Un punto cu lider di fraccion di PPA, Otmar Oduber, a trece dilanti ultimo tabata e parti di maneho di bodycam, cu tanto e gobierno y minister ta gaba cune.
PPA un biaha mas ta resalta e parti, cu nan como partido di mas chikito den Parlamento, ora cu nan pone atencion na un mensahe, cu pueblo ta boga p’e, ta haya cierto movecion den gobierno. PPA ta hayando constantemente mensahe, yamada y bishita di varios ciudadano cu yen di preocupacion.
Maneho bodycam ad-hoc
“Si nos como fraccion di PPA, no a pone presion cu nos a pone, awe no tin bodycam pa polis. Nos a keda insisti hunto cu comunidad y nos a logra. Pero atrobe un maneho ad-hoc di e gobierno aki,” Otmar a subraya. Con por ta posibel cu gobierno ta keda tuma un comunidad haci? “Ken a wak un maneho di bodycam? Ken sa kico ta e derecho di un polis cu bodycam, ora e drenta bo cas?” tabata preguntanan crucial cu Otmar a haci. Na Merca y Europa tin e posibilidad di bay online y bo por pidi segun minuut, pues tal ora y tal caminda, bo por haya e video di bodycam.
Derecho pa sa
Ta cuestionabel cu a cuminsa cu supuestamente e proyecto di bodycam, pero niun hende ni sa di cuanto bodycam ta papiando di dje. “Mi a tende 8 of ta 10 a wordo introduci. Pero niun hende sa kico e derecho ta? Niun hende no sa ki regla tin?” Otmar a indica.
Otmar a resalta tambe, cu PPA sigur ta sostene henter e proyecto di bodycam, pero ta importante pa bin dilanti cu e contenido di maneho y no djis hisa benta asina. “E pueblo tambe tin derecho di sa kico su derecho ta. Paso e bodycam ta pa protege polis, pero tambe e comunidad. Pero e ora comunidad mester sa, con esaki ta protege nan”.
Parlamento no conoce e maneho
Ta di lamenta cu, no tin maneho di bodycam, paso ora den Parlamento, mi a puntra tocante e protocolnan tocante bodycam, no tabatin esaki. Mi ta puntra mi mes, si e mesun polisnan sa kico e maneho ta! Ki ora ta cend’e, ki ora ta pag’e? Paso si un polis kier cend’e djis ora ta cumbinie y pag’e pa comunidad no wak loke nan kier, esey no ta e meta di bodycam,” Otmar a expresa. Un bodycam mester ta cendi tur ora y mester tin control y kico ta sucede.
Finalmente parlamentario Oduber ta keda subraya cu ta importante pa pueblo ta bon informa tocante e maneho y nan derechonan relaciona cu uso di bodycam. “Ta increibel cu tur cos ta un show, un video bunita, cu tur respet, pero unda e maneho mes a keda? E gobierno completo aki ta ad-hoc y niun hende nos sa den ki direccion nos ta bayendo y esaki ta bay a costo di bon gobernacion, cu tanto a campaña cu ne,” Otmar Oduber a finalisa bisando.
