Recientemente lider di fraccion PPA parlamentario Otmar Oduber a manda un serie di pregunta pa Minister di Finanzas, Economia y Sector Primario, Geoffrey Wever pa loke ta trata FreeZone Aruba N.V., y alabes a haci un peticion na presidente di Parlamento di Aruba, Marlon Sneek, pa un vragenuur cu e mandatario.
Den su carta parlamentario Oduber ta indica cu e ta haci peticion formal pa un vragenuur cu Minister Wever relaciona cu e informenan recien cu ta regarda e prestacion di FreeZone Aruba N.V.(FZA) y e retiro di ex director Greg Peterson.
Oduber a splica cu e informacionnan cu a surgi encuanto añanan di mal maneho, contribucionnan di pensioen no paga, y e falta di resultadonan dentro di FZA ta lanta preguntanan serio riba e gobernacion di e compania di gobierno aki y e supervision politico eherce riba dje.
E parlamentario ta señala cu como Minister Wever ta e minister cu ta encarga cu e cartera di Economia for di 2021, ta esencial pa e duna cuenta y responde e preguntanan publicamente den Parlamento.
Pa loke ta trata e preguntanan, parlamentario Oduber a manda un total di 16 pregunta pa e mandatario. Oduber a puntra minister Wever, mirando cu e ta responsabel pa e cartera di Asuntonan Economico for di 2021, si e por splica kico ta e motibo cu e disfuncion di Greg Peterson a conduci na intervencion solamente na 2023/2024, mientras cu FZA tabata tabatin un rindimento abou pa añas y tabatin problemanan interno.
Oduber a señala cu e rapport di revision di PWC di augustus 2022 ta bisa cu e efectividad di FZA ta stagna, particularmente pa loke ta trata atrae inversion, innovacion y diversificacion. El a puntra e mandatario ki medidanan concreto el a tuma, como minister encarga, pa atende cu e stagnacion aki desde publicacion di e rapport, banda di e retiro recien di Greg Peterson y a cuestiona dicon e no a tuma accion mas trempan.
El a indica cu e rapport di revision di PWC di augustus 2022 ta señala cu na FZA, e hermentnan di ley di compania no a ser utilisa. El a puntra minister Wever con e ta splica e negligencia den uso di hermentnan di ley di empresa, y ki pasonan a ser tuma of lo ser tuma pa garantisa e aplicacion corecto di ley di empresa na FZA, y ademas a pidi e mandatario pa elabora riba cual aspectonan specifico di gobernacion empresarial na FZA N.V. no ta funciona adecuadamente, segun e rapport.
El a splica cu e rapport ta sugeri cu gobierno no a cumpli suficiente cu su rol como accionista di FZA N.V. pa medio di su opcionnan di intervencion di derecho di empresa. El a puntra minister Wever cual derecho y obligacionnan specifico di accionista no a ser observa den e sentido aki, y ki medidanan gobierno ta tumando pa fortalece su rol di supervision di acuerdo cu ley di empresa.
Parlamentario Oduber a puntra tambe te na ki grado e deficiencianan identifica den aplicacion di ley di empresa a contribui na e situacion cu a conduci na retiro di e director aña pasa; ken finalmente ta responsabel pa esaki, si ta e minister, e hunta di supervision, of e director; y ki lesnan a siña di esaki pa futuro maneho y direccion di FZA.
Oduber ta sigui puntra den su carta cu mirando cu FZA ta haci perdida y e director a ser retira aña pasa despues di mas di 20 aña den funcion, ki consecuencia politico, financiero, y operacional specifico e situacion aki tabatin pa FZA, y a cuestiona ki pasonan gobierno lo tuma pa investiga responsabilidad pa añanan di mal maneho.
Ademas el a pidi minister Wever si e duna un update riba e situacion financiero actual di FZA y e grado di e perdidanan despues di 2021, y ki obhetivonan specifico a ser fiha pa converti e perdidanan aki den rentabilidad.
Oduber a puntra kico e ta bisa di e supervision y gobernacion den seno di FZA cu a laga e situacion aki sigui pa casi tres decada, si minister Wever ta considera e rol di e Hunta di Supervision suficiente profesional y independiente den e asunto aki, y con e Ministerio a vigila e rol ey for di tempo cu e mandatario a tuma e cartera di Asuntonan Economico.
El a cuestiona con por a sucede cu contribucionnan di pensioen no a ser paga na ENNIA na bienestar di su personal pa añanan largo, y kico ta minister Wever su rol como e minister responsabel den e supervision serio aki.
Parlamentario Oduber a indica cu e contract di e ex director, Greg Peterson, a inclui un pakete di 18 luna di retiro. El a puntra dicon un pakete asina generoso a yega na ser aproba sin criterionan di rindimento cla, specialmente mirando e introduccion di e Ordenansa Nacional riba Entradanan Mas Halto (LNT) na 2022 bou di politica di minister Wever.
El a puntra e mandatario cuanto placa publico a ser gasta na FZA for di 2021, incluyendo salario, gastonan huridico, y gastonan operacional, y a pidi pa haci e cifranan aki publico tambe.
E parlamentario ta indica cu PwC su rapport di revision di augustus 2022 ta recomenda pa evalua e funcion y posicionamento di e zona liber manera un instrumento dentro di e politica di inversion di gobierno di Aruba, incluyendo e distancia desea entre FZA y gobierno. Relaciona cu esaki el a puntra minister Wever ki progreso a ser haci cu e evaluacion aki, y con e bista obteni lo influencia e liderazgo y gobernacion di FZA den futuro.
Oduber a puntra tambe ki medidanan concreto di politica e mandatario ta tumando awor pa reforma, restructura, of posiblemente aboli FZA, y kico ta su vision pa e utilidad di un zona liber den e structura economico di Aruba na 2025.
Por ultimo el a puntra minister Wever si e ta prepara pa conduci un investigacion independiente den e politica, gobernacion y maneho financiero di FZA den añanan recien, incluyendo e periodo di e mandatario, y pa comparti e resultadonan publicamente.
“Ta inaceptabel cu miyones di fondo publico a ser gasta pa añanan na un entidad disfuncional sin produccion economico significante. E tempo pa wak e otro banda a caba. Nos ta conta cu tur transparencia y responsabilisacion politico di Minister den e asunto aki,” Parlamentario Oduber a finalisa bisando den su carta.
