou cu no a perde pa gana y a firma diferente MOU pa realisacion di e proyecto aki.

Realmente algo tristo caminda no solamente gabinete Wever Croes a hinca nos pais den un recesion cu su maneho di medida contra pueblo, e gobierno aki simplemente no sa kico pa haci pa crea un otro pilar economico,” e lider di fraccion di AVP, Marlon Sneek a declara

You May Also Like

‘No por acepta reto di un Prome Minister cu no ta para pa loke e ta bisa’

Gobernacion ta continuacion caminda bou di ningun circunstancia, por tin argumento valido pa hustifica ...

Ta ora pa reconoce e berdadero balor di Arte riba nos isla

Ora nos ta papia di e balor di arte pa nos comunidad, ta bon ...

‘Minister presidente no a duna parlamento informacion riba situacion cu Venezuela’

Lider di fraccion di AVP, Marlon Sneek a confirma cu ainda minister presidente Evelyn ...

Minister di Turismo a biaha menos, esun di sector primario a biaha mas

ORANJESTAD – Ex minister y parlamentario di oposicion, Benny Sevinger a bin cu informacion ...

PPA su masterplan pa desaroyo di Oranjestad lo ehecuta maneho y proyecto ‘strategico’

E actual gobierno di AVP a haci Oranjestad ‘prioridad number uno’ di su maneho ...

‘Tur Partido ta papia di castigo minimo sin considera e problema riba su mes’

Castigo ta keda importante, sea ta castigo maximo of castigo minimo.Na final di dia, ...