Recientemente Minister di Finansas, Economia y Cultura hunto cu Minister President di Aruba tabata na Parlamento pa un encuentro publico caminda Gobierno a presenta e Nota di Fin di Aña di 2019 (Najaarsnota 2019).

Den e Nota di Fin di Aña Parlamento por tuma nota di e situacion financiero di Pais Aruba y alabes por controla si gobierno ta cumpli cu e apoderacion cu nan a haya pa loke ta trata presupuesto di e aña aki. Alabes mediante di e nota Gobierno ta duna informacion caminda ta anticipa riba e cambionan cu lo keda presenta dentro di poco den Presupuesto Supletorio pa 2019.

Parlamentario Tromp-Lee ta enfatisa e echo cu for di e Nota di Fin di Aña por conclui cu Gabinete Wever-Croes ta demostra disciplina financiero y ta kedando den e apoderacion cu Parlamento a duna Gobierno pa cu Presupuesto 2019. Den e Nota di Fin di Aña por tuma nota cu Gobierno a ricibi 14.28 miyon mas na entrada, pero tabata tin 11.31 miyon mas na gasto di cual 8.3 miyon tabata pa e pago extra di reparatietoeslag. E cifranan ta mustra cu pa e aña aki mescos cu tabata e caso na 2018 gobierno no lo bin pidi fondonan adicional manera tabata un custumber bou di Gabinete di Mike Eman. Pa di dos aña consecutivo Gabinete Wever-Croes lo bay presenta un presupuesto supletorio cu lo ta budget neutral. Gobierno ta premira cu e deficit pa 2019 lo ta mas chikito cu presupuesta, 20 miyon na luga di 25 miyon, indicando na mes momento cu Gobierno lo bay cumpli cu e norma acorda den cuadro di supervision financiero. Segun Tromp-Lee esaki sigur ta e resultado di un maneho serio y responsabel caminda nos Pais poco poco, pero sigur ta bay den e direccion di un finansas sostenibel y duradero.

Segun Tromp-Lee durante di e encuentro publico Minister Xiomara Maduro a trece padilanti cu ta nos mes como pais mester drecha nos asuntonan na un manera factibel, no por drecha un caminda y daña un otro. Manera e Minister a subraya tin bes decisionnan cu Gobierno mester tuma no ta popular pero necesario. Tromp-Lee ta enfatisa cu ta bisto cu Gobierno ta demostrando e corahe necesario pa tuma decisionnan importante pa e pais aki y cu trabou duro ta duna su fruto! Gobierno di Aruba ta presentando dentro di poco na Parlamento un presupuesto 2020 caminda ta premira cu na fin di e aña lo termina cu un surplus. Un logro grandi pa nos pais pasobra ta despues di 12 aña nos lo logra mira un situacion di surplus.

Parlamentario Tromp-Lee ta gradici pueblo henter pa nan comprension, solidarismo y mas cu tur cos pa e disponibilidad pa hunto nos carga e responsabilidad pa nos Pais. Na mes momento Tromp-Lee ta felicita Gabinete Wever-Croes pa e trabou serio y responsabel cu nan a bin ta realisando pa nos pais. No ta di un dia pa otro por drecha loke AVP y Mike Eman a masacra den 8 aña.