Parlamentario Mervin Wyatt-Ras (AVP): ‘Tin parlamentario mester wak den nan coalicion prome cu critica otro den asunto di quorum’

ORANJESTAD – Mervin Wyatt-Ras durante conferencia di prensa a contesta parlamentario Vrolijk cu mester pensa y lesa prome cu e papia y punta dede encuanto e asunto di quorum den Parlamento.

Segun parlamentario Wyatt-Ras oposicion mester duna quorum na nan. Cada miembro di parlamento mester carga nan responsabilidad. Den reunion dia 20 di februari ultimo encuanto supervision financiero y e protocol cu minister di Financia a firma sin consulta cu Parlamento y pa cual el a haya un brevet van onvermogen dor di coalicion, Wyatt-Ras a cuestiona falta di presencia di e minister durante parti di e reunion. Si e minister tin prioridad pa e asunto financiero cu el a hinca Aruba den un crisis financiero y social, e mester tabata t’ey henter reunion. Tambe Wyatt-Ras a señala na un dado momento cu tabatin solamente 10 miembro di coalicion presente na reunion y cu e mes hunto cu coleganan di fraccion di AVP mester a keda den sala pa e reunion por sigui. Kiermen fraccion di AVP ta haci su trabou.

Wyatt-Ras ta splica reglement van orde di Staten ta regla den articulo 25 te cu 27 e quorum. Articulo 25 ta indica cu presidente ta habri e reunion ora cu mas di mita di miembronan di parlamento a firma lista di presencia. Articulo 26 ta stipula kico ta haci ora no tin quorum na comienso di e reunion y cu e ora ey tin cu menciona tur nomber di parlamentarionan y wak ken t’ey y ken no t’ey y si resulta cu menos cu mita di e parlamentarionan no ta presente mester verdaag e reunion y yama den 4 dia di trabou. Tin cu traha un proces-verbaal. Articulo 27 ta indica kico pa haci ora tin falta di quorum durante cu e reunion ta andando. E ora mester check cual miembronan t’ey y nota y si constata cu tin menos cu mita di e total di parlamentarionan lo mester verdaag e reunion y yama esaki bek dentro di 4 dia di trabou. Pues mester tin mayoria presente pa tene reunion.

Segun Wyatt-Ras e y su coleganan dia 20 di februari tabata t’ey pa reunion pero mesun miembronan di coalicion no tabata completo na reunion. Vrolijk mester wak den su cura prome cu wak di otro. E mester wak pa nan ta voltallig. Nan no tabata ni suficiente miembro ora a vota riba nan mesun mocion. Aki por constata cu Vrolijk ta critica otro mientras e tin cu bay cerca su coleganan di coalicion pa puntra unda nan ta of unda nan a bay. Wyatt-Ras semper a cumpli cu su deber como parlamentario. Wyatt-Ras a bay varios reunion den ultimo tempo den cual 2 miembro so di coalicion ta show up na reunion. Esaki Vrolijk mester wak tambe pa bay cerca nan y puntra unda nan a keda. Na luga di vigila ken a bin traha e dia cu porfin e mes ta keda un dia na trabou e mester bay check su coleganan mes. E mester wak e balki den su propio wowo prome cu wak e splinter den wowo di otro. Ademas e mester bay wak den pasado unda e mesun ministernan cu antes tabata parlamentario no tabata bin reunion publico pero tabata manda busca cuminda. E mester informa si mes miho prome cu critica otro segun Wyatt-Ras. E mester zorg cu e y su fraccionnan den coalicion por duna e bon ehempel y no manda huma pa desvia tur hende di e realidad cu tin miembronan ta keda si bin reunion paso nan no kier vota pa loke e gobierno ta bin cu ne of pa nan no sostene nan propio coleganan. Vrolijk tin hopi huiswerk pa haci prome cu e cana critica un parlamentario manera Wyatt-Ras.