Parlamentario Robert Candelaria(AVP): ‘Minister presidente no a reacciona riba aumenta seguro pa polis y ambtenaar’

ORANJESTAD – Basta luna atras, miembro di fraccion di AVP, Robert Candelaria a dirigi tambe un otro carta pa prome minister cu pregunta riba seguro pa tur empleado publico si nan keda dehabilita of si nan fayece durante cu nan ta eherce nan trabounan pa sirbi nos pais.

Parlamentario Candelaria a mustra cu e carta aki a wordo manda 5 di juni di aña pasa.

“Berdad prome minister a contesta e carta dia 25 di juni aña pasa, bisando cu lo pidi conseho di Directie Financien y di Departamento Recurso Humano. Loke ta di lamenta ta cu despues di 25 di juni aña pasa, nada mas a pasa.

Awor laga mi splica cu mi no ta pidiendo pa algo fuera di e mundo aki. Mi a pidi pa aumento di un suma di seguro cu a wordo inicia bou maneho di ex prome minister di Aruba Nel Oduber. Pues ta un maneho existente cu a inicia bou gobernacion di MEP mes. Mi a pidi pa aumenta e seguro, pasobra nos por tuma nota cu cosnan ta saliendo for di man.

Falta di respet pa autoridad
Mi ta kita un rato di e punto pa splica algo. Sirbidonan publico, ambtenaarnan y gelijkgestelden manera maestronan di scol ta core riesgo na pia di trabou tur dia. No ta nada nobo, pero e bista y sintimento general ta cu agresion ta aumentando den nos comunidad.

Hende tin menos respet pa autoridad awendia. Personahenan cu antes tabata wordo respeta pa nan trabou, awor a perde esey. Mi sa cu algun lo bisa cu nan a perde esey pa nan mes via, pero ami ta kere cu a pesar di e opinion ey, mester duna nan y tur hende respet sin mas. Respet incondicional!

Berdad ta cu respet ta cuminsa na cas. Cu bon educacion. Mi a trece algun luna pasa, cifranan di un rapport over di desaroyo social den nos comunidad cu ta alarmante.

Famianan kibra, cifranan halto di divorcio, mucha cu ta lanta na cas cu un mayor so, of sin mayor. Nos sa cu e situacion social den nos comunidad ta bayendo atras hopi lihe, y mucho tiki ta wordo haci pa stop e desaroyo aki, te pa cambi’e desaroyo aki. Loke antes tabata normal cu un mucha lo haya straf na cas, despues cu el a haya straf na scol, no ta pasa mas. Awor tin ora e dolor di cabes ta bira pa e maestro.

Pakico mester di seguro?
Mi ta kere cu nos tur por corda e caso sumamente lamentabel cu un polis ehemplar a bira victima di agresion durante cu e tabata eherce su trabou. Tin hopi mas caso den e trabou di polis cu ami sa di dje, na unda violencia ta wordo uza contra polis. Ta cosnan cu antes un hende lo no a pensa mes riba dje. Awendia hobennan ta falta polis respet na ordo di dia.

Pero esaki no ta conta pa polis y maestro so. Hopi otro sirbido publico ta wordo confronta cu peliger di violencia durante nan trabou.

Mi ta kere cu gobierno como un bon dunado di trabou mester take care di e persona si pa motibo di agresion contra dje, durante y pa motibo di su trabou. Na Hulanda tin un proyecto di ley cu mi ta siguiendo di acerca cu ta bisa cu ora un hende agredi un ambtenaar haciendo su trabou, e lo mester haya castigo di prizon. No boete of taakstraf, pero prizon.

Mi sa cu e medaya aki tin 2 banda. E ambtenaar of gelijkgestelden tambe mester haci nan trabou corectamente, mester duna respet pa e haya respet. Mi ta kere tambe cu tin formanan in place pa reclama un ambtenaar of un cu ta gelijkgesteld na ambtenaar ora e faya. Pero ora e ta cumpli corectamente cu su trabou, e no por wordo agredi den ningun forma. Nos comunidad mester para contra esey y mustra cu esey ta inaceptabel.

Pa e motibonan aki mi a manda un carta di recordatorio na prome minister pa e traha riba esaki. Bin cu e consehonan y ahusta su maneho na bienestar di nos ambtenaarnan,” parlamentario Robert Candelaria a splica.

Un biaha mas parlamentario Robert Candelaria di fraccion di AVP, kier pidi gobierno pa stop di bisa cu e ser humano ta central cu nan boca so ya cu ta tur ser humano mester ta central y no esunnan so di bo color politico so. Tur! Mustra esaki cu bo echonan y cu bo maneho.

“Laga nan mira maske ta un tiki di loke bo a priminti, dor di duna nan e seguro riba riesgo di trabou pa ambtenaar y polis. Ohala nunca mester haci uzo di e seguro aki, pero ta ainda mas importante cu si un dia mester haci un apelacion riba dje, cu e ta in place si.”