Durante un conferencia di prensa recien, miembro di fraccion di AVP parlamentario Otami Thomasia, a trece dilanti e importancia di presupuesto 2026 y e direccion cu Gabinete AVP-FUTURO ta duna na inversion den salud mental y cuido preventivo den comunidad.

Segun e parlamentario, e documento financiero ya a ser entrega na Parlamento di Aruba pa revision, y a remarca cu un prioridad di Gabinete AVP-FUTURO ta pa sigui inverti den fundacion y programanan cu ta cuida e hendenan mas vulnerable den comunidad.

El a menciona, entre otro, fundacionnan pa maneho di adiccion, Imeldahof y Casa Cuna, Stichting Guia Mi, Voodijraad, y Stichting Reclassering cu lo ricibi sosten pa continua cu e trabounan esencial den cuido, proteccion y guia di hendenan den situacionnan dificil.

“Esakinan ta hungando un rol masha grandi den nos comunidad, y asina nos ta wak atrobe cu den presupuesto 2026 nos gobernacion AVP-FUTURO ta bay sigui inverti den comunidad,” el a remarcca.

Un di e puntonan central cu parlamentario Thomasia a enfatisa ta cu gobernacion ta adopta un enfoke preventivo den cuestion di salud mental y a subraya cu e strategia lo enfoca riba no warda te ora un persona cay, sino preveni cu esey ta pasa.

El a splica cu un di e preocupacionnan creciente ta e bienestar emocional di hobennan. El a indica cu hopi biaha ta pasa cu hobennan patras di porta ta echt deal cu nan emocionnan, ta sinti nan mes nan so. “Nos tin cu habri e portanan ey y zorg pa tur hende haya e sosten cu nan merece,” el a subraya.

Esaki por habri caminda pa aislamento, amistad negativo y uso di droga. El a remarca cu ta hopi importante si famia y mayornan di cas tin mas tempo pa dialoga y orienta e hobennan, hopi di esey por esey por ser preveni.

Parlamentario Thomasia a señala cu e problema di salud mental den hubentud ta keda un desafio serio y riba caya ta mira cada bes mas hendenan hoben den situacionnan vulnerabel, ora cu nan apenas nan a cuminsa bida. “Esaki nos tin cu preveni,” el a adverti.

E parlamentario a menciona tambe cu Aruba ta enfrenta dos aspecto di preocupacion grandi: embehecemento di poblacion, caminda tin mas hende grandi cu tin hoben, y vulnerabilidad creciente di hobennan. El a subraya cu e hecho cu hobennan ta vulnerable ta duna e indicacion cu mester cuida nan extra pasobra nan ta e futuro y nan tin cu carga pais Aruba den futuro.

“Si nos no proteha nan ora cu nan ta bezig ta cay den un situacion di salud mental, nan ta bay den droga, nos ta tumando pa un comunidad chikito un risico masha grandi mes. P’esey mi ta hopi contento cu den presupuesto 2026 ta crea e espacio pa inversionnan cu ta guia nos hobennan, cu ta inverti den nos hobennan, scol, programanan,” el a enfatisa.

Parlamentario Thomasia a splica cu den presupuesto 2026 tambe ta inlcui e plan pa Ministerio di Salubridad Publico y Ministerio di Husticia traha mas cerca hunto, locual ta pone enfasis riba prevencion y accion integral.

Un ehempel cu e parlamentario a menciona cu el a participa na dje ta e programa Wega Riba Wiel, un evento organisa recientemente cu a uni organisacionnan manera CEDE Aruba, KPA, IBiSA y Bario Unico. E actividadnan deportivo y cultural tabata enfoca den barionan manera Village, Bushiri, Dakota y Esso Heights, caminda hobennan di tur bario por participa.

Thomasia a indica cu e programanan aki no ta solamente ta trata di deporte, pero ta trata tambe di crea conexion positivo entre hobennan, polis y comunidad. Ta busca crea un ambiente unda hobennan ta siña cu polis ta un aliado y cu nan por tin confiansa pa papia abiertamente di problema den cas of scol cu e polis di bario.

Un di e momentonan mas emocional pa e parlamentario tabata ora el a observa con polisnan conoce hopi di e hobennan personalmente, hasta cu nan nomber. Esaki, el a indica, no ta un coincidencia, sino producto di tres aña di presencia constante den barionan.

E relacionnan aki a resulta den respet mutuo. Hobennan grandi ta mira polis como un mentor, y polisnan ta inspira un sentimento di seguridad. “Esaki ta un señal cu nos ta bayendo den un bon caminda, cu e hobennan ta sinti nan mes mas sigur y por ta nos por baha e cantidad di persona cu ta sinti nan mes nan so, y esey ta algo sumamente bunita y mi ta kere e ta e caminda nos tin cu bay. Nos no por bisa nos trahando nos so pa un meta, pero tin fundacionnan cu tin mesun metanan y nan por traha hunto pa nos logra algo,” el a remarca.

El a agrega cu alabes nan ta garantisa cu nan ta tumando tur hende na cuenta ora ta trata di realisa programanan y a señala cu comunidad mester uni pa cuida e adultonan grandi y e muchanan pasobra nan ta e gruponan mas vulnerable. Na mesun momento el a subraya cu den esaki tambe mester cuida e hendenan cu ta lanta tur dia y ta bay trabou y ta carga pais Aruba.

Un mensahe cla cu parlamentario Thomasia a laga durante e conferencia di prensa ta cu si un persona ta den un situacion dificil, ta existi institucionnan cu ta cla pa yuda. El a enfatisa cu fundacionnan ta disponible pa guia y brinda sosten, y ademas a señala gobierno ta compromete pa sigui inverti den nan capacidad.

“E sala di Parlamento ta semper habri pa cualkier fundacion cu kier sinta y papia y bisa nan preocupacionnan, nos ta semper libremente habri pa esaki,” el a indica.

E enfoke di AVP-FUTURO, segun Thomasia, ta mustra un compromiso firme pa cuida e grupo mas vulnerable, proteha e hobennan, y lucha pa e bon comun.