Parlamentario Otami Thomasia preocupa pa situacion di YMCA

Recientemente durante un conferencia di prensa parlamentario di fraccion AVP, Otami Thomasia, a trece dilanti su preocupacion pa e situacion actual di e clubnan di YMCA na Aruba y alabes a trece dilanti puntonan cu comision di enseñansa a dialoga riba dje durante nan reunion cu Studenten Comissie Aruba.

Pa loke ta trata e topico YMCA parlamentario Thomasia a indica cu recientemente el a manda algun pregunta pa minister di Asuntonan Social despues di a realisa un bishita tanto na YMCA San Nicolas y Dakota.

El a splica cu e bishita aki tabata uno placentero den e contexto cu el a haya oportunidad pa papia cu e personanan concerni na YMCA pa haya un idea con ta bayendo y unda nan falta, entre otro, reforsamento, pa nan por yega unda nan kier yega.

“Ami den mi añanan lantando personalmente YMCA San Nicolas tabatin un funcion importante, e tabata e curason di San Nicolas,” el a remarca. El a sigui splica cu tabatin diferente tipo di programa y actividad, pero awe comunidad ta mira un YMCA cu ta lucha pa asumi su rol den comunidad.

Parlamentario Thomasia a indica cu e clubnan tin falta di inversion, den entre otro infrastructura, cual el a señala ta den estado deplorabel despues di su bishita. El a subraya cu e infrastructura mester di cuido, renobacion. E cancha unda e mucha y hobennan ta hunga nan deporte ta kibra y ta frustia tambe, locual ta pone den peliger e seguridad di e mucha y hobennan.

“Esaki ta di lamenta pasobra si nos ta bisa tin problemanan social den comunidad, YMCA por hunga un rol masha grandi mes pa duna apoyo na famianan. YMCA su rol ta pa hubentud tin un luga, un santuario, unda nan por bay siña habilidadnan, siña ta cu nan compañeronan den un momento positivo, hunga deporte, y esey no ta su rol mas. Nos kier yega na esey back,” el enfatisa.

E parlamentario a manda pregunta pa minister encarga cu asuntonan social pa wak con e por yuda pa asisti e clubnan financieramente y asina yuda YMCA yega na un rol unda e por haci mas pa comunidad. El a subraya cu no por simplemente keda papia cu tin problemanan social den comunidad y no inverti den esakinan.

Na mesun momento Thomasia a clarifica cu e puntonan cu el a trece dilanti no ta un atake contra YMCA ni nada negativo. E meta di e trece e situacion den luz ta pa conscientisa otro hendenan riba e loke ta pasando y con e situacion ta pa asina por brinda ayudo y inverti. “Por trece YMCA back na algo hopi bunita pero nos tin cu haci esaki hunto,” el a enfatisa.

E parlamentario a remarca cu mester trece YMCA y gobierno hunto y pa asina determina specificamente unda e problema ta y con nos por soluciona esaki. “E situacion di YMCA con e ta awor nos no por acepta. Nos kier wak e ta bira un joya di nos pais y inverti back den nos hubentud,” el a subraya.

Durante e conferencia di prensa parlamentario Thomaisa a trece dilanti algun punto cu a ser treci dilanti durante e reunion di comision di Enseñansa hunto cu e Studenten Comissie Aruba. E reunion aki, el a expresa, tabata uno hopi bunita y a expresa su admiracion pa e Studenten Comissie Aruba cu ta un grupo nobo na Hulanda cu a tuma e oportunidad di liderazgo pa haci algo asina bunita pa asisti e studiantenan cu ta bayendo Hulanda of cu ta na Hulanda caba pa duna nan e sosten cu nan mester pa nan por yega nan logronan.

E parlamentario a splica cu na momento cu e hobennan ta laga nan pais atras pa bay studia ta algo emocional tanto pa e hoben como su famia. El a sigui splica cu durante e reunion nan a toca hopi topico, pero dos topico cu a resalta pa su persona, y cu mester di atencion rapido, ta e preparacion di e studiantenan cu ta bay afo y problemanan di salud mental cu nan ta enfrenta ora nan bay laga nan famia atras y nan yega un luga diferente y haya nan mes den situacionnan cu por ehempel nan no ta bay bon financieramente, no ta bay bon cu les of a haya problemanan di amistad.

El a sigui splica cu nan a haci algun pregunta y e studiantenan nan a trece dilanti cu e hobennan cu ta bayendo Hulanda pa sigui cu nan estudio no ta prepara manera mester ta emocionalmente y un parti importante di esaki ta cu e mayornan mester laga los prome cu e yiu subi avion y no usa e ultimo luna nan pa malcria e yiu pasobra nan ta bay. Mas bien nan mester usa e ultimo lunanan pa prepara e yiu financieramente con pa budget, y prepara nan mentalmente cu nan ta bay yega un luga diferente y zorg cu si algo bay robes cu nan semper por yama cas, y cu si nan mester di break pa tuma esaki y si nan mester di apoyo emocional pa no duda di busca esaki cera famia y amigonan cerca pa yuda nan supera nan problemanan.

“Pero hopi biaha nos ta bisa ‘toughen up’ bay p’e y e yiu ta sinti su mes manera cu e no por yama cas y bisa mama of tata cu e no ta bayendo manera e kier y esey ta laga nan den desesperacion y nan ta fracasa,” el a remarca.

Alabes el a trece dilanti cu ta hopi importante pa ora e scolnan ta ofrece programanan di preparacion pa e hobennan, e hoben y mayornan no mira esaki como un opcion, pero mas bien manera cu obligacion.

“E yiu por ta emociona pa e biahe nobo, pero nan no ta para keto un rato riba e hecho cu nan lo ta haciendo e biahe ey nan so,” el a agrega.

Parlamentario Thomaisa a subraya cu ta esencial pa prepara e hobennan pasobra e cifranan di Hulanda di e muchanan cu ta termina nan estudio ta abou y e cifranan di e studiantenan cu ta bin back pa aporta na Aruba ta mas abou ainda.

“Nos kier e cifranan aki subi y nos kier haci esaki na un manera positivo pa impacta e yiunan di tera, e futuro di Aruba por regresa Aruba mentalmente prepara pa aporta, mentalmente cla pa traha y contribui back na nan pais,” el a enfatisa.