Recientemente, den prensa local a publica un articulo tocante e buskeda di parlamentario Ruthlyn Lindor (Futuro) pa contesta tocante un incidente tragico den cual un hoben a perde su bida despues di bira malo durante Trayecto di Formacion Social (SVT). Riba su rednan social ayera, Lindor a clarifica su posicion tocante e suceso.

Manera a keda reporta, den un carta fecha 9 di juli ultimo, dirigi na presidente di Parlamento, Marlon Sneek (AVP), parlamentario Lindor ta bisa cu na mei a entrega pregunta por escrito relaciona cu e morto di Joshua Rampaul durante su participacion den Trayecto di Formacion Social, SVT. “Desde e tempo ey, mi a ricibi contesta di minister di Husticia, bisando cu durante transicion di e gabinete, no tabatin entrega formal di e programa na minister di Asunto General, y cu guianan esencial di supervision, pa e motibo aki, no a keda revisa ni transferi,” e carta ta bisa.

Ta agrega ademas cu mientras tanto, a bira conoci cu na augustus un grupo nobo di participante ta bay cuminsa e programa. “Esaki ta causa preocupacion, specialmente pasobra un evaluacion transparente ainda no a tuma lugar, ni a duna claridad na famia di e hoben fayecido ni na comunidad,” segun Lindor. “Como parlamentario, mi kier enfatisa e importancia di e trayecto aki, cu ta ofrece structura, disciplina y perspectiva pa futuro pa hoben. Pero precisamente pasobra esaki ta trata cuido di hoben bao supervision, ta crucial pa haci esaki riba un fundeshi solido, cu transparencia y responsabilidad profundo.”

Di acuerdo cu Articulo III.17 di Constitucion y Articulo 59 di Reglament van Orde di Parlamento di Aruba, Lindor ta entrega varios pregunta na minister di Asunto General, Cultura, Medio Ambiente y Naturalesa, Sr. Mike Eman, y ta solicita pa contesta e preguntanan aki por escrito.

Den e seccion di e carta dirigi na premier Eman, Lindor ta bisa cu dia 15 di mei ultimo, el a entrega pregunta por escrito tocante e morto tragico di Joshua Rampaul, kende a bira malo durante su participacion den Trayecto di Formacion Social (SVT) y a fayece tiki despues, despues cu su tata a bay busk’e. Te na e fecha, no a ricibi ningun contesta oficial for di ministerio di Asunto General.

“Maske e SVT, como programa, ta sigui obhetivonan valioso, gobierno mester actua cu e mayor cuido y transparencia den guia hubentud vulnerable. E falta di reflexion structural y comunicacion cla ta genera preocupacion serio tocante supervision y continuidad di cuido.” Segun e parlamentario, e preguntanan ta destina pa sigura e politica y salvaguardia administrativo necesario, pa por restaura confiansa den e programa y den gobierno.

Den e contexto aki, Lindor a haci e siguiente pregunta:
1. Minister por splica pakico no a duna ainda un respuesta oficial na e preguntanan anterior por escrito di dia 15 di mei 2025 tocante e morto di Joshua Rampaul dentro di SVT?

2. Minister ta considera responsable pa cuminsa un grupo nobo na augustus 2025 dentro di e Trayecto di Formacion Social mientras cu no a duna transparencia completo tocante e incidente anterior y su puntonan di aprendisahe structural?
3. E ministerio ta dispuesto, siguiendo e recomendacion di minister di Husticia, pa laga traha un rapport administrativo cu ta refleha e entrega, funcionamento y structura di cuido dentro di e programa pa asina sigura calidad, transparencia y responsabilidad publico?

4. Minister ta na haltura cu e falta di contesta duna na e tata di e hoben fayecido y na publico ta mina seriamente confiansa den e programa y den gobierno?

5. Ki medida concreto ya a ser tuma pa sigura cu guia, structura di cuido, y mecanismonan di supervision apropia ta na lugar pa e grupo nobo di hoben?

Manera menciona, parlamentario Lindor a solicita contesta por escrito na e preguntanan aki.

Contesta di minister di Husticia

Hunto cu e carta mas recien, parlamentario Lindor tambe a comparti e contestanan cu el a ricibi anteriormente for di minister di Husticia, Integracion y Transporte Publico, Sr. Arthur Dowers. Esaki tabata contesta riba un peticion fecha 21 di mei 2025, cu presidente di Parlamento Sr. Sneek a manda na e minister cu e preguntanan di parlamentario Lindor.

Lindor a puntra si minister di Husticia por a clarifica con e transferencia di e Trayecto di Formacion Social for di su ministerio na Asuntonan General a keda ehecuta, y si mecanismonan di supervision of protocolnan di guia a keda ahusta of transferi. Minister Dowers a contesta: “Durante e transicion recien di gabinete, no a tuma lugar un transferencia formal di e Trayecto di Formacion Social for di ministerio di Husticia y Asunto Social na e ministerio di Husticia, Integracion y Transporte Publico. Consecuentemente, cualkier mecanismo di supervision of protocol di guia no a keda ahusta ni transferi door di mi ministerio. Pa un splicacion substantivo di e structura y implementacion actual di e Trayecto di Formacion Social, mi ta referi bo persona na mi colega na ministerio di Asunto General.”

Riba e pregunta si ta considera un rapport administrativo util den e contexto aki como un instrumento di aprendisahe basa riba politica, minister Dowers a contesta: “Un rapport administrativo sigur por ta di balor den e contexto aki, particularmente como instrumento di aprendisahe a base di politica. E ta duna un oportunidad pa refleha riba e diseño y ehecucion di e programa y pa siña les pa politica den futuro. Hermentnan reflexivo asina ta contribui na transparencia, responsabilidad pa politica, y mehoracion continuo den ehecucion.”

Reaccion di parlamentario Lindor
 Despues cu e articulo a keda publica den un noticiero online, Lindor a ricibi hopi critica pa su preguntanan, cu algun usuario di rednan social insinuando cu e ta “hungando cu dolor di hende” of “probechando di un tragedia pa hunga politica.” Tocante e acusacionnan aki, Lindor a subi rednan social pa aclaria su posicion. Den un post, el a bisa: “No laga e hecho cu un portal mediatico a scoge pa crea sensacion falso tocante un tragedia kita atencion di loke ta realmente importante. Laga mi ta cla: Ami nunca a manda mi carta na e portal ey, ni mi a skirbi e articulo. Pasobra mi no ta hunga politica cu tragedia.”

El a continua bisando cu “un hoben no t’ey cu nos mas” y cu “un tata ainda no tin contesta.”

“Nos ta debe e, y tur famia, pa sigura cu tin structura di cuido y procedura adecua na lugar pa preveni cu esaki ta sucede atrobe. Esaki ta trata di responsabilidad, no atencion. Ta trata di husticia, no titular.”

Den un video compañando su mensahe, for di Parlatino na Panama, Lindor a bisa cu el a ripara cu a saca e articulo tocante e pregunta cu el a haci na premier Eman, pero cu a “sak’e full for di contexto.”
“Pa di prome lugar, e vocabulario cu a usa no ta mi vocabulario. Hamas y nunca lo mi a falta persona respet.”

El a continua bisando cu e “kier echt pidi pueblo pa no laga e don di [e portal] pa saca cosnan for di contexto, pa overshadow e tragedia cu a pasa. Ainda tin un tata cu no tin contesta di locual a bay fout, pasobra mi no a puntra nada over di medische gegevens, pero mi a puntra kico por a bay fout na e Sociale Vormings Trayect, pa asina por preveni cu algo asina por pasa atrobe den e programa.”

El a aclaria ademas cu loke e portal a publica tabata “e ultimo carta” den un trayecto largo unda el a haci pregunta na minister di Husticia, na minister di Asunto Social y Salubridad, y cu e no sa con nan a haya e carta y a skirbi e articulo comosifuera e mes tabata papiando, pero ta enfatisa cu e no tabata involucra den publicacion di e articulo.