Mediante un comunicado di presna lider di Fraccion di PPA den parlamento, Otmar Oduber, a reacciona riba e informacion cu departamento di Ouderenzorg y OPPA a trece dilanti durante un reunion cu e comision di Ouderenzorg den Parlamento di Aruba.

Parlamentario Oduber a indica cu pe no ta un sorpresa pa tende di e situacion critico existente. En conexion cu esaki el diabierna ultimo el a entrega dos mocion, uno tocante maneho di cuido di adulto mayor y e otro pa remedinan pa e grandinan ser inclui den e pakete di AZV. Pero tur dos mocion a ser bari for di mesa, locual ta crea un preocupacion grandi pa su perosna.

“Ni partido MEP cu ta saliendo for di siete aña di gobernacion, ni partidonan Futuro y AVP cu ta drentando y cu supuestamente lo mester ta un aire fresco den parlamento; nan a bisa cu nan ta vota contra pasobra gobierno lo tin’e toch den su programa,” el a indica.

Mirando e respuesta di e motibo cu partidonan den gobernacion, AVP y Futuro, a vota contra, e lider di fraccion PPA a manda un mensahe cla pa nan, “esta cu pueblo a vota pa su representantenan den parlamento vigila y controla gobierno y no pa nan bira un PR di gobierno.”

Parlamentario Oduber a sigui splica cu durante e reunion cu tabatin cu departamento di Ouderenzorg y OPPA e por a sinti cu e contenido di e dos mocionnan cu el a presenta ta exactamente loke a bin dilanti den e reunion. Sinembargo, despues cu nan a vota contra e dos mocion, durante e reunion tur fraccion a bisa cu nan tin e preocupacion aki den nan cabes y cu nan ta bay traha riba dje.

Banda di esaki, Oduber a trata e topico di aumento di 700 florin di reparatietoeslag, cual a ser toca tambe den e reunion cu e dos instancianan. “6 di december ningun hende a bisa e pensionadonan cu nos ta bay pagabo e 700 florin den un paar di aña. Tur politico a cana y bisa cu e tin cu wordo aumenta cu 700 florin, ningun politico a bisa cu ta 250, ningun fraccion a bisa cu ta bay parti’e den cuater bes, ningun a bisa cu ta bay paguele den tanto dia. A bisa cu e necesidad pa cera e buraco mas tanto cu ta posibel pa loke ta trata e bestaansminimum di Aruba, ta 700 florin. Es mas, ni cu e 700 florin aki bo ta cera e bestaansminimum aki,” el a bisa.

E lider di fraccion PPA a indica cu durante reunion publico den parlamento por a scucha prome minister bisa cu lo bay wak con e negociacionnan cu Hulanda lo bay pa loke ta trata Rijkswet y ta bay wak si mester bay aumenta of no e prima di AOV pa e ora por cumpli cu e 700 florin. “Bo no tabata sincero e ora, bo no tabata husto cu e pensionado ora bo a cana busca e votonan,” el a remarca.

Por ultimo, parlamentario Oduber a señala cu si tene na cuenta tur e puntonan aki, uitkering, finanzas, cuido y salud di e adultonan mayor na e momentonan aki y e expectiativanan pa aki 10-15 aña si no haci nada, e ta kere cu parlamento no por tuma ‘for granted’ loke a tuma lugar diabierna.

“E mensahe pa gobierno mester ta bon cla, cu esaki ta e prioridad, e casi 20 mil pensionado na Aruba ta e prioridad. Tin otro areanan manera educacion, seguridad y salubridad cu mester di atencion, pero e prioridad mester ta pa tur politico, den bista di PPA, nos grandinan,” el a subraya.