Parlamentario Mervin Wyatt-Ras: Preocupacion pa variante Omicron y pa investigacion andando den DVG

Parlamentario drs. Mervin Wyatt-Ras na inicio di e prome conferencia di prensa di partido y fraccion di AVP pa aña 2022 a desea tur ciudadano y nan famia un feliz aña 2022 y gradici un y tur, incluyendo prensa, pa e sosten.

Siguientemente e parlamentario a trece su preocupacion padilanti pa loke ta trata e casonan di Omicron y e caso den DVG cu Ministerio Publico ta investigando. E caso aki ta relata na fraude cu certificadonan di vacunacion y hortamento di placa cu turistanan ta paga na airport pa nan PCR test.Wyatt-Ras ta relata cu desde aña 2020 nos pais a ser invadi dor di e virus Covid-19, cu tur consecuencia financiero-economico y psycho-social.

Un cantidad di 37.000 persona a perde empleo y mester a depende di FASE, loonsubsidie of pakete di cuminda, sea di Fundacion pa Nos Comunidad, Cruz Corra of famia. Nos comunidad a sufri hopi. Un cantidad di ciudadano no por (a) paga nan debenan. Na momento cu nos a pensa cu nos a batalla y domina COVID y e variante Delta cu tabatin consecuencianan mortal no solamente na Aruba pero tambe mundialmente, nos a haya nos mes confronta cu e variante Omicron. E variante aki ta ser transimiti lihe, e ta hopi contagioso.

Dia 20 di december 2021 e prome caso di Omicron a ser constata na Aruba. Dor di contagio rapido dia 28 di december ya nos a ser confronta cu e di cinco wave of oladi COVID na Aruba di cual67.7% tabata e variante Omicron.

Por a constata cu di e prome 17 caso di Omicron na Aruba tur e personanan tabata vacuna. Esaki a haci cu cientificonan y dokternan a pensa kico ta ocasiona cu tog apesar cu personanan ta vacuna nanta contagia asina liher?

Segun Wyatt-Ras, ta conoci cu aunke un persona ta vacuna tog e por haya e virus.Sinembargo pa e variante di Delta tabata hopi importante pa personanan vacunapasobra pa e personanan cu tin malesanan chronico, cu ta diabetico, vulnerable y nos grandinan e risiconan pa salud tabata hopi mas grandi pa nan por sobrevi. E vacuna a percura pa e consecuencianan tabata minimal.Pues vacunata hopi importante pero ta mira cu e contagio ta sigui y pues mester usa tur sorto di medida di precuacion pa minimalisa contagio.

Dia 31 di dec2021 tabatin un record di 742 caso pa dia y ayera 1028 caso. Dia 3 di januari 2022tabatin unrecord dicantidad di ziektemeldingen. Tabatin 1161 persona a meld ziek cu un costo di alrededor di ¼ miyon florin. Esaki segun SVB cu tin un total di 35.253 asegurado.

Segun Wyatt-Ras, si mira e filanan cu tin na Hospital pa haci test, esakinan ta hopi largo, Gobierno lomester pone mas lugar disponibel pa por test. No ta husto pa nos hendenan bai para den fila largo, mientras nan ta sinti nan mes malo y cu trafico ta wordo asina hopi tranca.Ta necesario alabesmas localidadnan unda esnan cu tin cu tuma e vacunaof e booster, por pasa haci esaki. E plegaria aki Wyatt-Ras a haci na mas ocasion, sin resultado.

Pa loke ta trata e fraude, esaki a sali na cla ora Ministerio Publico a manda un relato riba e caso Wanglo caminda a aresta 2 sospechoso relaciona cu iregularidadnan pa cu certificacion di vacuna.Tambe segun Ministerio Publico tabatin hortamento di placa cash na aeropuerto ora cu turistanan mester a paga pa nan PCR-test. Ta ser bisa cu tin entre 2000-3000di e certificadonan ta falsifica. Esaki ta un preocupacion grandi. Paso mientras cu ciudadanon ta zorg pa nan ser vacuna, tin un grupo cu no ta vacuna pero ta haya nan certificado sin tin cu vacuna. Kizas nan a ser hasta registra den e Health App sin cu nan ta vacuna. Wyatt-Ras,den nomber di su fraccion ta mandando cantidad di preguntanan al respecto. E Parlamentario ta haci preguntanan critico tocante e sistema di control y tambe encuanto e Health App.

E hecho cu a nombra friends and family ta trece cun’e problemanan cu awor ta escala. E minister mester splica encuanto e “Vacuna g’Gate”.Segun Wyatt-Ras e minister mester bin padilanti pa splica dicon dia di e boda di yiu di prome minister tabatin fiesta grandi.E minister a permiti alabes cu su amigonan y hasta esnan di Parlamento a pone fiesta, ocasionando cu casonan di Omicron a sigui aumenta.

E mester splica tambe dicon e ta exihi pa e director di Hospital rectifica loke el a declara. Segun Wyatt-Ras esaki ta un falta di respet pa sr. Jacco Vroegop, un profesional cu ta traha asina duro den Hospital pa atende tur patient. Sr. Vroegop solamente a trece padilanti den medio di prensa cu “alle 17 personen die als eerste positief testten op de omicron variant op Aruba waren gevaccineerd”.Terecht el a expresa cu “Por a bisa awor ta reconoce ampliamente cu diferente vacuna di COVID 19 ta proteha nos menos contra e infeccionnan di loke tabata pensa anteriormente”. E no a bisa nada stranjo. El a expresa cu kizas nos a pensa e vacuna ta solucion di tur cos pero ta resulta otro. Ta incredible cuminister awor no kier pa director di Hospital duna su opinion, mientras cu e mes tabata skondi y no kier bai prensa.

Minister Oduber, tambe ministro presidente mester duna cuenta na pueblo. Nan gobierno kier a pone integridad asina halto ariba agenda mientras cu awor cu ta toca nan, nan ta bula pipa y ta bai skonde. Igual ta conta pa minister encarga cu integridad. E no ta manera nan, segun e, pero awor cu nan ta ser investiga pa integridad e no ta tuma un posicion.Wyatt-Ras ta spera cu e preguntanan cu ser entrega na minister por haya contesta. Si e minister ta honesto cu su mes e mester saca su conclusion y tuma su retiro.