Recientemente e situacion alrededor di e proceso di screening di candidato pa minister, parlamentario Mike de Meza, a conoce un desaroyo nobo. Ta trata di un keho cu director di DIMP a entrega contra De Meza na Ministerio Publico (OM), cual awor ta para su proceso atrobe pa OM por realisa un investigacion penal. Den un entrevista recien lider di fraccion PPA, parlamentario Otmar Oduber ta duna su punto di bista y con e ta mira henter e situacion aki.
“Henter e situacion riba su mes ta un berguensa grandi pa gobernacion di Aruba y mester corda cu hopi hende ta wak nos, Hulanda ta wak nos, region ta wak nos,” parlamentario Oduber a indica tocante e situacion cu tin alrededor di e candidatura di De Meza pa bira minister cu ya tin varios luna andando y cu awor tin posibilidad di tarda ainda mas pa motibo di e investigacion penal cu OM lo mester realisa.
Oduber a remarca cu henter e situacion ta lamentabel y cu ta e propio miembronan di parlamento a pasa e ley unanimamente. El a sigui splica cu ora el bisa cu tanto e ley di integridad di ministernan y e ley di financiamento di partidonan politico no ta funciona, el a ser critica.
Pa loke ta e ley di integridad di ministernan, el a enfatisa cu por mira cu claramente e ta duna responsabilidadnan hopi leu na instancianan cu niun caminda den Reino e no ta di e forma aki.
El a splica cu na Hulanda y Sint Maarten den nan Constitucion ta hinca articulo 119 cu ta bisa cu un minister of un miembro di Tweede Kamer no por ser investiga door di Ministerio Publico, door di un PG, y tampoco no por ser investiga door di un ambtenaar.
Parlamentario Oduber a sigui splica cu pa e motibo ey na Hulanda durante e ultimo 48 aña niun minister ni ningun miembro di Tweede Kamer no a ser investiga. El a indica cu tabatin 21 keho cu a ser entrega, pero niun a resulta den un investigacion pasobra nan ta ser protegi. Hoge Raad y den e caso aki a traves di un PG special cu ta ser nombra pa bida, no cualkier PG, por cuminsa un investigacion contra un minister, un minister cu a baha of un miembro di Tweede Kamer of un miembro di Tweede Kamer cu a baha.
Parlamentario Oduber a indica cu na final di dia pueblo ta vota pa un parlamento y parlamento mester nombra e minister y sostene e ministernan. El a remarca cu claro mester tin reglanan, pero e ley na e momentonan aki, el a subraya, no ta sirbi su proposito.
“Mi no ta defende Sr. De Meza pero e por bay hopi mas leu. E por bay leu pasobra por tin un ambtenaar cu ta haci un investigacion di buena conducta riba nivel criminal di un minister y a resulta cu e candidato pa minister ey su yiu a casa cu un hende cu por a comete algo of ta ser sospecha di algo. Esey no ta un hustificacion cu e minister ta ser castiga cu e no por bira un mandatario mas den futuro,” el a señala.
E lider di PPA a enfatisa cu tin cosnan cu ta bay demasiado leu den e ley aki y un di e cosnan cu e ta haya ta bay hopi leu ta, por ehempel, relaciona na e discusion cu tin den e aspecto fiscal aworaki, cu no ta bay solamente pa e buena conducta fiscal cu cualkier ciudadano por ricibi, si no cu aki e ley ta duna poder na e inspector di belasting pa duna su opinion en general riba e comportacion di e persona den e caso aki.
“Bo por tin un buena conducta cu tur cos ta den orden, pero ta lag’e habri na e inspector, e ley ta lag’e hopi hancho habri, pa bay hopi aña atras, pa duna un opinion riba un persona,” el a agrega.
Oduber a ratifica cu e no ta defende Sr. De Meza, pero a remarca cu si tin algo robes ta tuma luga 16 aña pasa of si el a tuma luga un aña pasa, un keho lo mester a ser entrega na e momento ey y no aworaki cu e persona ta candidato pa bira minister.
“Si e no a bira minister esey kiermen cu nunca bo lo a entrega un keho of cu nunca lo a haya atencion of corigi algo cu a bay robes. P’esey mi ta kere cu cierto momento mester bay revisa e leynan aki, percura cu e aspecto di integridad ta keda importante, pero integridad cerca un no necesariamente ta integridad cerca otro,” el a indica.
Parlamentario Oduber a reitera cu su punto di bista personal politico ta cu ta lamentabel cu sr De Meza ta den e posicion aki awe pa motibo di falta di toma di decision di e formadornan tres luna pasa. El a splica cu e ley no ta bisa cu un hende no por bira minister si tin un comentario of algo riba dje, ta e prome minister y den e caso aki formadornan ta tuma e consehonan aki y ta informa gobernador si nan ta kere of no den e persona pa fungi den e funcion.
Den e caso di De Meza, el a splica, prome minister Eman a faya na momento como formador despues cu el a haya e prome resultadonan y e rapport cu ta bisa cu aparentemente su comportacion fiscal ta okay, pero door cu ley ta bisa cu mester duna un interpretacion riba su conducta fiscal los di e documento di declaracion cu e ta haya, e ley ta duna e inspector e poder adicional.
“Como lider di partido, formador y futuro prome minister e mester a tuma un decision tres luna pasa: of presenta Sr. De Meza y pleita cerca gobernador cu e ta haya cu De Meza ta capabel y capaz pa haci e trabao; of for di tres luna pasa prome minister Eman mester tabata sincero y habri cu De Meza y bis’e cu a base di e conseho cu el a haya e no por trece dilanti como minister. E mester a tuma e decision, pero e no tabatin e coraje pa bisa su number dos cu e no ta durf di carga e situacion p’e y a pone De Meza bay muri den corte pa mand’e busca un cos cu e no por haya,” el a subraya.
