Durante presentacion di Minister di Finanzas, Asuntonan Economico y Sector Primario, Geoffrey Wever, Parlamento di Aruba tocante e incentivonan fiscal actual y proponi, parlamentario Mike de Meza (AVP) a cuestiona Gabinete AVP-FUTURO riba e impacto real di e politicanan actual riba e desaroyo economico di San Nicolas y si efectivamente gobierno ta tuma accionnan concreto pa yuda e distrito.
Segun De Meza, e falta di decisionnan claro di parti di gobierno ta frenando e progreso di proyectonan importante den San Nicolas. El a menciona specificamente e proyecto di hotel Secrets, cu segun e ta e unico desaroyo hotelero grandi y concreto den e area, pero cu no ta haya e nivel di cooperacion y apoyo necesario for di gobierno. Den su intervencion, De Meza a expresa preocupacion riba lo cu el a describi como un falta di vision strategico di e gabinete tocante e futuro di San Nicolas.
E parlamentario a argumenta cu ora gobierno ta presenta un pakete di incentivonan fiscal cu un enfoke general pa henter Aruba, sin diferencia entre Oranjestad y San Nicolas, esey por termina faboreciendo e capital de manera desproporciona. El a indica cu Oranjestad ya ta un centro economico hopi mas desaroya, atractivo y cu un fluho di consumidor y inversion mas grandi. Den un scenario asina, inversionnan naturalmente lo tende di concentra den Oranjestad, mientras cu San Nicolas ta keda atras.
De Meza a enfoca tambe riba e condicion di infrastructura como un factor clave. El a señala cu, a pesar di algun mehoracion den centro di San Nicolas, no tin inversionnan significante den infrastructura den e parti pariba di e isla. El a menciona specificamente e estado di e careteranan cu ta conduci pa e hotel Secrets, describiendo nan como desastroso, cu falta di iluminacion y señalnan cla pa guia e turistanan. Segun e, esaki ta un responsabilidad basico di gobierno y un elemento esencial pa aumenta e atractividad di e area y crea un ambiente faborable pa inversion.
Durante su discurso, De Meza a sostene cu sin un compromiso cla di gobierno pa mehora infrastructura y facilita permiso y proceso administrativo, un pakete di incentivonan fiscal no lo logra e efecto desea. El a enfatisa cu si e unico motor economico grandi den San Nicolas no ta haya e atencion necesario, ta dificil pa spera cu otro inversionista lo tuma e riesgo pa inverti den e zona.
E parlamentario a expresa cu su critica no ta un atake personal, sino un yamado pa reflexion y autocritica den seno di gobierno, cu ta inclui su propio partido. Segun e, e situacion economico y social di San Nicolas ta serio y mester accion inmediato. El a insisti cu San Nicolas no mester simplemente palabra di apoyo den Parlamento of den prensa, sino medidanan concreto cu por traduci den desaroyo sostenible y oportunidadnan economico pa e comunidad.
Finalmente, De Meza a reitera su posicion cu aplica e mesun pakete di incentivonan fiscal pa Oranjestad y San Nicolas no lo produci e resultado cu gobierno ta spera. Segun e parlamentario, San Nicolas mester un pakete specifico, adapta na su realidad y retonan particular, pa por stimula desaroyo y crea un balansa economico riba e isla. El a conclui cu, sin un enfoke diferencia y un inversion serio, San Nicolas lo sigui keda atras, a pesar di e promesanan y discurso politico.
