Den medionan di comunicacion parlamentario Setty Christiaans-Yarzagaray a tuma nota cu Minister di Finanzas y Cultura ta presentando informacionnan riba un nivel agrega di Presupuesto 2022.

E proceso di presupuesto ta tumando poco mas tempo mirando e situacion di dependencia di sosten di likides y dialogonan cu Hulanda. Den informacion presenta ta indica cu CAft a ricibi presupuesto 2022 cu a duna su reaccion dia 29 di november ultimo riba cual Gobierno tambe na su turno a responde y reacciona riba puntonan di Caft.

Presupuesto 2022 ta proyecta cu pais Aruba lo ta bay tin un entrada di 1,275 miyon florin cu ta 162 miyon mas cu aña 2021 entre impuestonan directo y indirecto. E entradanan adicional aki ta mas tanto door di recuperacion economico cu Aruba a experencia. Esaki danki na esfuerso comun di tanto Gobierno como sector comercial y pueblo henter. Recuperacion ta grandemente dependiente di con e Pandemia ta wordo maneha y casonan activo. Por tuma nota cu den december por ehempel momento cu casonan di Covid a crece, esaki ta traduci su mes na cancelacion den e industria Turistico.

Pa loke ta trata gastonan riba presupuesto 2022, esaki ta proyecta pa ta 1,566 miyon florin cu ta 120 miyon menos cu aña 2021. E diferencia positivo aki ta calcula a pesar cu post di gastonan di personal, subsidio y interes ta bay conoce crecemento. Den caso di personal y subsidio crecemento lo ta di 8 y 10 miyon respectivamente cu ta bin door cu gobierno ta proyecta pa baha e recorte di 12.6% na 8.3% den 2022 y ta pensa pa caba di kita e recorte na 2023.

Deficit financiero cu ta e diferencia entre entrada y gasto pa 2022 ta proyecta na 291 miyon florin cu ta 5.2% di GDP cu ta 295 miyon menos cu e aña anterior. Un deficit cu por wordo splica completamente mirando cu ainda mundo henter ta den pandemia y ta un resultado positivo despues di tur esfuersonan pa recupera cu recuperacion economico.

Parlamento di Aruba ta en espera di e presupuesto cu ta den su ronda na Raad van Advies. Pronto Parlamento mes lo tuma nota den mas detaye di Presupuesto 2022 y lo cuminsa prepara pa su tratamento. Mirando e proyeccionnan positivo tumando na cuenta e diferencia entre aña 2022 cu aña 2021, por bisa cu esfuersonan y dedicacion di tanto Minister di Finanzas, e team di Finanzas, Minister President sra Evelyn Wever-Croes a resulta den mehoracion den resultado. Awor ta keda na Parlamento pa ricibi, scrutina y haci pregunta den mas detaye na Gobierno di Aruba pa loke ta trata presupuesto di aña 2022.

LEAVE A REPLY

Please enter your comment!
Please enter your name here