Parlamentario Raymond Kamperveen a presencia e desvelo di e logo nobo di Parlamento Hubenil como cu Parlamento Hubenil ta preparando pa celebra nan di 20 aña di existencia.
Segun e presidente di Parlamento Hubenil, sr. Dave Martinus, e logo nobo ta representa pensamento y desaroyo nobo pa nos hoben pa futuro. Parlamento Hubenil ta consisti di 20 pa 30 hoben entre e edad di 12 pa 24 aña, pero e fundacion ta desea di amplia e participacion di hobennan den mas bario di Aruba. Asina nan por contribui y duna oportunidad na mas hoben pa siña desaroya nan habilidad di liderazgo, innovacion, social, y emocional.
E logo ta consisti di un shoco berde, un strea cora cu blanco, un hoben na blauw y un chatbox biña. E shoco ta simbolisa e sabiduria, e guia y conocemento adkiri pa e hoben por medio di su educacion. E strea blanco ta simbolisa e cuater metanan: formacion pa hobennan den bos hubenil, Parlamento hubenil, gobierno hubenil y tutorial hubenil.
E strea cora ta simolisa e compas guiando e hoben den direccion positivo, ofreciendo e diferente oportunidadnan y guia specifico di nan desaroyo.
E hoben blauw ta simbolisa e deseo cu hobennan na Parlamento Hubenil tin pa descubri y yega nan potencial maximo.
E chatbox biña ta simbolisa e forma innovativo, constructivo, y respetuoso cu un hoben ta intercambia, vocifera, opina y comunica cu otro hoben y miembronan den nos comunidad.
E parlamentario tabata content y a exprecia cu tabata un placer pa a presencia e desvelo di e bunita logo di Parlamento Hubenil di Aruba.
